រាជធានីភ្នំពេញ៖ រយៈពេលប៉ុន្មានឆ្នាំចុងក្រោយនេះ វិស័យអចលនទ្រព្យនៅកម្ពុជាមានការរីកចំរើនយ៉ាងខ្លាំង ដោយការវិនិយោគពីក្រៅប្រទេសផងនិងការវិនិយោគដោយវិនិយោគិនក្នុងស្រុកផងដែរ ដែលនាំឲ្យតំលៃដីធ្លីក៏បានកើនឡើងយ៉ាងគំហុក ជាពិសេសតំបន់ជាយៗក្រុងភ្នំពេញនិងបណ្តាខេត្តមួយចំនួន ដូចជាខេត្តព្រះសីហនុ ជាដើម ។ យ៉ាងណាមិញ…
រាជធានីភ្នំពេញ៖ រយៈពេលប៉ុន្មានឆ្នាំចុងក្រោយនេះ វិស័យអចលនទ្រព្យនៅកម្ពុជាមានការរីកចំរើនយ៉ាងខ្លាំង ដោយការវិនិយោគពីក្រៅប្រទេសផងនិងការវិនិយោគដោយវិនិយោគិនក្នុងស្រុកផងដែរ ដែលនាំឲ្យតំលៃដីធ្លីក៏បានកើនឡើងយ៉ាងគំហុក ជាពិសេសតំបន់ជាយៗក្រុងភ្នំពេញនិងបណ្តាខេត្តមួយចំនួន ដូចជាខេត្តព្រះសីហនុ ជាដើម ។
យ៉ាងណាមិញ មិនមែនគ្រប់គ្នាចេញទៅវិនិយោគដីធ្លីសុទ្ធតែបានចំណេញនោះទេ ។ លោក ង៉ែត ជូ ទីប្រឹក្សាសេដ្ឋកិច្ចមួយរូបនិងជាអ្នកជំនាញអចលទ្រព្យបានចង្អុលបង្ហាញថា «កំហុសឆ្គង៦យ៉ាង» ដែលធ្វើអោយការវិនិយោគដីធ្លីមិនទទួលបានភាពជោគជ័យ ។ ដែលកំហុសឆ្គងទាំង ៦ យ៉ាងមានដូចជា៖
១- ចង់បានផលចំណេញក្នុងរយៈពេលខ្លី៖ តាមគោលការណ៍គណនេយ្យ ដីធ្លី និងប្រភេទអចលនទ្រព្យទាំងអស់ត្រូវបានចាត់ទុកថាជាទ្រព្យរយៈពេលវែងដែលអាចបង្វិលជាសាច់ប្រាក់វិញក្នុងរយៈពេលយ៉ាងតិច១ឆ្នាំ។ ប៉ុន្តែមានអ្នកវិនិយោគជាច្រើនមិនយល់ពីគោលការណ៍នេះហើយបន្ទាប់ពីវិនិយោគរួចតែងទន្ទឹងចង់បានផលចំណេញភ្លាមៗ។ ហើយជារើយៗយើងតែងឮពាក្យថា រកស៊ីអចលនទ្រព្យឬដីធ្លីមិនល្អទេព្រោះកប់លុយ។ តាមពិតមិនកប់លុយទេមកពីអ្នកវិនិយោគរំពឹងខុស និងគ្មានផែនការវិនិយោគរយៈពេលវែង។
២- ចង់បានលំហូរសាច់ប្រាក់ (ចំណូល) ពីការវិនិយោគ៖ បន្ថែមលើពេលវេលារយៈពេលវែង ការវិនិយោគលើដីធ្លីត្រូវការដើមទុនច្រើន អ្នកវិនិយោគខ្លះមានទុនតិចតួចហើយប្រាថ្នាចង់បានលំហូរសាច់ប្រាក់ពីការជួលដី ការណ៍នេះមិនអាចសំរេចបាននោះទេ។ ទោះបីជួលជាដីទទេ ធ្វើជាឃ្លាំង ឬជាតូបជួល ក៏ត្រូវការដើមទុនយ៉ាងតិចចន្លោះពី១០-២០ម៉ឺនដុល្លាដែរ។
