ខេត្តកំពត ៖ រថយន្តកូរ៉េចំណុះ៥តោនមួយគ្រឿង ពាក់ស្លាកលេខព្រៃវែង 2A-0495 មានលួចដឹកឈើប្រភេទធ្នង់ជាច្រើនម៉ែត្រគូបតាមបណ្តោយផ្លូវក្រាលកៅស៊ូចេញពីស្រុកជុំគិរី សំដៅមកកាត់ស្រុកឈូក រួចឆ្លងចូលទៅលក់នៅប្រទេសវៀតណាម តាមច្រកតន់ហន់ ត្រូវកម្លាំងកងរាជអាវុធហត្ថខេត្តធ្វើការស្ទាក់ចាប់បាន កាលពីម៉ោង០២ថ្ងៃទី០១ ធ្នូ ២០១៥ រួចនាំមកកាន់ទីបញ្ជាការកងរាជអាវុធហត្ថខេត្ត ដើម្បីបញ្ជូនទៅកាន់ខណ្ឌរដ្ឋបាលព្រៃឈើ ។
ប្រភពបានឱ្យដឹងថា ក្នុងការបង្ក្រាបនេះ កម្លាំងបានធ្វើការឃាត់ខ្លួនមនុស្ស៣នាក់ ១-ឈ្មោះរេត ពៅ អាយុ៣៥ឆ្នាំ (អ្នកបើកបរ) ២-ឈ្មោះកិច ឃិន អាយុ៣៥ឆ្នាំ និង៣-ឈ្មោះទុយ ប្រុស អាយុ២២ឆ្នាំ ជាព្រូឡាន ទាំង៣នាក់មានទីលំនៅស្រុកថ្ពង ខេត្តកំពង់ស្ពឺ ។
យោងតាមប្រសាសន៍លោកឧត្តមសេនីយ៍ត្រី ទេព វណ្ណា មេបញ្ជាការកងរាជអាវុធហត្ថបានឱ្យដឹងថា ដោយមានប្រភពពីប្រជាពលរដ្ឋនៅភូមិ-ឃុំខាងលើថា មានឈ្មួញរកស៊ីឈើខុសច្បាប់តែងតែឆក់ឱកាសលួចដឹកឈើប្រណីតតាមរថយន្តធុនធំឆ្លងកាត់តាមផ្លូវខាងលើជាញឹកញាប់ លោកក៏បានទំនាក់ទំនងរាយការណ៍ជូនទៅព្រះរាជអាជ្ញា ដើម្បីឱ្យលោកជួយចុះអន្តរាគមន៍ក្នុងការបង្ក្រាបឈើខុសច្បាប់ខាងលើនេះ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