លោក កឹម សុខាថា លោកឪពុក អ្នកម្តាយ តែងតែទូន្មានឲ្យគិតពីប្រយោជន៍សង្គមជាតិ
- ភ្នំពេញ
លោក កឹម សុខា អតីប្រធានគណបក្សប្រឆាំងដែលត្រូវរំលាយ បានលើកឡើងថា លោកឳពុក អ្នកម្តាយរបស់លោក តែងតែអប់រំ លោកថា កើតជាមនុស្សដែលមានតម្លៃ…
លោក កឹម សុខា អតីប្រធានគណបក្សប្រឆាំងដែលត្រូវរំលាយ បានលើកឡើងថា លោកឳពុក អ្នកម្តាយរបស់លោក តែងតែអប់រំ លោកថា កើតជាមនុស្សដែលមានតម្លៃ មានន័យ គឺមិនមែនជាមនុស្សគិតប្រយោជន៍សម្រាប់តែខ្លួនឯង និងគ្រួសារទេ គឺត្រូវគិតពីសង្គម ប្រទេសជាតិ និងមនុស្សជាតិជាសំខាន់ ។
នៅថ្ងៃទី២៧ មិថុនានេះ លោក កឹម សុខា មានអាយុចូល៦៨ឆ្នាំហើយ ។ នៅក្នុងឱកាសខួបកំណើតរបស់លោកលើកនេះ លោកបានរំលឹកពីភាពកតញ្ញូរបស់លោកចំពោះលោកអ្នកមានគុណ ។ តាមរយៈទំព័រ Facebook ផ្ទាល់ខ្លួន អ្នកនយោបាយដែលកំពុងជាប់ចោទពីបទក្បត់ជាតិបាន រំលឹកដល់ឱវាទដែលលោកឳពុកអ្នកម្តាយរបស់លោកតែងតែទូន្មានដល់លោក ។
លោកសរសេរថា«លោកឪពុក អ្នកម្តាយ មិនមែនត្រឹមតែជាអ្នកផ្តល់កំណើតឲ្យកូនទេ ពុកម៉ែស្រឡាញ់កូនខ្លាំងណាស់ លោកទាំងពីរបានបីបាច់ថែទាំកូន ដោយមិនចង់ឲ្យមានអ្វីប៉ះពាល់ដល់រូបកាយ និងទឹកចិត្តកូនឡើយ ។ ខ្ញុំចងចាំជានិច្ចនូវដំបូន្មានរបស់អ្នកមានគុណ ដែលតែងតែអប់រំកូនថា «កើតមកជាមនុស្ស កូនត្រូវធ្វើឲ្យជីវិតមានន័យ មានតម្លៃ មានប្រយោជន៍ មិនមែនសម្រាប់តែខ្លួនឯង និងគ្រួសារទេ គឺត្រូវគិតពីសង្គម ពីប្រទេសជាតិ និងពីមនុស្សជាតិជាសំខាន់»។
លោកកឹម សុខា បានបញ្ជាក់ថា ដោយសារលោកគោរព តាមការណែនាំ របស់លោកឱពុក អ្នកម្តាយរបស់លោកបានធ្វើឲ្យលោកមាន មានគោលបំណង (ឆន្ទៈ)ច្បាស់លាស់ រឹងមាំ មានក្តីសង្ឃឹម(ជឿជាក់)លើខ្លួនឯង លើអំពើល្អ និង មានការតស៊ូ(ព្យាយាម)ដោយអត់ធ្មត់ដោយអហិង្សា ។
លោកបានបញ្ជាក់ដូច្នេះ «ការប្រតិបត្តិជាប់ជានិច្ចនូវដំបូន្មានដ៏ថ្លៃថ្លានេះ ក្នុងជីវិតកូន ទោះបីជីវិតកូនផ្ទាល់ និងក្រុមគ្រួសារទទួលរងទុក្ខ និងជួបឧបសគ្គជាច្រើនយ៉ាងណាក៏ដោយក៏កូនមិនស្តាយក្រោយដែរ ព្រោះនេះជាគុណតម្លៃនៃជីវិតកូនដែលនាំឲ្យប្រជាពលរដ្ឋខ្មែរ ក៏ដូចជា សហគមន៍អន្តរជាតិជាច្រើនទទួលស្គាល់ផ្ដល់តម្លៃ និងគោរពរាប់អានកូនផងដែរ ។ គុណតម្លៃរបស់កូននេះក៏បានមកពីអ្នកមានគុណ»៕
ចែករំលែកព័តមាននេះ