ព្រលឹង​ចុង​សក់​! កំពុង​ចៀន​ចេក​ចៀន​​លក់​ ស្រាប់តែ​ឆាបឆេះ​ធុង​ហ្គា​ស​ (វីដេអូ)


រាជធានី​ភ្នំពេញ ​៖ ​ស្ត្រី​ម្នាក់​បាន​រង​របួស​យ៉ាងដំណំ​ ខណៈ​ដែល​គាត់​ប្រើ​ចង្ក្រានហ្គាស​ធុន​ធំ​ចៀនចេក​ចៀន​លក់​នៅ​មុខ​ផ្ទះ​សុខ​ៗ ស្រាប់តែ​ភ្លើង​បាន​ឆាបឆេះ​ធុង​ហ្គា​ស​យ៉ាង​សន្ធោសន្ធៅ ហើយដោយ​ខ្លាច​ឆេះ​ដល់​ផ្ទះ​ គាត់​ក៏​បាន​ស្រវា​ទាញ​ធុង​ហ្គា​ស​ដែល​កំពុង​ឆេះ​នោះ​ចេញ​ឲ្យ​ផុត​ពី​ផ្ទះ បណ្ដាល​ឲ្យ​រលាក​រង​របួស ។​ ប៉ុន្តែ​សំណាងល្អ​ដែរ ​ដែល​ធុង​ហ្គា​ស​នោះ​អត់​ផ្ទុះ​បង្ក​គ្រោះ​មហន្តរាយ​ធ្ងន់ធ្ងរ​ជាង​នេះ ​ព្រោះ​ទីនោះ​គឺ​ស្ថិត​នៅ​ក្នុង​ផ្សារ​តែ​ម្ដង ​បើ​ផ្ទុះ​វិញ​ និង​មាន​អ្នក​រង​គ្រោះ​ច្រើន​ព្រមទាំង​ឆាបឆេះ​ផ្សារ​ទាំងមូល​បាត់​ទៅ​ហើយ​។

ហេតុការណ៍ខាងលើ​​នេះ​បាន​កើតឡើង​កាលពី​វេលា​ម៉ោង​១២​និង​១៥​នាទី​ថ្ងៃត្រង់​ថ្ងៃ​ទី​២៧ ខែកញ្ញា ឆ្នាំ​២០២០ នៅ​ក្នុង​ផ្សារ​ទួល​លៀប ស្ថិត​នៅ​ក្នុងភូមិ​ទួល​លៀប សង្កាត់​ស្នោរ ខណ្ឌ​កំ​បូល រាជធានី​ភ្នំពេញ​។

​ស្ត្រី​រង​គ្រោះ​ឈ្មោះ​ផេង រ៉េ​ម អាយុ​ជាង​៤០​ឆ្នាំ​មុខរបរ​លក់​ចេកចៀន មាន​ទីលំនៅ​កន្លែង​កើតហេតុ​ខាងលើ​រង​របួសរ​លាកខ្លួន​។

អ្នកផ្សារ​ទួល​លៀប​បាន​និយាយ​ថា ស្ត្រី​រង​គ្រោះ​បាន​ប្រកប​របរ​ចៀនចេកចៀន​​លក់​ជា​ប្រចាំ​ថ្ងៃ ហើយ​នៅ​មុន​ពេល​កើតហេតុ​ បន្ទាប់​ពី​អស់​ហ្គា​ស​ គាត់​បាន​ដោះ​ដូរ​ធុង​ហ្គា​ស​ថ្មី​ហើយ​មួល​ក្បាល​ទុយោ​ធុង​ហ្គា​ស​អត់​ជិត ទើប​ពេល​កំពុង​ចៀនចេកចៀន​​លក់​ ក៏​ធ្លាយ​ហ្គា​ស​បង្ក​ឲ្យ​មានការ​ឆាបឆេះ​ធុង​ហ្គា​ស​នោះ​យ៉ាង​សន្ធោសន្ធៅ​តែ​ម្ដង ​។

តាម​ប្រភព​ដដែលបានបន្ត​ថា ​ភ្លាម​ៗ​នោះ​ដោយសារ​តែ​ខ្លាច​ឆាបឆេះ​ដល់​ផ្ទះ​ គាត់​ក៏​បាន​ស្រវា​ចាប់​ទាញ​ធុង​ហ្គា​ស​នោះ​ចេញ​មក​លើ​ផ្លូវ​បេតុង ​បណ្ដាល​ឲ្យ​រលាក​រង​របួស​យ៉ាង​សំណំ​ផង​ដែរ ចំណែក​អ្នក​ជិ​ខាង​បាន​នាំ​គ្នា​យក​បំពង់​ពន្លត់​អគ្គិភ័យ​ទៅ​បាញ់​ពន្លត់​អស់​ជា​ច្រើន​បំពង់​ ព្រមទាំង​បាន​យក​ក្រណាត់​ជ្រលក់​ទឹក​យក​ទៅ​គ្រប​ពីលើ​ផង និង​យក​ដីខ្សាច់​សើម​ទៅ​ជះពី​​លើ​ផង​នៅ​តែ​មិន​រលត់​ឡើយ​ រហូត​យក​រថយន្ត​ដឹក​ទឹក​តាម​ទៅ​បាញ់​ពន្លត់​ទើប​រលត់​ទៅ​វិញ​ទាំងស្រុង​៕​ (កែសម្រួលដោយ ៖ ធីតា​)

Facebook Google Twitter Email

Live

Sponsored News

ការស្ទង់មតិគេហទំព័រថ្មី




    សូម​អរគុណ