រាជធានីភ្នំពេញ ៖ ការចរចារលើកិច្ចព្រមព្រៀងពាណិជ្ជកម្មសេរីទ្វេភាគីរវាងកម្ពុជា និងកូរ៉េ ដែលបានបញ្ចប់ការចរចានៅជុំទីកាលពីថ្ងៃទី៣ កញ្ញានេះ ធ្វើឱ្យកម្ពុជាទទួលបានការបើកច្រកទីផ្សារ ពីភាគីកូរ៉េធំជាងកម្ពុជាបើកច្រកទីផ្សារឱ្យកូរ៉េ លើការនាំចូលមុខទំនិញនាំចេញនាំចូលដោយរួចពន្ធ។ លោក ស៊ីម សុខខេង រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារចរចាលើកិច្ចព្រមព្រៀង ពាណិជ្ជកម្មសេរីជាមួយកូរ៉េបានឱ្យដឹងតាមបណ្តាញទំនាក់ទំនងសង្គមតេឡេក្រាមនៅថ្ងៃទី៤ កញ្ញានេះថា ការចរចាជុំទី២ នៃកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ (CKFTA) ត្រូវបានប្រារព្ធធ្វើឡើងតាមរយៈ ប្រព័ន្ធវីដេអូ ពីថ្ងៃទី៣១ ខែសីហា ដល់ថ្ងៃទី០៣ ខែកញ្ញា ឆ្នាំ២០២០ នៅលើ២ផ្នែកសំខាន់ៗ រួមមាន៖
១- ការចរចាបើកទីផ្សារ (Market Access) និង២-ការចរចាលើអត្ថបទនៃកិច្ចព្រមព្រៀង ដែលមានជំពូក៦ សំខាន់ៗ រួមមាន ពាណិជ្ជកម្មទំនិញ, ឧបាស្រ័យពាណិជ្ជកម្ម, វិធានដើមកំណើតទំនិញ, នីតិវិធីគយ និងកិច្ចសម្រួលពាណិជ្ជកម្ម សហប្រតិបត្តិការសេដ្ឋកិច្ច (បានបញ្ចប់) និងនីតិកម្មនិងស្ថាប័ន។ លោក ស៊ាង ថៃ មន្ត្រីអ្នកនាំពាក្យក្រសួងពាណិជ្ជកម្ម មានប្រសាសន៍ថា ការចរចានៅជុំទី១ ឬនៅជុំទី២នេះ យើងបានបែងចែកកិច្ចព្រមព្រៀងហើយយើងបានចាប់ផ្តើមចរចានៅចំណុចដែលមាននៅក្នុងនៃកិច្ចព្រមព្រៀងដែលបានឯកភាពគ្នាមាន ពាណិជ្ជកម្មផ្នែកទំនិញ សេវា ផ្នែកវិនិយោគ ហើយលទ្ធផលចរចា ដែលយើងបានកន្លងមកនេះវាយតម្លៃជាភាគរយទៅតាមជំពូកនីមួយៗ។
លោកបន្តថា« ក្នុងការចរចា នៅជុំទី២ដែលទើបបានចរចាបញ្ចប់នៅថ្ងៃទី៣ ខែកញ្ញាកន្លងទៅនេះ មានការចរចាលើការបើកច្រកទីផ្សារ។ បើយើងមានមុខទំនិញជាង១ម៉ឺនមុខ យើងឱ្យគេនាំចូលប៉ុន្មាន ហើយយើងនាំចេញទៅកូរ៉េប៉ុន្មាន0x017d7 អ៊ីចឹងនៅក្នុងការចរចានេះ ដោយសារប្រទេសកម្ពុជា បើយើងប្រៀបធៀបជាមួយកូរ៉េ យើងក្រជាងកូរ៉េ អ៊ីចឹងភាគីទាំងពីរបានឯកភាពថា កូរ៉េបើកច្រកទីផ្សារឱ្យបានធំជាងកម្ពុជាបើកឱ្យកូរ៉េ ហើយចាំធ្វើមុខទំនិញតាមក្រោយ»។ បើតាមមន្ត្រីអ្នកនាំពាក្យក្រសួងពាណិជ្ជកម្ម ការចរចាលើកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា កូរ៉េអាចឱ្យកម្ពុជានាំផលិតផលទៅទីផ្សារដោយរួចពន្ធដល់ជាង៩០% ខណៈកូរ៉េនាំចូលមកកម្ពុជា ដោយពន្ធប្រមាណ៨០%នៃផលិតផលសរុប។
លោក ស៊ាងថៃ មានប្រសាសន៍ថា «ខ្ញុំនាំទំនិញទៅ ប្រទេសអ្នកឯងឱ្យបានរួចពន្ធជាង៩០%មក ហើយខ្ញុំជូនអ្នកឯងឱ្យមកកម្ពុជាវិញតែជាង៨០%ទេ ហើយនៅសល់ប៉ុន្មានទៀតត្រូវជាប់ពន្ធ។ ឥឡូវនេះយើងមានការឯកភាពដោយកូរ៉េបានឱ្យយើង ជាង៩១%នៃមុខទំនិញអត់ត្រូវបង់ពន្ធ»។ ពាក់ព័ន្ធនឹងការចរចាលើកិច្ចព្រមព្រៀងពាណិជ្ជកម្ម សេរីខាងលើនេះ បើតាមលោក ស៊ាង ថៃ ការប្រជុំនៅជុំទី៣អាចនឹងចាប់ផ្តើមនៅចុងខែ៩ ឬដើមខែ១០។ ការចរចាអាចមានការប្រែប្រួលខ្លះៗ ប៉ុន្តែភាគីទាំងពីរបានប្តេជ្ញាចិត្តថានឹងធ្វើឱ្យបានចប់នៅក្នុងឆ្នាំ ២០២០នេះ។
ពិសេសបានការអនុញ្ញាតភ្លើងខៀវពីរាជរដ្ឋាភិបាលនៃប្រទេសរៀងៗខ្លួន ហើយរដ្ឋមន្ត្រីពណិជ្ជកម្មទាំងពីរប្រទេសដែលកាលពីពាក់កណ្តាលខែកក្កដាទៅនេះក៏បានប្តេជ្ញាចិត្តថាត្រូវធ្វើឱ្យបានសម្រេចនៅមុនបំណាច់ឆ្នាំនេះដែរ។ កិច្ចប្រជុំចរចាវាងកម្ពុជា និងកូរ៉េ បានដំណើរការកន្លងទៅ មាន៖ ថ្ងៃទី៩ កក្កដា រដ្ឋមន្ត្រីទាំងពីរប្រទេស ប្រកាសបើកការចរចា។ ថ្ងៃទី១៥ កក្កដា ក្រុមការងារជួបគ្នា warm-up, ថ្ងៃទី៣០-៣១ កក្កដា ចរចាជុំទី១, ថ្ងៃទី១១ សីហា ប្រជុំជាមួយវិស័យឯកជននិង ថ្ងៃទី៣១ សីហា ដល់ ៣កញ្ញា នឹងចរចាជុំទី២៕ ដោយ ៖ឡុង សារ៉េត
ចែករំលែកព័តមាននេះ