រាជធានីភ្នំពេញ ៖ នៅពេលដែលកម្ពុជានឹងមានឈប់សម្រាកប្រាំថ្ងៃចាប់ពីថ្ងៃទី១៧ ខែសីហា ដល់ថ្ងៃទី២១នោះ វាជាឱកាសមួយសម្រាប់ប្រជាជនទាំងអស់ដើរលេងសប្បាយ និងជួយវិស័យទេសចរណ៍ក្នុងស្រុក ប៉ុន្តែវាក៏ជាពេលវេលាដែលត្រូវភ័យផងដែរ គឺអាចនឹងមានការរាលដាលកូវីដ-១៩ បើសិនជាយើងធ្វេសប្រហែស។ ក្រសូងសុខាភិបាលក៏អំពាវនាវហើយឲ្យប្រុងប្រយ័ត្នពេលឈប់សម្រាកនោះ ខណៈដែលប្រជាជនជាច្រើនអាចនឹង ធ្វើដំណើរកម្សាន្ត។ នៅថ្ងៃនេះ កម្ពុជារកឃើញចំនួន៥នាក់ទៀតក្នុងនោះមានខ្មែរបីនាក់ និងអាមេរិកពីរនាក់ បន្ទាប់ពីការរកឃើញចំនួន២៤នាក់ថ្មីក្នុងខែនេះដែរ។
វាបានធ្វើឲ្យចំនួនសរុបឡើងដល់១៧១នាក់។ មួយរយៈចុងក្រោយនេះ ការរកឃើញករណីថ្មីទាំងអស់នៃកូវីដ-១៩ គឺទាក់ទងនឹងការនាំចូល។ នេះបាន បញ្ជាក់អំពីសារសំខាន់នៃការត្រួតពិនិត្យតាមច្រកព្រំដែន និងតាមព្រលានយន្តហោះ។ ទន្ទឹមនោះក៏សំខាន់ណាស់ដែរ ដែលអ្នកធ្វើដំណើរមកពីក្រៅប្រទេសទាំងអស់ដែលមិនត្រូវបានរកឃើញមានកូវីដ-១៩ នៅពេលការធ្វើតេស្តចូលប្រទេស ត្រូវអនុវត្តឲ្យបានល្អបំផុតការដាក់ខ្លួនឯងនៅដោយ ឡែករយៈពេល១៤ថ្ងៃ ដើម្បីចៀសវាងការចម្លងមេរោគដល់អ្នកដទៃ។
ទន្ទឹមជាមួយគ្នានោះពលរដ្ឋកម្ពុជាទាំងអស់មិនត្រូវភ្លេចខ្លួន ខណៈដែលកូវីដ-១៩ នៅតែបន្តគំរាមកំហែងកម្ពុជា និងពិភពលោក។ នៅពេលមនុស្សធ្វើដំណើរ និងរស់នៅធម្មតា ការរស់នៅតាមគន្លងធម្មតាបែបថ្មីនឹងមានសារសំខាន់ ចាំបាច់ណាស់ដើម្បីទប់ស្កាត់ការឆ្លង និងការចម្លងកូវីដ-១៩។ ការលាងសម្អាតដៃ ការពាក់ម៉ាស និងគម្លាតសង្គមប្រហែលពីរម៉ែត្រជាវិធានការចាំបាច់ បំផុតដើម្បីប្រឆាំងកូវីដ-១៩៕ ដោយ ៖ សហការី
ចែករំលែកព័តមាននេះ