៣- ខ្វះផែនការហិរញ្ញវត្ថុ៖ ដោយសារតែចង់បានចំណូល និងផលចំណេញរយៈពេលខ្លី អ្នកវិនិយោគជាច្រើនមិនបានធ្វើផែនការហិរញ្ញវត្ថុសំរាប់រយៈពេលវែងនោះទេ។ ការណ៍នេះហើយដែលនាំអោយពួកគេឆ្លាក់ក្នុងវិបត្តិលំហូរសាច់ប្រាក់ និងឈានដល់ដំណាក់កាលបង្ខំចិត្តលក់ខាតផងក៏មាន។
៤- ខ្វះយន្តការទប់ទល់នឹងហានិភ័យ៖ ការវិនិយោគលើដីធ្លីត្រូវការដើមទុនច្រើន និងរយៈពេលវែង ដូច្នេះអ្នកវិនិយោគត្រូវកំណត់នូវយន្តការនានាដើម្បីទប់ទល់នឹងហានិភ័យដែលកើតឡើងជាយថាហេតុ។ យន្តការរួមមានបង្កើតចំណូលពីប្រភពផ្សេងៗ អភិវឌ្ឍគំរោងនានា ឬត្រៀមលក់ទ្រព្យសម្បត្តិដែលមិនកើនតម្លៃនាពេលអនាគត។
៥- មិនមានចំណេះដឹងគ្រប់គ្រាន់៖ អ្វីដែលបានរៀបរាប់ក្នុងចំណុចទី១ ទី២ ទី៣ និងទី៤ ខាងលើសុទ្ធតែជាចំណេះដឹងចាំបាច់។ ប៉ុន្តែបន្ថែមលើនេះ អ្នកវិនិយោគត្រូវមានការយល់ដឹងផ្សេងៗទៀតដូចជាប្រភេទដី ទំហំ ទំរង់ ទីតាំង និងលក្ខខណ្ឌច្បាប់នានា។ល។ ជាងនេះទៅទៀតត្រូវមានការយល់ដឹងថាលក្ខខណ្ឌដីបែបហ្នឹង ទំរង់បែបហ្នឹង ទីតាំងបែបហ្នឹង តម្លៃប៉ុណ្ណឹងវាសមនឹងយកទៅអភិវឌ្ឍជាអ្វី? ហើយអ្នកណាជាអតិថិជន? សរុបមក អ្នកវិនិយោគ ត្រូវមានចំណេះដឹងលម្អិត ហើយចាត់ទុកការវិនិយោគជាអាជីពទើបជាការល្អ។ បើវិនិយោគតាមគេតាមឯង ឬទិញដីបន្តិចបន្តួចទុកយកចំណេញ នោះឱកាសជោគជ័យមានតិចណាស់។
៦- ខ្វះព័ត៌មាន៖ នៅក្នុងការវិនិយោគវិស័យដីធ្លីក៏ដូចជាការធ្វើអាជីវកម្មនានាដែរ ទាមទាអោយអ្នកមានព័ត៌មានគ្រប់ជ្រុងជ្រោយ។ ដូចជាស្ថានភាពតំរូវការ និន្នាការទីផ្សារ តម្លៃ ទីតាំងភូមិសាស្ត្រ ទំនាក់ទំនងជាមួយអាជ្ញាធរមូលដ្ឋាន គំរោងអភិវឌ្ឍហេដ្ឋារចនាសម្ពន្ធ័នានា។ល។ ដូច្នេះ អ្នកត្រូវផ្តោតការវិនិយោគតែលើតំបន់ដែលអ្នកអាចក្តោបបានព័ត៌មានគ្រប់ជ្រុងជ្រោយ ៕
ចែករំលែកព័តមាននេះ