ខេត្តកំពត ៖ ជម្លោះរឿងដីវត្តនិងដីសាលារៀនដែលកើតមានជាយូរឆាំ្នមកហើយនោះ ទីបំផុតបានបញ្ចប់ហើយក្រោយពីការជួបប្រជុំដោះស្រាយរវាងភាគីទំនាស់ ក្រោមអធិបតីភាពប្រធានមន្ទីរធម្មការនិងសាសនាខេត្ត ព្រមទាំងព្រះអនុគណ និងមន្ត្រីសង្ឃជាច្រើនទៀត ។ រឿងដីដែលមានវិវាទនេះ គឺរវាងដីវត្តសូរិយាវង្សជ្រុងស្រឡៅ…
ខេត្តកំពត ៖ ជម្លោះរឿងដីវត្តនិងដីសាលារៀនដែលកើតមានជាយូរឆាំ្នមកហើយនោះ ទីបំផុតបានបញ្ចប់ហើយក្រោយពីការជួបប្រជុំដោះស្រាយរវាងភាគីទំនាស់ ក្រោមអធិបតីភាពប្រធានមន្ទីរធម្មការនិងសាសនាខេត្ត ព្រមទាំងព្រះអនុគណ និងមន្ត្រីសង្ឃជាច្រើនទៀត ។
រឿងដីដែលមានវិវាទនេះ គឺរវាងដីវត្តសូរិយាវង្សជ្រុងស្រឡៅ និងដីសាលាបឋមសិក្សា និងអនុវិឡាល័យជ្រុងស្រឡៅ ក្នុងឃុំស្ដេចគង់ខាងជើង ស្រុកបន្ទាយមាស ។ បញ្ហាទំនាស់គ្នារវាងដីវត្តនិងដីសាលារៀននេះ គឺអាជ្ញាធរព្យាយាមស្រុកដោះស្រាយជាច្រើនដងហើយ តែមិនបានសម្រេច ដោយសារអាចារ្យក៏ដូចជាគណៈកម្មការវត្ត ទាមទារដីនៅក្នុងបរិវេណខាងសាលារៀន ចង់ធ្វើអ្វីក៏មិនបាន មកពិភាក្សាជាមួយតាអាចារ្យ ហើយខាងសាលារៀនគ្រោងធ្វើរបងចែកឱ្យដាច់ពីគ្នារវាងដីវត្តនិងដីសាលារៀន ។
ដោយសារមានជម្លោះជាពាក្សសម្ដីរវាងលោកគ្រូអ្នកគ្រូនិងអាចារ្យវត្តសូរិយាវង្សជ្រុងស្រឡៅកាន់តែក្ដៅទៅៗ តាអាចារ្យមិនឱ្យខាងសាលាចាក់ដី ឯខាងសាលាមិនឱ្យតាអាចារ្យធ្វើកន្លែងងូតទឹក ទើបនៅព្រឹកថ្ងៃទី១២ ខែមិថុនាក៏មានបើកកិច្ចប្រជុំមួយរវាងខាងសាលា និងខាងវត្ត ដោយមានការចូលរួមពីលោក នាក់ យិតថូ ប្រធានមន្ទីរធម្មការនិងសាសនាខេត្ត និងការនិមន្តចូលរួមពីព្រះអនុគណស្រុកបន្ទាយមាស លោក ប៉ោ វី អភិបាលរងស្រុក អាជ្ញាធរមូលដ្ឋាន និងប្រជាពលរដ្ឋនៅភូមិជ្រុងស្រឡៅជាច្រើននាក់ទៀត ។
