ខេត្តស្វាយរៀង ៖ បើតាមសេចក្តីរាយការណ៍បានឱ្យដឹងថា លោកគ្រូ អ្នកគ្រូ និងមាតាបីតាសិស្សនៅសាលាបឋមសិក្សា «ខ្ពបត្រាច» បានអំពាវនាវសុំសម្តេចអគ្គមហាសេនាបតីតេជោ ហ៊ុន សែន មេត្តាផ្តល់អគារមួយខ្នង០៤បន្ទប់ ដើម្បីឲ្យសិស្សានុសិស្សបានសិក្សាផង ដោយកន្លងមក សាលាខ្វះអគារសម្រាប់ឲ្យសិស្សសិក្សា។
សេចក្តីរាយការណ៍បន្តថា ការអំពាវនាវនេះធ្វើឡើងនៅព្រឹកថ្ងៃទី៦ ខែសីហា ឆ្នាំ២០២០ នៅសាលាបឋមសិក្សា «ខ្ពបត្រាច» ស្ថិតនៅភូមិខ្ពបត្រាច ឃុំជ្រៃធំ ស្រុករមាសហែក។
បើតាមលោកមុំ សាខន នាយកសាលាបឋមសិក្សាខ្ពបត្រាច បានឲ្យដឹងថា សាលាបឋមសិក្សាខ្ពបត្រាច មានគ្រូ៤នាក់ ក្នុងនោះស្រី២នាក់ ហើយគ្រូជាប់កិច្ចសន្យា២នាក់ ក្នុងនោះស្រីម្នាក់ ។ ចំណែកឯសិស្សានុស្សមានចំនួន១៥០នាក់ ក្នុងនោះស្រី៨១នាក់ មានអគារ២ខ្នង ក៏ប៉ុន្តែអគារ១ខ្នងចាស់ទ្រុឌទ្រោមមិនអាចឲ្យសិស្សចូលសិក្សាបាន ហើយក៏ត្រូវលោកស៊ូ ម៉ុល អភិបាលស្រុករមាសហែក បញ្ជាឲ្យបិទទ្វារខ្លាចរលំសង្កត់សិស្សផងដែរ។
ចំណែកអគារថ្មមួយខ្នងទៀតមាន៤បន្ទប់ ក្នុងនោះមួយបន្ទប់ធ្វើជាទីចាត់ការសាលា ដូច្នេះសល់តែ៣បន្ទប់តែប៉ុណ្ណោះ ហើយសិស្សមាន៦ថ្នាក់ គឺថ្នាក់ទី១ ថ្នាក់ទី២ ថ្នាក់ទី៣ ថ្នាក់ទី៤ ថ្នាក់ទី៥ និងថ្នាក់ទី៦ ចំណែកមតេយ្យសាលាគ្មានបន្ទប់សម្រាប់ដាក់សិស្សសិក្សានោះទេ។
លោកនាយកបន្តទៀតថា ដោយឆ្នាំសិក្សា២០២០-២០២១ មានសិស្សកើនឡើងទៀត និងជាពិសេសនៅពេលមានជំងឺកូវីដ១៩ នេះ ត្រូវការចាំបាច់អគារទូលាយ។ ម្យ៉ាងទៀតអគារសាលាបឋមសិក្សា «ខ្ពបត្រាច» គណៈកម្មាធិការបោះឆ្នោត និងអាជ្ញាធរយកអគារសាលាធ្វើជាការិយាល័យបោះឆ្នោត ចំនួន២ការិយាល័យ ដែលជាហេតុធ្វើឱ្យខ្វះអគារសិក្សា និងមតេយ្យសាលា ទើបលោកគ្រូ អ្នកគ្រូ និងមាតាបីតាសិស្សក្រុប្រឹក្សាឃុំ សូមអំពាវនាវសុំសម្តេចអគ្គមហាសេនាបតីតេជោ ហ៊ុន សែន មេត្តាផ្តល់អគារមួយខ្នងមាន៤បន្ទប់ ដើម្បីឱ្យសិស្សានុសិស្សបានបន្ទប់សិក្សាល្អផង ដោយអនុគ្រោះ៕
ចែករំលែកព័តមាននេះ