ខេត្តកំពង់ឆ្នាំង ៖ សហគមន៍នេសាទភូមិកំពង់អុស ស្ថិតក្នុងឃុំកំពង់អុស ស្រុកជលគិរី ត្រូវបានបង្កើតឡើងនៅឆ្នាំ២០១៧ ដែលមកដល់ពេលនេះមានរយៈពេលជាង៣ឆ្នាំហើយ ។ ប៉ុន្តែអ្វីដែលទទួលជាផ្លែផ្កានោះ គឺបន្ទាប់ពីសហគមន៍នេះកើតឡើង…
ខេត្តកំពង់ឆ្នាំង ៖ សហគមន៍នេសាទភូមិកំពង់អុស ស្ថិតក្នុងឃុំកំពង់អុស ស្រុកជលគិរី ត្រូវបានបង្កើតឡើងនៅឆ្នាំ២០១៧ ដែលមកដល់ពេលនេះមានរយៈពេលជាង៣ឆ្នាំហើយ ។ ប៉ុន្តែអ្វីដែលទទួលជាផ្លែផ្កានោះ គឺបន្ទាប់ពីសហគមន៍នេះកើតឡើង តំបន់អភិរក្សមេពូជត្រី ដែល គ្រប់គ្រងដោយសហគមន៍មួយនេះគឺសម្បូរដោយមេពូជត្រីគ្រប់ប្រភេទ អាចនិយាយបានថាមាននិ
រន្តរភាពមេពូជត្រីក្នុងតំបន់ល្អគួរជាទីពេញចិត្ត ។
អ្នកស្រី សំរឹទ្ធ ណុន ប្រធានសហគមន៍នេសាទកំពង់អុស បានឲ្យដឹងថា សមាគមបច្ចុប្បន្នមានសមាជិកចំនួន៣៤៥នាក់ ស្មើនឹង១៧៨គ្រួសារ ។ ជារៀងរាល់ឆ្នាំ នៅពេលរដូវប្រាំងចូលមកដល់ សហគមន៍បានរៀបចំការបង្ក្រាបបទល្មើសនេសាទនានា ដើម្បីរក្សាមេពូជត្រីនៅបឹងល្មុស ដែលមានផ្ទៃដីសរុបចំនួន៤៣ហិកតា ។
ផ្ទៃដីអភិរក្សមេពូជត្រីនេះ គឺមិនអនុញ្ញាតឲ្យប្រជាពលរដ្ឋបើកកាណូត ឬទូកឆ្លងកាត់ឡើយ លើក
លែងតែមានការចាំបាច់ ។ ចំពោះប្រជាពលរដ្ឋអាចអនុញ្ញាតឲ្យនេសាទបាន គឺមានចម្ងាយ១៥០ម៉ែត្រពីមាត់បឹងអភិរក្ស ។
ប៉ុន្តែកន្លងមក បទល្មើសនេសាទមិនត្រឹមតែនៅចម្ងាយប្រមាណ១៥០ម៉ែត្រពីមាត់បឹងទេ គឺលួចចូលមកនេសាទដល់ក្នុងបឹងអភិរក្សតែម្តង គឺចូលមកទាំងយប់ទាំងថ្ងៃ ។ ក្រុមជនខិលខូចទាំងនោះ បានប្រើឧបករណ៍ឆក់ ប្រើលបប្រឹស១០០ បង់សំណាញ់ និងដាក់មងជាដើម ។ កន្លងមក សហគមន៍ធ្លាប់ចាប់បានជាង២០ករណី ក្នុងនោះបទល្មើសឆក់២ករណី មិនរាងចាល(ធ្លាប់ចាប់អប់រំហើយនៅតែមិនកែប្រែ) បានបញ្ជូនទៅមន្ត្រីជំនាញ និងបន្តនីតិវិធីដល់តុលាការ ដែល
កំពុងជាប់ពន្ធនាគារសព្វថ្ងៃ ។ ក្រៅពីនោះ ចាប់បានយកមកអប់រំ និងធ្វើកិច្ចសន្យាចំពោះមុខអាជ្ញាធរភូមិ ឃុំ ។
អ្នកស្រីប្រធានសហគមន៍នេសាទ បានមានប្រសាសន៍ដោយមោទនភាពថា ចាប់តាំងពីកើតសហគមន៍នេសាទមក ផ្ទៃទឹកបឹងល្មុសជាង៤៣ហិកតា បានសម្បូរដោយមេពូជត្រីចម្រុះដូចជា ត្រីឆ្តោ ត្រីសណ្តាយ ត្រីច្រកែង ត្រីប្រមា ត្រីឆ្លាំង និងត្រីជាច្រើនទៀត ។ មេពូជត្រីទាំងនោះហាក់ដឹងជម្រករបស់ខ្លួន ពេលដល់រដូវប្រាំង វានឹងរត់មកជ្រកនៅកន្លែងអភិរក្សតែម្តង ។
ចំពោះការងារររបស់សមាជិកសហគមន៍ សព្វថ្ងៃក្រៅពីការងារដាក់វេនគ្នាយាមយប់យាមថ្ងៃ សហគមន៍នូវបានរៀបចំបោះបង្គោលរាយខ្សែលួស ដើម្បីដាក់ពង្រាយមិនឱ្យមានបទល្មើសចូលមក ។ ពេលខ្លះខ្យល់បោកបក់ដួលបង្គោល សហគមន៍បានចុះដាំឡើងវិញជាដើម ។
ជាចុងក្រោយ អ្នកស្រីសំណូមពរដល់អង្គការនានាដែលធ្លាប់ផ្តល់ជំនួយផ្នែកវិស័យជលផល សូមមេត្តាជួយដល់សហគមន៍របស់អ្នកស្រីផង និងសំណួមពរដល់អាជ្ញាធរ រាជរដ្ឋាភិបាល សូមមេត្តាជួយផ្តល់ថវិកាដល់សហគមន៍ ក្នុងការការពារតំបន់អភិរក្សមេពូជត្រីក្នុងភូមិកំពង់អុសនេះ ដើម្បីទុកដល់កូនចៅជំនាន់ក្រោយ ។
សូមបញ្ជាក់ថា បឹងល្មុសមានផ្ទៃបឹងធំល្វឹងល្វើយ ស្ថិតនៅក្នុងភូមិកំពង់អុស ស្រុកជលគិរី ជាប់ជាមួយនឹងឃុំគោកបន្ទាយ ស្រុករលាប្អៀរ និងជាប់ព្រំប្រទល់ជាមួយក្រុងកំពង់ឆ្នាំងផងដែរ ។វិសាលភាពផ្ទៃបឹងធំល្វឹងល្វើយបែបនេះ ពិតជាពិបាកក្នុងការការពារមែន ៕
ចែករំលែកព័តមាននេះ