មហាសេដ្ឋី បាបារ៉ា ខូខូរ៉ាន (Barbara Corcoran) ដែលជាអ្នកវិនិយោគប្រចាំកម្មវិធី Shark Tank ដ៏ល្បីក្នុងសហរដ្ឋអាមេរិកមានសមត្ថភាពខ្ពស់ក្នុងការមើលមនុស្ស ជាពិសេសសហគ្រិន ។ កាលពីដើមខែឧសភាកន្លងមកនេះ អ្នកស្រីបានប្រាប់ទៅបេក្ខជនម្នាក់ថាលោកប្រៀបដូចជាមនុស្សដែលមិនចេះរៀបចំទេ ។
លោក អេនថូនៅ ហ្វ្រង់កូ (Anthony Franco) ដែលជាសហគ្រិនក្រុមហ៊ុន McSquares ដែលបង្កើតក្រដាសស្អិតដែលអាចប្រើម្តងហើយម្តងទៀតបានទទួលស្គាល់ថាពិតមែន ប៉ុន្តែបានអះអាងថាលោកមានមនុស្សជុំវិញខ្លួនដែលមានសមត្ថភាពក្នុងការរៀបចំខ្ពស់ ។ ចម្លើយរបស់លោកបានធ្វើឲ្យគណៈកម្មាធិការដែលជាវិនិយោគិនធំៗប្រចាំសហរដ្ឋអាមេរិកពេញចិត្តយ៉ាងខ្លាំងព្រោះតែភាពស្មោះត្រង់របស់លោក ។ ប៉ុន្តែពេលដែលលោកចែករំលែកសាច់រឿងជីវិត លោកបានធ្វើឲ្យអ្នកស្តាប់យកចិត្តទុកដាក់យ៉ាងហ្មត់ចត់ ។
លោកបានប្រាប់ថា លោកមិនបានបញ្ចប់ការសិក្សានៅថ្នាក់វិទ្យាល័យរបស់លោកទេ ហើយលោកត្រូវបានអ្នកដទៃមើលងាយថាជាក្មេងដែលចូលចិត្តកុំព្យូទ័រ និងមិនដែលនិយាយជាមួយគ្រូខ្លួនឡើយ ហើយជំនឿចិត្តដែលលោកកំពុងតែបង្ហាញលើកម្មវិធីគ្រាន់តែជាអ្វីដែលលោកបង្ខំឲ្យចេញពីខ្លួនប៉ុណ្ណោះ ។
ព្រោះតែការភ័យខ្លាចរបស់លោកក្នុងការចែករំលែកក្នុងកិច្ចប្រជុំទើបបានជួយឲ្យលោកបង្កើតចេញគំនិតបង្កើតក្រុមហ៊ុនមួយ ។ លោកបាននិយាយថាអ្នកដទៃក៏មានអារម្មណ៍ខ្មាសអៀន និងមិនហ៊ាននិយាយក្នុងកំឡុងពេលប្រជុំដូចលោកដែរ ហើយអ្នកទាំងនោះភាគច្រើនជាមនុស្សដែលមានគំនិតល្អជាងគេក្នុងអង្គប្រជុំ ។
ក្នុងពេលនោះលោកមហាសេដ្ឋី ខេវីន អូលារី (Kevin O’Leary) ដែលជាវិនិយោគិន និងគណៈកម្មាធិការម្នាក់ទៀតក្នុងកម្មវិធីបាននិយាយថាលោកយល់ពីលោក ហ្វ្រង់កូ ច្បាស់លាស់ព្រោះពេលដែលលោកនៅវ័យក្មេង មនុស្សជុំវិញខ្លួនលោកបានប្រាប់ថាលោកគ្មានសង្ឃឹមអាចបញ្ចប់ការសិក្សាបានទេ ដូច្នេះលោកតែងតែមានចិត្តទន់សម្រាប់ផលិតផលដែលជួយដល់មនុស្សដែលមានការពិបាកក្នុងការរៀន ។
ជាលទ្ធផល លោកបានវិនិយោគ ៣០ម៉ឺនដុល្លារ និងប្តូរបានភាគហ៊ុនក្រុមហ៊ុន ៣០% មកវិញ ហើយលោក ហ្វ្រង់កូ បានយល់ព្រម ៕
ចែករំលែកព័តមាននេះ