ក្រុងប៉ោយប៉ែត ៖ ទឹកអូរព្រំដែននៅចំណុចម៉ុងចិន ក្នុងភូមិគីឡូម៉ែត្រលេខ៤ សង្កាត់ប៉ោយប៉ែត កំពុងត្រូវបានឈ្មួញមួយចំនួនធ្វើអាជីវកម្មក្នុងលក្ខណៈប្រយោជន៍បុគ្គល ប៉ុន្ដែធ្វើឱ្យខូចបរិស្ថាន និងរំខានដល់ការប្រើប្រាស់ទឹករបស់ប្រជាពលរដ្ឋរាប់រយ គ្រួសារដែលរស់នៅភូមិមួយចំនួននៅខាងក្រោមខ្សែទឹកតាមបន្ទាត់ព្រំដែនខ្មែរ-សៀម។
ទឹកអូរព្រំដែនបច្ចុប្បន្នបើយើងសម្លឹងមួយភ្លែតមិនដឹងថាកខ្វក់ ឬប្រែពណ៌ខ្មៅនោះទេ ។ ប៉ុន្ដែបើនាំគ្នាដើរអើតមើលទៅក្នុងអូរតាមបន្ទាត់ព្រំដែនដែលលាតសន្ធឹងពីលិចទៅកើត ពោលគឺចាប់ពីច្រកទ្វារអន្ដរជាតិប៉ោយប៉ែតទៅកើតប៉ែកខាងត្បូងផ្លូវជាតិលេខ៥ ឱ្យបានច្បាស់លាស់នោះប្រាកដជាឃើញកន្លែងធ្វើប្រហុកក្នុងអូរជាច្រើនកន្លែង ដោយក្រុមឈ្មួញបានដាក់ស្ពាន ហើយដាក់ក្បាលម៉ាស៊ីនបញ្ឆេះសំរាប់ក្រឡុកត្រីប្រហុកក្នុងអូរ ចំណែកផ្ទៃទឹកក្នុងអូរទាំងមូលបានប្រែទៅជាពណ៌ខ្មៅហើយស្អុយ ។ ចំពោះបរិស្ថានជុំវិញ កន្លែងធ្វើប្រហុកផ្នែកខាងលើគោកវិញ បាន ចោលក្លិនស្អុយអសោចិ៍ដោយសារក្រុមឈ្មួញបានយកក្បាលត្រី និងកំទេចកំទីកាកសំណល់ ពីត្រីទៅហាលរាយពេញលើដីវាលក្បែរផ្លូវ ធ្វើឱ្យអ្នកធ្វើដំណើរ ចេញចូលក្នុងភូមិរអ៊ូរទាំ គ្រប់ៗគ្នាថា ស្អុយណាស់ ហើយពិបាកដកដង្ហើមពេលធ្វើដំណើរឆ្លងកាត់។
ត្រីដែលគេដឹកធ្វើប្រហុកទាំងនេះត្រូវបានឈ្មួញមានប្រុសមានស្រីប្រាប់ថា ពួកគេដឹកមកពីខេត្ដសៀមរាប ។ ពួកឈ្មួញបន្ដទៀតថា ក្រោយពីការធ្វើត្រីទាំងនេះឱ្យទៅជាប្រហុក រួចគឺពួកគេធ្វើការដឹកចេញទៅលក់ឯប្រទេសសៀម តាមច្រកទ្វារអន្ដរជាតិប៉ោយប៉ែត។ ត្រីដែលឈ្មួញធ្វើប្រហុក គឺសុទ្ធតែជាត្រីល្អិតភាគច្រើនជាត្រីកំភ្លាញ ។ បើទោះជាមានការអះអាងពីក្រុមឈ្មួញថា ប្រហុករបស់គេក្រោយពីធ្វើរួចនឹងដឹកបញ្ជូនចេញទៅលក់នៅដីសៀម តាមច្រកទ្វារអន្ដរជាតិប៉ោយប៉ែតយ៉ាងណាក្ដី ប៉ុន្ដែតាមប្រភពពីប្រជាពលរដ្ឋ បានឱ្យដឹងថា ប្រហុកទាំងនេះ បច្ចុប្បន្នត្រូវ បានគេឃើញក្រុមឈ្មួញដាក់ខ្សែរ៉តទាញ ចេញពីចំណុចដែលធ្វើនោះទៅដីសៀមតែ ម្ដង ។
ជុំវិញបញ្ហាខាងលើនេះ លោកសី ស៊ីល័យ នាយកសង្កាត់រដ្ឋបាលជលផលច្រកទ្វារអន្ដរជាតិប៉ោយប៉ែត បានប្រាប់តាមទូរស័ព្ទថា ការដឹកត្រីមកធ្វើប្រហុក គឺពួកឈ្មួញមានច្បាប់ត្រឹមត្រូវ ចំណែកឯការដែលឈ្មួញដឹកត្រីទាំងនោះយកមកកែច្នៃក្នុងទឹកអូរធ្វើឱ្យប៉ះពាល់ ដល់បរិស្ថាន ឬមានការរិះគន់ពីប្រជាពលរដ្ឋអ្វីនោះ លោកមិនដឹងទេ ព្រោះវាខុសពីជំនាញរបស់លោក។
លោកហាំ វណ្ណៈ មេបញ្ជាការវរសេនាតូចការពារព្រំដែនគោកលេខ៨៩១ បានឱ្យដឹងថា បញ្ហាហ្នឹងលោកដឹងពិតជាមានសកម្មភាពធ្វើប្រហុកអញ្ចឹងមែន ។ ពេលចោទសួរថា តើអាចនឹងមានការប៉ះពាល់ដល់ការប្រើប្រាស់ ឬក៏អត់ លោកប្រធានវរសេនាតូចរូបនេះបានឆ្លើយតបតាមទូរស័ព្ទវិញថា ចុះបើការបង្ហូរទឹកស្អុយ និងលាមកពីកាស៊ីណូចូលអូរនេះម្ដេចមិនមើលផង? លោកហាំ វណ្ណៈ បន្ថែមទៀតថា ការប៉ះពាល់ ឬមិនប៉ះពាល់បរិស្ថាននោះទៅសួរពួកឈ្មួញខ្លួនឯងទៅ បើដូចការចោទថា មានការបង្ហូរទឹកស្អុយ និងលាមកពី កាស៊ីណូ ដូច្នេះត្រីប្រហុកដែលគេយកមក លាងឬធ្វើពីទឹកអូរគឺកាន់តែលែងល្អទៅ ហើយ ។
ចំណែកលោកទ្រី ណារិន អភិបាលក្រុងប៉ោយប៉ែត បានប្រាប់កោះសន្ដិភាពតាមទូរស័ព្ទថា ជុំវិញបញ្ហាខាងលើនេះលោកពុំបានដឹងនោះទេ ប៉ុន្ដែលោកនឹងឱ្យមន្ដ្រីបរិស្ថានចុះទៅមើលភ្លាម ។ ចំពោះវិធានការយ៉ាងណានោះលោកអភិបាលក្រុងពុំទាន់បានឆ្លើយតបនៅឡើយទេ ។ លោកបន្ដថា ការនាំផលិតផលចេញវាពិតជាមានផលប្រយោជន៍ ដោយចំណូលមួយផ្នែកចូលរដ្ឋតែក៏ត្រូវធ្វើឱ្យបានត្រឹមត្រូវផងដែរ ដើម្បីកុំឱ្យមានការប៉ះពាល់ ដល់សង្គម។
ចែករំលែកព័តមាននេះ