នាំ​គ្នា​ចូល​លួច​ព្រះ​ក្នុង​វត្ត តែ​បែរជា​រត់​មិន​រួច​ចប់​របស់​សមត្ថកិច្ច​ដដែល


ខេត្តព្រៃវែង ៖ ជនសង្ស័យ​ចំនួន​២​នាក់​ត្រូវ​បាន​សមត្ថកិច្ច​ស្រុក​ព្រះស្ដេច ស្ទាក់​ចាប់​បាន រួម​ជាមួយ និង​វត្ថុ​តាង​ព្រះ​ជា​ច្រើន​អង្គ​ដែល​ពួក​គេ​បាន​លួច​ពី​ក្នុង​វត្ត ។ សកម្មភាព​ស្ទាក់​ចាប់​ក្រុម​ជនសង្ស័យ​ខាងលើ​បាន​ធ្វើ​ឡើង​នៅ​វេលា​ម៉ោង​12​និង​30​នាទី​ថ្ងៃ​ទី​៣ កក្កដា នៅ​លើ​កំណាត់​ផ្លូវជាតិ​លេខ​១ ក្នុងភូមិ​ក្រាំង​ក្អុក ឃុំ​កំពង់​សឹង ស្រុក​ព្រះស្ដេច ខេត្តព្រៃវែង ។

ជនសង្ស័យ​ទាំង​២​នាក់ ទី​១​ឈ្មោះ សាម វី ភេទ​ប្រុស អាយុ​៣៩​ឆ្នាំ និង​ទី​២ ឈ្មោះ គង់ ហ្វា​រឹត ភេទ​ប្រុស អាយុ​៣៦​ឆ្នាំ អ្នក​ទាំង​២​មាន​ទីលំនៅ​ក្នុងភូមិ​សាលា​បឹង​ឈូក សង្កាត់​គីឡូម៉ែត្រ​លេខ 6 ខណ្ឌ​ឬ​ស្សី​កែវ រាជធានី​ភ្នំពេញ ចំណែក​វត្ថុ​តាង​ដែល​ជនសង្ស័យ​លួច​បាន គឺ​ព្រះពុទ្ធ​បដិមាករ​ចំនួន 14 អង្គ ។

ប្រភព​ព័ត៌មាន​ពី​សមត្ថកិច្ច​ស្រុក​ព្រះស្ដេច​បាន​ឲ្យ​ដឹង​ថា នៅ​មុន​ពេល​កើតហេតុ​នោះ​ជនសង្ស័យ​ទាំង​២ បាន​ជិះ​ផាស់​អាប់​ចូល​ទៅ​ក្នុង​វត្ត​ព្រៃ​ច្បារ ដែល​ស្ថិត​នៅ​ក្នុងភូមិ​ស្រះ​ថ្កូវ ឃុំ​កំពង់​សឹ​ង្ហ ស្រុក​ព្រះស្ដេច និង​បាន​ឡើង​ទៅ​លើ​កុ​ដ្ឋ​ចៅអធិការ​វត្ត គាស់​ទំលាយ​ទូ​ប្រមូល​យក​បាន​ព្រះពុទ្ធ​បដិមាករ​ចំនួន 14 អង្គ ហើយ​បាន​រត់គេច​ខ្លួន​បាត់ ប៉ុន្តែ​ភ្លាម​នោះ​ព្រះ​គ្រូ​ចៅអធិការ​វត្ត​បានដឹង ហើយ​ក៏​បាន​រាយការណ៍​ប្ដឹង​ទៅ​សមត្ថកិច្ច​ប៉ុស្តិ៍​រដ្ឋបាល​ភ្លាម​ទើប​កម្លាំង​ប៉ុស្តិ៍​រដ្ឋបាល​ឃុំ​កំពង់​សឹ​ង្ហ សហការ​ជាមួយនឹង​កម្លាំង​ប្រជា​ការពារ​នាំ​គ្នា​ពួនស្ទាក់​នៅ​លើ​កំណត់​ផ្លូវជាតិ​លេខ 1 ហើយ​ក៏​ធ្វើការ​ចាប់​ឃាត់ខ្លួន​ជនសង្ស័យ​បាន រួម​ទាំង​វត្ថុ​តាង​ជាក់ស្តែង​តែ​ម្តង ។

បច្ចុប្បន្ន​ជនសង្ស័យ​ទាំង​២ ត្រូវ​បាន​ឃាត់ខ្លួន​នៅ​អធិការដ្ឋាន​នគរបាល​ស្រុក​ព្រះស្តេច ហើយ​សមត្ថកិច្ច​កំពុង​កសាង​សំណុំរឿង​ចាត់ការ​ទៅ​តាម​និ​តិ​វិធី ៕

Facebook Google Twitter Email

Live

Sponsored News

ការស្ទង់មតិគេហទំព័រថ្មី




សូម​អរគុណ