ខេត្តកំពង់ឆ្នាំង៖ សាលាដំបូងខេត្តកំពង់ឆ្នាំង កាលពីរសៀលថ្ងៃទី២០ កញ្ញា បានសម្រេចឃុំខ្លួនជនសង្ស័យជាកូនប្រុសម្នាក់ បន្ទាប់ពីបានធ្វើសកម្មភាពយកកាំបិតប៉័ងតោកាប់ក្បាលម្តាយបង្កើតខ្លួនចំនួន៣កាំបិត បណ្តាលឱ្យរងរបួសជាទម្ងន់ ។ សូមរំលឹកថា…
ខេត្តកំពង់ឆ្នាំង៖ សាលាដំបូងខេត្តកំពង់ឆ្នាំង កាលពីរសៀលថ្ងៃទី២០ កញ្ញា បានសម្រេចឃុំខ្លួនជនសង្ស័យជាកូនប្រុសម្នាក់ បន្ទាប់ពីបានធ្វើសកម្មភាពយកកាំបិតប៉័ងតោកាប់ក្បាលម្តាយបង្កើតខ្លួនចំនួន៣កាំបិត បណ្តាលឱ្យរងរបួសជាទម្ងន់ ។
សូមរំលឹកថា លោក ស្រី សុដា ប្រធានការិយាល័យប្រឆាំងការជួញដូរមនុស្ស និងការពារអនិតិជន នៃស្នងការដ្ឋាននគរបាលខេត្តកំពង់ឆ្នាំង កាលពីព្រឹកថ្ងៃទី២១ កញា បានប្រាប់ឱ្យដឹងថា៖ ជនសង្ស័យជាកូនមានឈ្មោះ ឃឹម ស៊ីណា ភេទប្រុស អាយុ២៨ឆ្នាំ មានទីលំនៅភូមិអូរកណ្តោល ឃុំជ្រៃបាក់ ស្រុករលាប្អៀរ ចំណែកម្តាយបង្កើត ជាជនរងគ្រោះ មានឈ្មោះ ជូ សុភ័ណ្ឌ ហៅភា អាយុ៥៥ឆ្នាំ ។
នៅថ្ងៃកើតហេតុ គឺនៅម៉ោង៩ និង៣០នាទីព្រឹកថ្ងៃទី១៩ កញ្ញា ឆ្នាំ២០២០ ជនរងគ្រោះជាម្តាយបានអង្គុយលើគ្រែក្រោមផ្ទះ ចំណែកជនដៃដល់ជាកូនដេកលើអង្រឹងនៅក្រោមផ្ទះដែរ ។ ពេលនោះ មានកូនប្រុសម្នាក់ទៀត ឈ្មោះ ឃឹម ម៉ានិច្ច អាយុ២៥ឆ្នាំ រៀបនឹងវិលទៅភ្នំពេញវិញ បានសួរទៅកាន់ប្អូនប្រុសរបស់ខ្លួនឈ្មោះ ឃឹម ស៊ីណា ថា៖ ហេតុម្តេចបានជាត្រឡប់ពីមណ្ឌលកែប្រែថ្នាំញៀនហើយមកវិញ នៅប្រើថ្នាំញៀនទៀត?ពេលនោះ ឈ្មោះ ឃឹម ស៊ីណា មិនឆ្លើយនោះទេ ហើយបន្ទាប់មក ឈ្មោះ ឃឹម ម៉ានិច្ច ក៏ចេញដំណើរត្រឡប់ទៅភ្នំពេញវិញបាត់ទៅ ។
ក្រោយពីឈ្មោះ ឃឹម ម៉ានិច្ច ជាបងចេញទៅភ្នំពេញបាត់ ឈ្មោះ ឃឹម ស៊ីណា ដែលកំពុងដេកអង្រឹងបានសម្លក់ទៅម្តាយចុះឡើងចុះឡើង បន្ទាប់មកបានទៅយកកាំបិតប៉័ងតោពីផ្ទះបាយ មកកាប់ក្បាលម្តាយខ្លួនឯង ចំនួន៣កាំបិត គឺចំថ្ពាល់ខាងស្តាំចំក្បាល និង ថ្ងាស់ បណ្តាលឱ្យរងរបួសធ្ងន់ ខណៈនោះក៍មានប្រជាពលរដ្ឋអ្នកជិតខាង បានចូលមកជួយអន្តរាគមន៍ និងនាំម្តាយទៅសង្គោះនៅមន្ទីរពេទ្យខេត្ត ។ ក្រោយពេលកើតហេតុ ជនដៃដល់ជាកូនបានរត់គេចខ្លួន តែត្រូវបានកម្លាំងសមត្ថកិច្ចនគរបាលមូលដ្ឋាន តាមចាប់បាននិងប្រគល់មកស្នងការដ្ឋាននគរបាលខេត្តដើម្បីកសាងសំណុំរឿង ។
លោក ស្រី សុដា បានបញ្ជាក់ថា៖ ឈ្មោះ ឃឹម ស៊ីណា ជាជនដៃដល់ គឺជាអ្នកធ្លាប់ប្រើថ្នាំញៀន ។ ក្នុងអំឡុងខែតុលា ឆ្នាំ២០១៩ ម្តាយបានយកទៅដាក់បណ្ឌលកែប្រែបន្សាបថ្នាំញៀន បាន៤ខែ។ ពេលចេញមកវិញ មិនដឹងថាបានកែប្រែឬឈប់ប្រើយ៉ាងណានោះទេ ប៉ុន្តែនៅពេលដែលបងប្រុសគ្រាន់តែសួរថា៖ម៉េចនៅបន្តប្រើទៀត ទើបសង្ស័យម្តាយជាអ្នកប្រាប់បង ទើបបណ្តាលឱ្យមានកំហឹង រួចក៍ស្ទុះទាញយកកាំបិតកាប់ម្តាយខ្លួនឯងបែបនេះទៅ ។ តាមសមត្ថកិច្ចបានបញ្ជាក់ជាចុងក្រោយថា៖ ជនដៃដល់ដល់ដំណាក់កាលបែកថ្នាំហើយ ទើបមិនស្គាល់ម្តាយជាអ្នកមានគុណបែបនេះ?
ចែករំលែកព័តមាននេះ