រាជធានីភ្នំពេញ ៖ នៅព្រឹកថ្ងៃទី២២ កញ្ញា ២០២០នេះ កម្លាំងនគរបាលខណ្ឌសែនសុខ បានបញ្ជូនខ្លួនជនសង្ស័យម្នាក់ ដែលវាយនារីជាសង្សាររបស់ខ្លួន បណ្ដាលឲ្យរងរបួសប៉ោងមុខជាំភ្នែក ទៅកាន់សាលាដំបូងរាជធានីភ្នំពេញ ដើម្បីចាត់ការបន្ដតាមនីតិវីធី ។
ជនសង្ស័យឈ្មោះ ប៉ា សុវណ្ណារិទ្ធ ភេទប្រុស អាយុ២០ឆ្នាំ ជនជាតិខ្មែរ ។ ចំណែកនារីរងគ្រោះឈ្មោះ នួន គឹមឡាង ភេទស្រី អាយុ២៥ឆ្នាំ ។
ក្រោយពីបញ្ចប់ការស៊ើបសួរ នៅរសៀលថ្ងៃទី២២ ខែកញ្ញា ឆ្នាំ២០២០នេះ លោកព្រះរាជអាជ្ញារងអមសាលាដំបូងរាជធានីភ្នំពេញ សម្រេចចោទប្រកាន់ជនជនសង្ស័យ ប៉ា សុវណ្ណារិទ្ធ ពីបទ ហិង្សាដោយចេតនា តាមមាត្រា ២១៧ នៃក្រមព្រហ្មទណ្ឌ ។
យោងតាមមាត្រា ២១៧ នៃក្រមព្រហ្មទណ្ឌ បានបញ្ញត្តថា អំពើហិង្សាប្រព្រឹត្តដោយចេតនា លើអ្នកដទៃ ត្រូវផ្តន្ទាទោសដាក់ពន្ធនាគារពី១ (មួយ) ឆ្នាំ ទៅ ៣ (បី) ឆ្នាំ និងពិន័យជាប្រាក់ពី ២,០០០,០០០ (ពីរលាន) រៀល ទៅ ៦,០០០,០០០ (ប្រាំមួយលាន) រៀល ។
សូមជម្រាបដែរថា នាថ្ងៃទី២២កញ្ញានេះ នៅសាលាដំបូងរាជធានីភ្នំពេញ គេឃើញ វត្តមាននារីរងគ្រោះឈ្មោះ នួន គឹមឡាង ផងដែរ ដោយនាងបានទិញបាយ ១ប្រអប់ឲ្យទៅបុរសជាសង្សារដែលបង្កហិង្សាលើរូបនាង មុនចូលបន្ទប់តុលាការ ។
យ៉ាងនេះក្តី នារីរងគ្រោះឈ្មោះ នួន គឹមឡាង បានបញ្ជាក់តាមរយៈការផ្សាយវីដេអូផ្ទាល់ នៅល្ងាចថ្ងៃទី២២កញ្ញានេះថា រូបនាងមិនបានដកពាក្យបណ្ដឹងវិញទេ ។ យ៉ាងណាសំណុំរឿងមួយនេះនឹងត្រូវបន្តតាមនីតិវិធី នាថ្ងៃស្អែកទៀត ។
សូមរម្លឹកថា សមត្ថកិច្ចប៉ុស្តិ៍នគរបាលរដ្ឋបាលភ្នំពេញថ្មី នៅវេលាម៉ោង០៦និង០០នាទី ថ្ងៃទី២០ ខែកញ្ញា ឆ្នាំ២០២០ បានធ្វើការឃាត់ខ្លួនជនសង្ស័យម្នាក់ ករណីហិង្សាដោយចេតនា(ប្រើដៃវាយឲ្យរបួស) នៅចំណុចក្នុងបន្ទប់ជួលលេខ៤០១ ជាន់ទី៤ ផ្លូ១៩៧៦ ភូមិពោងពាយ សង្កាត់ភ្នំពេញថ្មី ខណ្ឌសែនសុខ ។ ជនសង្ស័យឈ្មោះ ប៉ា សុវណ្ណារិទ្ធ អាយុ២០ឆ្នាំ ជនជាតិខ្មែរ មុខរបរអ្នកដឹកអីវ៉ាន់ ស្នាក់នៅផ្ទះលេខ៥៦៣ ផ្លូវលំ ភូមិព្រៃជីសាក់ សង្កាត់ចោមចៅ១ ខណ្ឌពោសែនជ័យ (គ្មានសរធាតុញៀន) បានធ្វើសកម្មភាពប្រើដៃវាយភ្នែកជនរងគ្រោះ ឈ្មោះ នួន គឹមឡាង ភេទស្រី អាយុ២៥ឆ្នាំ ជនជាតិខ្មែរ មុខរបរស្នាក់នៅបន្ទប់ជួលលេខ៤០១ជាន់ទី៤ ផ្លូ១៩៧៦ ភូមិពោងពាយ សង្កាត់ភ្នំពេញថ្មី ខណ្ឌសែនសុខ (របួសហើមជាំភ្នែកទាំង២ និងគុំត្រចៀកខាងស្តាំ ៕
ចែករំលែកព័តមាននេះ