ខេត្តស្ទឹងត្រែង ៖ កម្លាំងអាវុធហត្ថខេត្តស្ទឹងត្រែងបានបំបែកសំណុំរឿងចោរកម្មគាស់ផ្ទះមួយកន្លែងប្រមូលយកទ្រព្យសម្បត្តិអស់ប្រមាណជិត៤ម៉ឺនដុល្លារ ដោយដកហូតបានមកវិញនូវទ្រព្យសម្បត្តិសេសសល់មួយចំនួនប៉ុណ្ណោះ និងឃាត់ខ្លួនមុខសញ្ញាជនសង្ស័យម្នាក់ ។
កាលពីរសៀលថ្ងៃទី១១ មិថុនា កម្លាំងអាវុធហត្ថបានបញ្ជូនមុខសញ្ញាជនសង្ស័យទៅកាន់តុលាការ និងបន្តបញ្ជូនទៅពន្ធនាគារតាមដីការបង្គាប់អោយឃុំខ្លួនរបស់តុលាការ រីឯទ្រព្យសម្បត្តិដែលដកហូតបាន ត្រូវបានសមត្ថកិច្ចប្រគល់ជូនម្ចាស់ដើមវិញផងដែរ។
ជនសង្ស័យដែលសមត្ថកិច្ចចាប់ខ្លួនខាងលើឈ្មោះ ប៉ិច ផាណ្ណៈ ភេទប្រុស អាយុ៣៦ឆ្នាំ មុខរបរមិនពិតប្រាកដ ។
តាមការអោយដឹងពីសមត្ថកិច្ចជំនាញនៃកងរាជអាវុធហត្ថខេត្តស្ទឹងត្រែងបានអោយដឹងថា ជនសង្ស័យម្នាក់ដែលត្រូវកម្លាំងកងរាជអាវុធហត្ថស្ទឹងត្រែង និងខេត្តបន្ទាយមានជ័យចាប់ខ្លួន ក្រោយពីជននេះបានធ្វើសកម្មភាពគាស់ទម្លុះទម្លាយផ្ទះមួយកន្លែងប្រមូលយកទ្រព្យសម្បត្តិអស់ប្រមាណជិត៤មឺុនដុល្លារ ដែលប្រព្រឹត្តនៅភូមិថ្មលាត សង្កាត់ស្រះឫស្សី ក្រុងស្ទឹងត្រែង ខេត្តស្ទឹងត្រែង កាលពីថ្ងៃទី៦ ខែមិថុនា ឆ្នាំ២០២០ បន្ទាប់ពីធ្វើសកម្មភាពរួច ជនសង្ស័យបានរត់គេចខ្លួនបាត់។
ក្រោយពេលកើតហេតុ កម្លាំងអាវុធហត្ថខេត្តស្ទឹងត្រែងបានសហការជាមួយកម្លាំងអាវុធហត្ថខេត្តកំពង់ស្ពឺ, ខេត្តព្រះវិហារ, ខេត្តឧត្តមានជ័យ, ខេត្តបន្ទាយមានជ័យ និងខេត្តរៀមរាប រហូតឈានដល់ការចាប់ខ្លួនជនសង្ស័យនៅស្រុកក្រឡាញ់ ខេត្តសៀមរាប រួចបញ្ជូនមកកាន់ទីបញ្ជាការដ្ឋានកងរាជអាវុធខេត្តស្ទឹងត្រែងតែម្តង។ ។
បច្ចុប្បន្ន ជនសង្ស័យម្នាក់ខាងលើត្រូវបានសមត្ថកិច្ចបញ្ជូនទៅឃុំខ្លួននៅពន្ធនាគារតាមដីការបស់តុលាការ ៕ (កែសម្រួលដោយ ៖ ធីតា)
ចែករំលែកព័តមាននេះ