មហាសេដ្ឋី និងក្រុមគ្រួសារដែលមានទ្រព្យសម្បត្តិច្រើនជាងគេទាំង ៥០ លើពិភពលោកបានបរិច្ចាគ ១ប៊ីលានដុល្លារទៅសប្បុរសធម៌ មានន័យថាមនុស្សម្នាក់បរិច្ចាគប្រមាណ ២០លានដុល្លារ ។ តើអ្នកគិតថា ពួកគេមានចិត្តល្អទេ? ចុះប្រសិនបើអ្នកដឹងថា ទ្រព្យរួមរបស់បុគ្គល និងគ្រួសារទាំង ៥០ ខាងលើស្មើប្រមាណ ១.៦ទ្រីលានដុល្លារ តើអ្នកនៅគិតថា ពួកគេចិត្តល្អទេ?
ពេលដែលបុរសដែលមានទ្រព្យសម្បត្តិច្រើនជាងគេលើលោកគឺលោក ជេហ្វ បេសូស (Jeff Bezos)បានបរិច្ចាគ ១០០លានដុល្លារដល់អង្គការ Feeding America អង្គការមិនគិតប្រាក់ចំណូលមួយនេះបានចេញសេចក្តីថ្លែងអំណរគុណ និងបានបន្ថែមថាជីវិតមនុស្សជាច្រើនរូបនឹងផ្លាស់ប្តូរព្រោះតែទឹកចិត្តល្អរបស់លោក ។
ប៉ុន្តែសម្រាប់មនុស្សម្នាក់ដែលមានទ្រព្យសម្បត្តិរួម ១៤៨.៦ប៊ីលានដុល្លារ លុយ ១០០លានដុល្លារស្មើតែ ០.៧% នៃទ្រព្យរួមរបស់លោកប៉ុណ្ណោះ ។ ហើយតាំងពីដើមឆ្នាំនេះទ្រព្យរបស់លោកបន្តកើនឡើងជាបន្តបន្ទាប់ពី ១១៥ប៊ីលានដុល្លារនៅថ្ងៃទី ១ខែមករា ឆ្នាំ ២០២០ មកស្មើ ១៤៨.៦ប៊ីលានដុល្លារ ។
គួរបញ្ជាក់ដែរថា មហាសេដ្ឋីមួយចំនួនបានចាប់ផ្តើមការបរិច្ចាគសម្រាប់អំពើសប្បុរសធម៌តាំងពីមុនមានការផ្ទុះជំងឺកូវីដ ១៩ មក ដូចជាលោកមហាសេដ្ឋី ប៊ីល ហ្គេតស៍ (Bill Gates) និងភរិយាដែលបានចូលរួមតាមមូលនិធិ Bill and Melind aGates Foundation ជាដើម ។ លើសពីនេះទៅទៀត មហាសេដ្ឋីចំនួន ១៥រូបក្នុងចំណោម ៥០ខាងលើបានចូលរួម Giving Pledge ដែលសន្យាថានឹងបរិច្ចាគទ្រព្យសម្បត្តិភាគច្រើនរបស់ពួកគេទៅសប្បុរសធម៌ ។
យ៉ាងណាក្តី យោងទៅតាមសេចក្តីរាយការណ៍មួយរបស់ The Washington Post បានឲ្យដឹងថា Giving Pledge ប្រៀបដូចជាការសន្យាផ្ទាល់មាត់ប៉ុណ្ណោះ ហើយវាមិនមែនជាកិច្ចសន្យាដែលមានឥទ្ធិពលផ្លូវច្បាប់ទេ ខណៈដែលវាអនុញ្ញាតឲ្យអ្នកមានទាំងនោះសម្រេចលើការចាយវាយលុយដែលបានបរិច្ចាគ ។
តែមានមហាសេដ្ឋីម្នាក់ដែលប្រៀបដូចជាខុសពីមហាសេដ្ឋីដទៃ ។ មហាសេដ្ឋីម្នាក់នោះគឺលោក ចាក ដរស៊ី (Jack Dorsey) ដែលជានាយកប្រតិបត្តិរបស់ Twitter ។ លោកមិនស្ថិតក្នុងចំណោមមនុស្ស និងគ្រួសារទាំង ៥០ ខាងលើទេ ។ ផ្ទុយមកវិញលោកជាប់ចំណាត់ថ្នាក់លេខ ១៤៧ ក្នុងចំណោមមហាសេដ្ឋីជនជាតិអាមេរិកដទៃទៀតនេះបើយោងតាម Forbes ។
កាលពីដើមខែមេសាកន្លងមកនេះ លោកបានសន្យាថា នឹងបរិច្ចាគភាគហ៊ុនក្រុមហ៊ុន Square សរុប ១ប៊ីលានដុល្លារ ឬប្រមាណ ២៨% នៃទ្រព្យសម្បត្តិរួមរបស់លោកដើម្បីឆ្លើយតបនឹងជំងីកូវីដ ១៩ និងដល់អង្គការមិនគិតប្រាក់ចំណូលដទៃ ។
សេចក្តីរាយការណ៍ខាងលើបានបន្តឲ្យដឹងថា អ្នកមានបរិច្ចាគជាមធ្យមប្រមាណតែ ១% ទេក្នុងមួយឆ្នាំ ហើយការអសកម្មក្នុងការបរិច្ចាគថវិកាក្នុងកំឡុងពេលនេះ គឺមិនគួរឲ្យភ្ញាក់ផ្អើលឡើយ ។ ការផ្ទុះជំងឺកូវីដ ១៩ នេះមិនត្រឹមតែអាចវាស់វែងចំនួនថវិកាបរិច្ចាគទេ តែថែមទាំងអាចវាស់វែងការចូលរួមឆ្លើយតបនឹងវិបត្តិក្នុងប្រទេសដែរ ៕
ចែករំលែកព័តមាននេះ