អ្នកគ្រូ កៅ ស្រី នាយិកាសាលាបឋមសិក្សាជ្រុងស្រឡៅ មានប្រសាសន៍ថា អ្នកស្រីពិតជាមានការខ្មាសអៀនណាស់ ព្រោះតាអាចារ្យចោទថា ខាងសាលាចង់បានដីវត្ត ។ មកដល់ពេលនេះ ខាងសាលាដែលបើកបង្រៀនសិស្សយូរឆ្នាំមកហើយ មិនទាន់បានដីវត្តមួយដុំយកទៅសង់តូបឬសង់ផ្ទះអីទេ ។ សាលាចាក់ដីក៏លោកអាចារ្យជំទាស់ដែរ ទើបអ្នកស្រីមានគំនិតមួយចង់ទាមទារធ្វើរបងឱ្យដាច់ពីវត្ត ។ ឥឡូវនេះ សូម្បី
តែមកវត្តក៏គាត់ឈប់មកដែរព្រោះខឹងនឹងតាអាចារ្យដែលធ្វើបែបនេះ ។
លោក អឹុន វណ្ណនី មន្ត្រីក្រុមប្រឹក្សាឃុំស្ដេចគង់ បានសុំណូមពរលោកតាអាចារ្យក៏ដូចជាលោកគ្រូអ្នកគ្រូ ឈប់បន្តប្រើពាក្យសម្ដីចោទប្រកាន់គ្នា ហើយឈប់ចោទគ្នាទៅវិញទៅមកទៅព្រោះសាលារៀនជាថ្នាលបណ្ដុះបណ្ដាលចំណេះដឹងគ្រប់ជំនាន់ ឯវត្តអារាមក៏ជាកន្លែងគោរពបូជារបស់ប្រជាពលរដ្ឋគ្រប់រូប ។ លោក នាក់ យិតថូ ប្រធានមន្ទីរធម្មការនិងសាសនាខេត្ត បានធ្វើការសម្របសម្រួលដល់គ្រប់ភាគីដែលកើតជាអធិករណ៍រឿងដីសាលារៀនសង់លើដីបរិវេណវត្ត ហើយតាអាចារ្យ និងអ្នកគ្រូមិនបានយល់ពីដីគរុភ័ណ្ឌរបស់វត្ត ។
លោកអភិបាលស្រុក បានអានសេចក្ដីសម្រេចមួយជាផ្លូវការថា គ្រប់វត្តអារាមទាំងអស់ត្រូវតែធ្វើរបង និងមានប្លង់កាន់កាប់ឱ្យបានច្បាស់លាស់ ។ ចំពោះសាលារៀនផ្នែកអាណាចក្រដែលសាងសង់លើដីវត្ត មិនអនុញ្ញាតឱ្យធ្វើរបងនិងប្លង់ដាច់ចេញពីវត្តបានឡើយ ។
លោក នាក់ យិតថូ បានប្រាប់លោកគ្រូអ្នកគ្រូ និងតាអាចារ្យថា ត្រូវសាមគ្គីគ្នាឡើងវិញហើយមិនត្រូវប្រមាថគ្នាតទៅទៀតឡើយ ។ រឿងទំនាស់ព្រំដីវត្តនិងសាលារៀនជារឿងតូចតាចទេ តែដោយសារតែមិនបានយល់រៀងៗខ្លួន ធ្វើឱ្យរឿងនេះរីកកាន់តែធំទៅវិញ ។ លោក និយាយថា រឿងដីវត្តនិងដីសាលារៀនគ្មានអ្នកណាទាមទារយកទៅធ្វើអីបានទេ ទុកតំណតកូនតចៅរហូត ។លោកអភិបាលស្រុករួមនឹងព្រះសង្ឃផង បានទៅពិនិត្យមើលដីវត្ត មិនត្រូវឱ្យបុគ្គលណាសាងសង់បន្តទៀតទេ ហើយជំរុញឱ្យខាងមន្ត្រីរៀបចំដែនដីមកវាស់វែងឱ្យខាងវត្ត ធ្វើរបងនិងសម្អាតអនាម័យទាំងអស់គ្នា ៕
ចែករំលែកព័តមាននេះ