រាជធានីភ្នំពេញ ៖ បន្ទាប់ពីមានអ្នកភូមិជាច្រើនបានធ្លាក់ខ្លួនឈឺជាបន្តបន្ទាប់នៅភូមិមួយចំនួននៅសង្កាត់ប៉ោយប៉ែតនោះ នាថ្ងៃទី ២៣ កក្កដានេះ ក្រសួងសុខាភិបាលបានប្រកាសឲ្យដឹងថា មានការផ្ទុះឡើងជំងឺឈីកគង់ហ្គន់យ៉ា (Chikunngunya) ដែលហៅកាត់ថា…
រាជធានីភ្នំពេញ ៖ បន្ទាប់ពីមានអ្នកភូមិជាច្រើនបានធ្លាក់ខ្លួនឈឺជាបន្តបន្ទាប់នៅភូមិមួយចំនួននៅសង្កាត់ប៉ោយប៉ែតនោះ នាថ្ងៃទី ២៣ កក្កដានេះ ក្រសួងសុខាភិបាលបានប្រកាសឲ្យដឹងថា មានការផ្ទុះឡើងជំងឺឈីកគង់ហ្គន់យ៉ា (Chikunngunya) ដែលហៅកាត់ថា ឈីក (CHIK) នៅភូមិចំនួន ៦ នៃសង្កាត់ប៉ោយប៉ែត ខេត្តបន្ទាយមានជ័យ បន្ទាប់ពីមានអ្នកភូមិធ្លាក់ខ្លួនឈឺជាបន្តបន្ទាប់ ។
ក្រសួងបានបញ្ជាក់ថាចាប់ពីថ្ងៃទី ១៩ កក្កដា រហូតដល់ថ្ងៃទី ២២ កក្កដាម្សិលមិញនេះ ប្រជាពលរដ្ឋនៅភូមិអូរជ្រៅ ភូមិប៉ោយប៉ែត ភូមិព្រៃគប់ ភូមិអូរនាង និងភូមិអូរឬស្សី នៃសង្កាត់ប៉ោយប៉ែត មានចេញរោគសញ្ញា គ្រុនក្តៅ ៣៨ អង្សាសេ កន្តួលក្រហមលើស្បែក និងឈឺសន្លាក់ដៃជើង ។
ក្រុមឆ្លើយតបបន្ទាប់របស់ក្រសួងសុខាភិបាល មន្ទីរសុខាភិបាលខេត្តបន្ទាយមានជ័យ កម្មវិធីជាតិផ្តល់ថ្នាំបង្ការ ក្រុមគ្រូពេទ្យមណ្ឌលសុខភាព និងមន្ទីរពេទ្យប៉ោយប៉ែត សហការជាមួយអាជ្ញាធរមូលដ្ឋាន បានចុះស្រាវជ្រាវអង្កេតដល់ទៅភូមិទាំង ៦ ខាងលើ និងផ្ទះប្រជាពលរដ្ឋ ដែលមានបញ្ហា ដើម្បីពិនិត្យស្ថានភាពសុខភាពជាក់ស្តែងបានចំនួន ១៦៨ នាក់ (ស្រី ៩៥នាក់) និងបានបញ្ជួនបុគ្គលដែលមានបញ្ហាសុខភាព មកពិនិត្យនិងសម្រាកព្យាបាលនៅមណ្ឌលសុខភាពនានាចំនួន ៣២នាក់ ប៉ុន្តែបច្ចុប្បន្នស្ថានភាពសុខភាពពួកគាត់មានសភាពធូរស្បើយហើយ ។
ក្រសួងសុខាភិបាលបានបញ្ជាក់ថា ស្របតាមលក្ខណៈបចេ្ចកទេស ក្រុមការងារក៏បានប្រមូលសំណាកវត្ថុវិភាគឈាមចំនួន ២២ នាក់ (ស្រី១២នាក់) ដើម្បីធ្វើតេស្តវិភាគរកមើលវីរុសគ្រុនឈីក (CHIK) និងមើលរកវីរុសកញ្ជ្រិល-ស្អូច (Measles- Rubella) ចំនួន ៦០នាក់ (ស្រី ៣៧នាក់) និងយកសំណាកសម្រាប់ធ្វើតេស្តរកវីរុសកូវីដ ១៩ ចំនួន ២២ នាក់ (ស្រី ១១នាក់) ផងដែរ ។
