ខេត្តសៀមរាប ៖ បើតាមសេចក្តីរាយការណ៍បានឱ្យដឹងថា កម្លាំងសមត្ថកិច្ចចម្រុះបានចុះបិទទីតាំងក្លិបកម្សាន្ត «អេលីត» ទាំងយប់ ខណៈដែលកំពុងលួចលាក់បើកឱ្យភ្ញៀវចូលច្រៀងលេង ធ្វើឱ្យមានការភ្ញាក់ផ្អើលដល់ប្រជាពលរដ្ឋនៅក្នុងក្រុងសៀមរាប។
សេចក្តីរាយការណ៍បន្តថា ការចុះបិទទីតាំងខាងលើ គឺស្ថិតនៅក្នុងភូមិតាភុល សង្កាត់ស្វាយដង្គំ ក្រុងសៀមរាប ហើយត្រូវបានសមត្ថកិច្ចចម្រុះចុះបិទនៅវេលាម៉ោង៨យប់ថ្ងៃទី៣០ ខែសីហា ឆ្នាំ២០២០។
បើតាមប្រភពពីសមត្ថកិច្ចបាននិយាយប្រាប់ថា ក្រុមការងារសមត្ថកិច្ចចម្រុះ បានតាមដានអនុវត្តវិធានការ សុវត្ថិភាពទេសចរណ៍ ដើម្បីទប់ស្កាត់ការរីករាលដាលនៃជំងឺកូវីដ១៩ នៅ ខេត្តសៀមរាប រួមមាន៖ មន្ត្រីអធិការកិច្ចទេសចរណ៍ខេត្ត មន្ត្រីសុខាភិបាលខេត្ត បានចុះពិនិត្យ និងណែនាំឱ្យធ្វើកិច្ចសន្យាឱ្យផ្អាកអាជីវកម្មជាបណ្តោះអាសន្ននៅក្លិបកម្សាន្ត «អេលីត» (Elite Club) ដែលបើកដំណើរការ ដោយមិនទាន់មានការអនុញ្ញាតពីរដ្ឋបាលខេត្ត។
ប្រភពដដែលបានបន្តថា ការចុះបិទក្លិបកម្សាន្ត «អេលីត» (Elite Club) ដែលមានទីតាំងនេះ ស្ថិតក្នុងភូមិតាភុល សង្កាត់ស្វាយដង្គំ ក្រុងសៀមរាប នាពេលកន្លងទៅ ក្លិបមួយនេះបានបើកឱ្យភ្ញៀវចូលរាំលេងកម្សាន្តរហូតដល់ភ្លឺ បង្កការរំខានដល់បងប្អូនប្រជាពលរដ្ឋដែលរស់នៅជុំវិញសងខាងក្លិបនោះផងដែរ។
ចែករំលែកព័តមាននេះ