ប្រសិនបើមានមនុស្សម្នាក់លើលោកនេះដែលយល់ដឹងច្បាស់ពីសារៈសំខាន់នៃការបង្រៀនកូនៗពីទំនួលខុសត្រូវហិរញ្ញវត្ថុនោះ គឺប្រាកដជាលោកមហាសេដ្ឋី វ៉ារេន បាហ្វេត (Warren Buffett) ហើយ ។ មុនពេលដែលលោកបានក្លាយជានាយកប្រតិបត្តិរបស់ក្រុមហ៊ុន Berkshire…
ប្រសិនបើមានមនុស្សម្នាក់លើលោកនេះដែលយល់ដឹងច្បាស់ពីសារៈសំខាន់នៃការបង្រៀនកូនៗពីទំនួលខុសត្រូវហិរញ្ញវត្ថុនោះ គឺប្រាកដជាលោកមហាសេដ្ឋី វ៉ារេន បាហ្វេត (Warren Buffett) ហើយ ។ មុនពេលដែលលោកបានក្លាយជានាយកប្រតិបត្តិរបស់ក្រុមហ៊ុន Berkshire Hathaway វិនិយោគិនដ៏អស្ចារ្យម្នាក់នេះបានចាប់ផ្តើមអាជីវកម្មតូចៗជាច្រើនតាំងពីលោកមានអាយុ ៦ឆ្នាំមក ។
លោកធ្លាប់បាននិយាយក្នុងបទសម្ភាសន៍មួយជាមួយនឹង CNBC កាលពីឆ្នាំ ២០១៣ ថា «ឪពុករបស់ខ្ញុំគឺជាអ្នកជំរុញទឹកចិត្តខ្ញុំជាងគេ ។ អ្វីដែលខ្ញុំបានរៀនពេលនៅវ័យក្មេងពីឪពុកខ្ញុំ គឺការមានទម្លាប់ដែលត្រឹមត្រូវពីវ័យក្មេងទៅ ។ ការសន្សំលុយ គឺជាមេរៀនសំខាន់មួយដែលឪពុកខ្ញុំបានបង្រៀនដល់ខ្ញុំ» ។
ក្រៅពីនេះហើយ លោកបានចែករំលែកមកទៀតថា ពេលខ្លះឪពុកម្តាយចាំដល់កូនៗធំសិនទើបពួកគេចាប់ផ្តើមនិយាយពីការគ្រប់គ្រងលុយទោះជាពួកគេអាចបង្រៀនកូនៗទាំងពីនៅថ្នាក់មេត្តយ្យពិតមែនក្តី ។
ការសិក្សាមួយពីសាកលវិទ្យាល័យ Cambridge University បានប្រទះឃើញថា ក្មេងៗអាចយល់ដឹងពីមេរៀនទាក់ទិននឹងលុយងាយៗតាំងពីអាយុរវាង៣ទៅ ៤ឆ្នាំមកម្ល៉េះ ។
ខាងក្រោមនេះ គឺជាឧទាហរណ៍នៃមេរៀនមួយចំនួនដែលអ្នកអាចបង្រៀនដល់កូនៗបាន ៖
១. វិធីធ្វើជាអ្នកគិតដែលមានភាពបត់បែនខ្ពស់
គោលដៅនៃមេរៀននេះ គឺដើម្បីបង្រៀនកូនៗមិនឲ្យបោះបង់ចោលបន្ទាប់ពីពួកគេបានបរាជ័យលោកដំបូង ។ សមត្ថភាពក្នុងការគិតដោយមានភាពច្នៃប្រឌិតខ្ពស់នេះនឹងមានប្រយោជន៍ណាស់ពេលដែលពួកគេប្រឈមមុខនឹងបញ្ហាលុយនៅថ្ងៃអនាគត ។
សកម្មភាពមួយដែលអ្នកអាចយកមកប្រើដើម្បីបង្រៀនមេរៀននេះបានគឺការឲ្យកូនៗកែច្នៃសម្រាមដូចជាគម្របដប ឬប្រអប់ទទេ ទៅជារបស់ប្រើប្រាស់ជាដើម ។
២. វិធីចាប់ផ្តើមសន្សំលុយ
ដើម្បីជួយឲ្យកូនៗរៀនពីការគ្រប់គ្រងលុយ អ្នកត្រូវបង្រៀនពួកគេពីភាពខុសគ្នារវាងការចង់បាន និងតម្រូវការ ។ អ្នកអាចបង្កើតតារាងមួយដោយរាយឈ្មោះរបស់ដែលកូនរបស់អ្នកចង់ទិញ បន្ទាប់មកបកស្រាយប្រាប់ពួកគេម្តងមួយៗថាវាជាការចង់បាន ឬតម្រូវការ ។ ឧទាហរណ៍ដូចជារបស់លេងថ្មីជាការចង់បាន ខណៈដែលកាតាបថ្មីជាតម្រូវការជាដើម ។
៣. វិធីធ្វើការសម្រេចចិត្តឲ្យបានល្អ
គន្លឹះនៃការសម្រេចចិត្តបានល្អគឺការគិតពីផលប៉ះពាល់ដែលជម្រើសនីមួយៗអាចបង្កនៅថ្ងៃអនាគត ។ លោកបាហ្វេតផ្តល់យោបល់ឲ្យឪពុកម្តាយនិយាយប្រាប់កូនៗពីការសម្រេចចិត្តរបស់ពួកគេដើម្បីធ្វើជាគំរូល្អដល់កូនៗ ។ ឧទាហរណ៍ដូចជា អ្នកសម្រេចចិត្តមិនទិញទូរទស្សន៍ថ្មីព្រោះ ម៉ាស៊ីនត្រជាក់ក្នុងផ្ទះបានខូច ៕
ចែករំលែកព័តមាននេះ