សំណាកទាំងអស់យកមកធ្វើតេស្តនៅវិទ្យាស្ថានប៉ាស្ទ័រហើយ ចេញលទ្ធផលបឋមយប់ថ្ងៃទី ២២ កក្កដា គឺបង្ហាញសញ្ញាជំងឺគ្រុនឈីក ។ ជំងឺគ្រុនឈីក កើតដំបូងបំផុតនៅឆ្នាំ ១៩៥៣ នៅទ្វីបអាហ្វ្រិក និងធ្លាប់បានរកឃើញដំបូងនៅកម្ពុជាដោយវិទ្យាស្ថានប៉ាស្ទ័រកម្ពុជានៅឆ្នាំ ១៩៦១ និងឆ្នាំ ២០១១ ក៏មានការបញ្ជាក់ពីករណីជំងឺនេះ នៅខេត្តសៀមរាប បាត់ដំបង និងព្រះវិហារដែរ ហើយជំងឺគ្រុនឈីក ធ្លាប់មានអត្រាឆ្លងរោគខ្ពស់រហូតដល់ ៦០-៧០ % ក្នុងប្រទេសកម្ពុជានាទសវត្សទី ៦០ ហើយមានការរាតត្បាតខ្លាំងផងដែរ ក្នុងឆ្នាំ ២០១១-២០១២ នៅខេត្តព្រះវិហារ ខេត្តកំពង់ស្ពឺ រាជធានីភ្នំពេញ ខេត្តកំពង់ចាម ខេត្តតាកែវ រតនគិរី ស្ទឹងត្រែង កំពង់ធំ កណ្តាលនិងខេត្តកំពត ។
ក្រសួងបានបញ្ជាក់ថា ជំងឺនេះបង្កឡើងដោយវីរុសឈីក ហើយចម្លងតាមរយៈ «មូសខ្លាញីខាំ» ជាពិសេសខាំពេលថ្ងៃ ។ ភ្នាក់ងារចម្លងគឺសត្វមូសមួយប្រភេទក្រុម អាអេដេស ដែលជាភ្នាក់ងារចម្លងជំងឺគ្រុនឈាមផងដែរ ។
ក្រសួងបានបញ្ជាក់ថា «បច្ចុប្បន្ននេះ ក្រៅអំពីការទប់ស្កាត់នូវការចម្លងវីរុសកូវីដ-១៩ នៅក្នុងប្រទេសកម្ពុជា ការលេចឡើងនូវជំងឺគ្រុនឈីក សារជាថ្មីឡើងវិញនៅខេត្តបន្ទាយមានជ័យនេះ អាចជាបញ្ហាសុខភាពសាធារណៈមួយទៀត ដែលប្រឈមទៅ និងហានិភ័យអាចឲ្យមានការឆ្លងរាលដាលពីបុគ្គលម្នាក់ទៅបុគ្គលម្នាក់ ពីគ្រួសារមួយទៅគ្រួសារមួយ ពីភូមិមួយទៅភូមិមួយ ពីឃុំមួយទៅឃុំមួយទៀតជាដើម តាមរយៈមូសខ្លាញីខាំ ដែលចល័តពីកន្លែងមួយទៅកន្លែងមួយតាមមធ្យោយបាយធ្វើដំណើរផ្សេងៗ និងតាមទីកន្លែងដែលមិនមានអនាម័យបរិស្ថានស្អាតនិងទីកន្លែងដែលបង្កឲ្យមានជម្រកមូសខ្លាច្រើនជាដើម។ ជំងឺនេះអាចកើតមានលើមនុស្សគ្រប់វ័យ ទាំងក្មេង និងចាស់» ៕
ចែករំលែកព័តមាននេះ