កញ្ញា ជី កៃធីង (Ji Kaiting) ធ្លាប់មានឈ្មោះជាមហាសេដ្ឋីវ័យក្មេងជាងគេលើលោក និងជាម្ចាស់រថយន្តទំនើបៗជាច្រើនគ្រឿងនៅប្រទេសចិន ។ ប៉ុន្តែកញ្ញាក៏ជាមហាសេដ្ឋីលាក់មុខម្នាក់ដែរដែលធ្វើឲ្យមនុស្សជាច្រើនមានការងើយឆ្ងល់ពីជីវិតរបស់មហាសេដ្ឋីរូបនេះ ។
កញ្ញាជាកូនស្រីរបស់មហាសេដ្ឋី ជី ហៃផេង (Ji Haipeng) ដែលជានាយកប្រតិបត្តិរបស់ក្រុមហ៊ុនអចលនទ្រព្យ Logan Property Holdings ។ យោងទៅតាម Forbes កាលពីឆ្នាំ ២០១៤ កញ្ញាត្រូវបានចាត់ទុកជាមហាសេដ្ឋីវ័យក្មេងជាងគេនៅអាយុ ២៤ឆ្នាំ ។
យោងទៅតាមសេចក្តីរាយការណ៍របស់សារព័ត៌មានអូស្ត្រាលីមួយបានឲ្យដឹងថា កញ្ញាមានទ្រព្យសម្បត្តិសរុបប្រមាណ ១.៣ប៊ីលានដុល្លារកាលពីឆ្នាំ ២០១៩ ។ នៅអាយុ ២៤ឆ្នាំ ឪពុករបស់កញ្ញាបានផ្ទេរទ្រព្យសម្បត្តិមួយផ្នែករបស់គ្រួសារឲ្យទៅកញ្ញា និងបានឲ្យភាគហ៊ុន ៨៥% របស់ក្រុមហ៊ុនទៅទៀត ។
យោងទៅតាម South China Morning Post បានឲ្យដឹងទៀតថា ទោះជាមានទ្រព្យសម្បត្តិស្តុកស្តម្ភពិតមែនក្តី តែកញ្ញាជាមនុស្សដែលឧស្សាហ៍ព្យាយាម និងជាសិស្សពូកែដែលតែងតែជាប់ចំណាត់ថ្នាក់ខ្ពស់ៗក្នុងថ្នាក់ ។ កញ្ញាបានបញ្ចប់ការសិក្សានៅសិង្ហបុរី និងបញ្ចប់ថ្នាក់បរិញ្ញាប័ត្រផ្នែកហិរញ្ញវត្ថុ និងសេដ្ឋកិច្ចនៅសាកលវិទ្យាល័យ University of London ។
ពេលដែលនៅជានិស្សិតនៅសាកលវិទ្យាល័យ កញ្ញាបែងចែកពេលវេលាសម្រាប់ការសិក្សា និងជួយឪពុកគ្រប់គ្រងក្រុមហ៊ុនផងដែរ ។ ក្រៅពីនេះហើយ បុគ្គលិកក្នុងក្រុមហ៊ុនមានការគោរពកញ្ញា និងទទួលស្គាល់ជំនាញគ្រប់គ្រងដ៏ចំណាប់របស់កញ្ញាផងដែរ ។ក្រៅពីការងារហើយ កញ្ញាចូលចិត្តតុបតែងខ្លួន និងរថយន្តថ្លៃៗ ។ មានសេចក្តីរាយការណ៍ជាច្រើនបង្ហាញថាកញ្ញាស្រលាញ់រថយន្ត Ferrari ជាពិសេសរថយន្តដែលមានចំនួនកំណត់ដូចជា LaFerrari ដែលមានតែ ៤៩៩គ្រឿងលើលោកជាដើម ។
ពេលដែលកញ្ញាត្រូវបានចាត់ទុកជាមហាសេដ្ឋីវ័យក្មេងជាងគេលើលោក អ្នកកាសែតជួបការលំបាកយ៉ាងខ្លាំងក្នុងការរកព័ត៌មានទាក់ទិននឹងកញ្ញាព្រោះតែកញ្ញាមានឈ្មោះចិនផ្សេង និងឈ្មោះជាភាសាអង់គ្លេសផ្សេង ។
យោងទៅតាមសារព័ត៌មានក្នុងស្រុករបស់ប្រទេសចិនបានឲ្យដឹងដែរថា កញ្ញាជាមហាសេដ្ឋីដែលនៅលីវ និងជាស្ត្រីដែលទទួលបានការចាប់អារម្មណ៍ជាច្រើនពីបុរសៗក្នុងប្រទេសផងដែរ ៕
ចែករំលែកព័តមាននេះ