មានមូលហេតុល្អៗជាច្រើនណាស់ដែលបង្ហាញថាអ្នកគួរតែចាប់ផ្តើមអាជីវកម្មផ្ទាល់ខ្លួន ព្រោះអ្នកអាចធ្វើជាចៅហ្វាយខ្លួនឯង មានឯករាជ្យភាព មានពេលសម្រាប់ការងារដែលខ្លួនស្រលាញ់ និងមានម៉ោងធ្វើការដែលបត់បែនបានជាដើម។
អ្នកស្រីស៊ូស៊ី ម៉ូរ (Susie Moore) ដែលជាអ្នកនិពន្ធ និង គ្រូបង្វឹកផ្នែកអាជីវកម្មម្នាក់គិតថា ពេលនេះជាពេលដែលងាយបំផុតហើយក្នុងការចាប់ផ្តើមអាជីវកម្មមួយ។ អ្នកស្រីបាននិយាយថា ព្រោះតែពិភពលោកបានផ្អាកដំណើរការនាពេលបច្ចុប្បន្ននេះ វាកំពុងតែធ្វើឲ្យមនុស្សជាច្រើនពិចារណាលើអ្វីដែលពួកគេចង់បាននៅថ្ងៃអនាគត។
មុនពេលការផ្ទុះជំងឺកូវីដ ១៩ ឃ្លាថា ខ្ញុំមិនមានពេល គឺជាការដោះសារទូទៅដែលមនុស្សភាគច្រើនប្រើដើម្បីមិនចាប់ផ្តើមអឫជីវកម្ម ឬការងារក្រៅម៉ោងដទៃ។ ប៉ុន្តែបច្ចុប្បន្ននេះវាមិនអាចជាការដោះសារបានទៀតទេ។ សម្រាប់អ្នកដែលកំពុងពិចារណាលើការចាប់ផ្តើមអាជីវកម្ម អ្នកស្រីបានផ្តល់យោបល់ឲ្យគិតពីចំណុចសំខាន់ៗខាងក្រោមនេះ៖
១. សួរសំណួរសំខាន់ៗជាមុនសិន
ពេលដែលអ្នកចាប់ផ្តើមអាជីវកម្មមួយ អ្នកគួរតែប្រើជំនាញ ឬចំណេះដឹងដែលអ្នកមានស្រាប់។ ដូច្នេះអ្នកត្រូវដឹងថាតើអ្នកមានអ្វីខ្លះក្នុងខ្លួនដែលអាចជួយឲ្យអាជីវកម្មអ្នកមានភាពខុសពីដៃគូប្រកួតប្រជែងដទៃក្នុងទីផ្សារ។ ជំនាញសំខាន់ៗរួមមានដូចជាការគ្រប់គ្រងប្រព័ន្ធសង្គម ជំនាញបង្វឹកអ្នកដទៃ ជំនាញអាជីវកម្ម ការបង្រៀន និងការច្នៃម៉ូដជាដើម។
បន្ទាប់មកទៀតអ្នកត្រូវសួរខ្លួនឯងថាតើវាមានទីផ្សារទេ? តើមានមនុស្សដទៃដែលកំពុងតែលក់វាទេ? ទោះជាមានអ្នកលក់ហើយពិតមែនក្តី វាអាចល្អសម្រាប់អ្នកព្រោះវាមានន័យថាមានអ្នកទិញផលិតផល ឬសេវាកម្មដែលអ្នកចាប់អារម្មណ៍លើ។
២. វត្តមានអនឡាញ
ការផ្ទុះជំងឺកូវីដ១៩ បានបង្ខំឲ្យអាជីវកម្មជាច្រើនប្តូរទៅប្រកបអាជីវកម្មតាមអ៊ីនធើណែតវិញ ហើយអ្នកក៏គួរតែពិចារណាលើជម្រើសនេះដែរ។ ការមានវត្តមានលើប្រព័ន្ធសង្គមនឹងជួយឲ្យអ្នកផ្សព្វផ្សាយផលិតផលទៅដល់អតិថិជន។
៣. បង្កើនអ្នកគាំទ្រ
អ្នកមិនគួរសន្មត់ថាមនុស្សដឹងពីអាជីវកម្មរបស់អ្នកព្រោះអ្នកបានប្រកាសពីវាលើប្រព័ន្ធសង្គមម្តង ឬពីរដងហើយមកទេ។ ផ្ទុយមកវិញ អ្នកត្រូវតែមានភាពសកម្មក្នុងការផ្សព្វផ្សាយទៅដល់មនុស្សដែលអ្នកស្គាល់។ ប្រសិនបើអ្នកចង់បង្កើនតម្រូវការភ្លាមៗ អ្នកអាចប្រើកម្មវិធីលក់ផ្សេងៗដូចជាការលក់បញ្ចុះតម្លៃជាដើម។
ចែករំលែកព័តមាននេះ