គ្រប់សាលារៀនទាំងអស់ត្រូវបង្កើនការអនុវត្តវិធានការ សុវត្ថិភាពសម្រាប់ការចូលរៀន
- សៀមរាប
ខេត្តសៀមរាប ៖ លោក ហង់ ជូនណារ៉ុន រដ្ឋមន្ត្រីក្រសួងអប់រំយុវជន និងកីឡា នាថ្ងៃទី៧ ខែកញ្ញា ឆ្នាំ២០២០នេះ…
ខេត្តសៀមរាប ៖ លោក ហង់ ជូនណារ៉ុន រដ្ឋមន្ត្រីក្រសួងអប់រំយុវជន និងកីឡា នាថ្ងៃទី៧ ខែកញ្ញា ឆ្នាំ២០២០នេះ…
ខេត្តសៀមរាប ៖ លោក ហង់ ជូនណារ៉ុន រដ្ឋមន្ត្រីក្រសួងអប់រំយុវជន និងកីឡា នាថ្ងៃទី៧ ខែកញ្ញា ឆ្នាំ២០២០នេះ បានចុះពិនិត្យមើលតាមសាលារៀនមួយចំនួននៅក្នុងខេត្តសៀមរាប ដែលបានបើកឱ្យសិស្សចូលរៀនថ្ងៃដំបូង ជាសំខាន់ផ្តោតទៅលើកុមារតូចៗ បន្ទាប់ពីបានបិទអស់មួយរយៈដោយសារតែវិបត្តិជំងឺកូវីដ-១៩ផងដែរ។ លោក ហង់ ជូនណារ៉ុន បានមានប្រសាសន៍ទៀតថា នៅថ្ងៃដំបូងនៃការបើកឱ្យសិស្សចូលរៀនឡើងវិញនេះ ឃើញថា នៅតាមសាលានានាក្នុងខេត្តសៀមរាប មានការអនុវត្តវិធានការសុវត្ថិ ភាពរបស់ក្រសួងសុខាភិបាលយ៉ាងតឹងរ៉ឹង និងបានល្អប្រសើរទៀតផង។
ប៉ុន្តែទោះជាយ៉ាងនេះក្តីលោកបានជំរុញ និងលើកទឹកចិត្តឱ្យគ្រប់គ្រឹះស្ថានសិក្សារដ្ឋទាំងអស់បង្កើនការអនុវត្តវិធានការសុវត្ថិភាព ដើម្បីបង្កាការឆ្លងមេរោគកូវីដ-១៩ ឱ្យកាន់តែល្អប្រសើរបន្ថែមទៀតដូចជាក្រៅពីការបាញ់ វាស់កម្ដៅ លាងអាកុល និងរក្សាគម្លាតពី១ម៉ែត្រ កន្លះទៅ២ម៉ែត្រ សុវត្ថិភាពត្រូវបង្កើតកន្លែងលាងដៃនឹងសាប៊ូឱ្យបានច្រើន ហើយលោកគ្រូ អ្នកគ្រូ ត្រូវធ្វើជាគំរូដល់សិស្ស ក្នុងការអនុវត្តនូវវិធានការអនាម័យ និងសុវត្ថិភាពជាមុន ដើម្បីឱ្យសិស្សក្លាយទៅជាទម្លាប់ ហើយពួកគាត់នឹងទៅបង្រៀនដល់ក្រុមគ្រួសារគាត់ឱ្យអនុវត្តវិធានការសុវត្ថិភាពនេះទៀតផងដែរ។
លោកបានបន្តថា ការចូលរៀនដំបូងនេះសម្រាប់ថ្នាក់រៀនមួយបន្ទប់អាចដាក់សិស្សឱ្យសិក្សាត្រឹមពី១៥នាក់ ទៅ២០នាក់ប៉ុណ្ណោះ ក្នុងនោះដែរសម្រាប់ថ្នាក់មធ្យមសិក្សាមានថ្នាក់ទី៩ និងថ្នាក់ទី១២ សិស្សត្រូវសិក្សាចំនួន១៨ម៉ោង ក្នុងមួយសប្ដាហ៍ រីឯចំណែកសិស្សបឋមសិក្សាចំនួន៨ម៉ោងក្នុងមួយសប្ដាហ៍ ដោយមានចែកជាបីក្រុមទៀតផង។ សាលារៀនបឋមសិក្សាវត្តបូព៌ ដែលជាសាលាគំរូទូទាំងប្រទេស ក្នុងថ្ងៃចូលរៀនដំបូងនេះដែរ យើងក៏សង្កេតឃើញមាតាបិតា អាណាព្យាបាលសិស្សបាននាំកូនៗរបស់ខ្លួនទៅកាន់សាលាប្រកបដោយទឹកចិត្តរីករាយ ប្រកបទៅដោយវិធានការក្នុងការការពារខ្ពស់ទៀតផង។
ក្នុងសកម្មភាពចូលរៀនថ្ងៃដំបូងនេះ លោកគ្រូ អ្នកគ្រូ បានយកចិត្តទុកដាក់ខ្ពស់ក្នុងការពិនិត្យតាមដាន ការពារ ដោយធ្វើការវាស់នូវកម្តៅ និងបាញ់អាល់កុលលាងសម្អាតដៃ មុនចូលទៅក្នុងថ្នាក់រៀន តែចំពោះសិស្សណា ដែលមានកម្តៅឡើងដល់៣៨អង្សា ត្រូវឱ្យទៅអង្គុយដាក់ដាច់ដោយឡែកពីគេ ដើម្បីរង់ចាំធ្វើការពិនិត្យវាស់កម្តៅសារជាថ្មីម្តងទៀត តែបើកម្តៅមិនបានចុះទេនោះ គឺមិនអនុញ្ញាតឱ្យចូលថ្នាក់រៀនឡើយ ព្រមទាំងធ្វើការបញ្ជូនទៅកាន់មន្ទីរពេទ្យទៀតផង។ ក្នុងនោះដែរក៏សង្កតឃើញមានការចូលរួមពីមាតាបិតា អាណាព្យាបាលសិស្ស ដើម្បីសុខភាពកូនៗរបស់ខ្លួន ក៏បានធ្វើការវេចខ្ចប់អាហារសម្រន់សម្រាប់កូនៗរបស់ខ្លួនភ្ជាប់មកជាមួយផងដែរ។
សូមបញ្ជាក់ថា រាជរដ្ឋាភិបាលបានប្រកាសបិទសាលារៀនទាំងអស់នៅទូទាំងប្រទេសនៅថ្ងៃទី១៤ ខែមីនា ឆ្នាំ២០២០ កន្លងទៅ ដោយសារវិបត្តិនៃជំងឺកូវីដ-១៩។ បន្ទាប់ពីស្ថានភាពជំងឺកូវីដ-១៩ បានធូរស្រាល ក្រសួង អប់រំយុវជន និងកីឡា បានជូនដំណឹងជា បន្តបន្ទាប់ ស្តីពីដំណើរការបើកសាលារៀនឡើងវិញ ជាបីដំណាក់កាលរួមមាន៖ ដំណាក់កាលទី១ សាលារៀន មានស្តង់ដារសុវត្ថិភាពខ្ពស់, ដំណាក់កាលទី២ សាលារៀនមានស្តង់ដាមធ្យម និង ដំណាក់កាលទី៣ សាលារៀនមានស្តង់ដារអប្បបរមា៕ ដោយ ៖ ច័ន្ទ រស្មី
ចែករំលែកព័តមាននេះ