រាជធានីភ្នំពេញ៖ ក្រសួងសុខាភិបាលកម្ពុជានៅថ្ងៃទី២៣ មិថុនានេះ បានឲ្យដឹងថា រកឃើញមានករណីវិជ្ជមានកូវីដ១៩ មួយករណីលើបុរសខ្មែរ មានសញ្ជាតិអាមេរិកាំង វ័យ ៦៦ឆ្នាំ ដែលរស់នៅក្នុងសង្កាត់ស្ទឹងមានជ័យ រាជធានីភ្នំពេញ ដែលនាំឲ្យករណីរកឃើញវិជ្ជមានកូវីដ១៩ រកឃើញនៅកម្ពុជាហក់ឡើងដល់១៣០ករណី ។
យោងតាមប្រកាសព័ត៌មានរបស់ក្រសួងសុខាភិបាល ចុះថ្ងៃទី២៣ មិថុនា បានបញ្ជាក់ឲ្យដឹងថា បុរសដែលរកឃើញកើតកូវីដ១៩ គឺជាអ្នកដំណើរដែលបានធ្វើដំណើរមកពីសហរដ្ឋអាមេរិក និងមកដល់កម្ពុជា កាលពីថ្ងៃទី២១ មិថុនា ហើយពេលនេះ គឺកំពុងត្រូវបានសម្រាកព្យាបាលនៅមន្ទីរពេទ្យមន្ទីរពេទ្យមិត្តភាពខ្មែរ-សូវៀត ។
ជុំវិញការរកឃើញករណីវិជ្ជមានលើបុរសខ្មែរ សញ្ជាតិអាមេរិកាំង ដែលរស់នៅសហរដ្ឋអាមេរិកនេះ គឺជើងហោះហើរដែលលោកបានធ្វើដំណើរមកកម្ពុជា គឺមានអ្នកដំណើរសរុបចំនួន ១១២នាក់ ក្នុងនោះស្រី ៤១ នាក់ និងបុរស ៧១ នាក់ ហើយក្នុងនោះ គឺមានជនជាតិខ្មែរចំនួន ៨៩ នាក់ (ស្រី ៣៥នាក់) និងជនបរទេសមានចំនួន ២៣នាក់ (ស្រី ៦នាក់) ។
ក្រសួងសុខាភិបាលបានអះអាងថា គិតត្រឹមម៉ោង ៧ ព្រឹកថ្ងៃទី ២៣ មិថុនា គឺមានចំនួនអ្នកព្យាបាលជាសះស្បើយសរុបទូទាំងប្រទេសចំនួន ១២៧ នាក់និងមានអ្នកជំងឺកូវីដ សរុប ៣ នាក់កំពុងបន្តការព្យាបាលនៅមន្ទីរពេទ្យ ដែលអ្នកជំងឺទាំង៣កំពុងទទួលការព្យាបាលមាន៖ ១- បុរសជនជាតិខ្មែរ ០១នាក់ ដែលបានវិលត្រឡប់មកពីប្រទេសឥណ្ឌូនេស៊ី ២- បុរសជនជាតិខ្មែរ ០១ នាក់ដែលជាករណីវិលត្រឡប់មកពីប្រទេសម៉ាឡេស៊ី ៣- បុរសខ្មែរ មានសញ្ជាតិអាមេរិកាំង ០១នាក់ទើបធ្វើដំណើរមកពីអាមេរិក ៕
ចែករំលែកព័តមាននេះ