រាជធានីភ្នំពេញ ៖ ក្រោយពីបែកធ្លាយតាមរយៈរូបភាពវីដេអូសុវត្ថិភាពនៅលើបណ្តាញសង្គម ហ្វេសប៊ុក ធ្វើឲ្យមានការភ្ញាក់ផ្អើលយ៉ាងខ្លាំងនៅថ្ងៃទី១០ ខែមិថុនា ឆ្នាំ២០២០នោះ អំពីសកម្មភាពបុរសម្នាក់ដែល គេស្គាល់ថា ជាម្ចាស់ហាង លក់គ្រឿងក្លែមមួយកន្លែងមានឈ្មោះ «ធារ៉ា» មានការឈ្លោះប្រកែកគ្នាជាមួយនឹងស្ត្រី ជាប្រពន្ធ និងប្រើអំពើហិង្សាគប់ និងទាត់ធាក់ទៅលើ បុរសជាបុគ្គលិកម្នាក់យ៉ាងសាហាវព្រៃផ្សៃ កាលពីពេលកន្លងមកនោះ។
នៅវេលាម៉ោង១០ព្រឹក ថ្ងៃទី១០ ខែមិថុនា នេះដែរ ត្រូវបានកម្លាំងនគរបាលប៉ុស្តិ៍វត្តភ្នំ កោះហៅឲ្យចូល ខ្លួនមកធ្វើការសាកសួរអំពីរឿងនេះផងដែរ ដោយបុរសជាម្ចាស់ហាង ខាងលើបានប្រើអំពើហិង្សាទៅលើបុរសជា បុគ្គលិក និងត្រូវជាក្មួយប្រុសរបស់ប្រពន្ធរូបនោះគឺដោយសាតែខឹងនឹងរូបគេ មកជួយធ្វើអន្តរាគមន៍រឿងប្តីប្រពន្ធ របស់គាត់ឈ្លោះគ្នា ហើយបុរសរងគ្រោះក៏មិនបានធ្វើការប្តឹងប្តល់អ្វីដែរ។
លោក អ៊ុន សំអាត នាយប៉ុស្តិ៍គរបាលវត្តភ្នំ បានប្រាប់កោះសន្តិភាពឱ្យដឹងថា ក្រោយពីបានឃើញរូបតាមរយៈវីដេអូកាមេរ៉ាសុវត្ថិភាព ដែលបុរសម្នាក់ឈ្មោះ កាន់ វុទ្ធី ហៅធី អាយុប្រមាណ៤០ឆ្នាំ ជាម្ចាស់ហាងលក់គ្រឿងក្លែមឈ្មោះ «ធារ៉ា» ដែលមានទីតាំងនៅចំណុចផ្លូវ លេខ១០៨ កែងផ្លូវ៥១ ក្នុងសង្កាត់វត្តភ្នំ ខណ្ឌដូនពេញ ប្រើអំពើហិង្សាទៅលើបុរសម្នាក់ជាបុគ្គលិក របស់ខ្លួននៅលើ បណ្តាញសង្គមហ្វេសប៊ុក នៅថ្ងៃទី១០ព្រឹកមិញនេះ។
កម្លាំងរបស់លោកក៏បានធ្វើការកោះហៅបុរសជា ម្ចាស់ហាង ខាងលើមកធ្វើការសាកសួរ ដែលមានវត្តមានទាំងបុរសជាប្តី និងស្ត្រីជាប្រពន្ធ បានចូលខ្លួនមកធ្វើការបំភ្លឺចំពោះ មុខកម្លាំងមានសម្ថកិច្ចរបស់លោកភ្លាមៗផងដដែរ។ លោកនាយប៉ុស្តិ៍ក៏បានប្រាប់បន្តទៀតថា ក្នុងពេលនោះដែរ បុរសឈ្មោះ កាន់ វុទ្ធី ហៅធី ជាម្ចាស់ហាង «ធារ៉ា» ខាងលើបានរៀបរាប់ប្រាប់ថា «ខ្លួនពិតជាបានប្រើអំពើហិង្សា ទៅលើបុរសជាបុគ្គលិក និង ត្រូវជាក្មួយខាងប្រពន្ធរបស់គាត់ម្នាក់ពិតប្រាកដមែន ដោយសារតែខឹងនឹងរូបគេ ចូលមកជួយនៅពេលកំពុងតែមានជម្លោះជាមួយនឹងប្រពន្ធរបស់គាត់ ហើយក៏បានធ្វើការសម្របសម្រួលគ្នា ចប់អស់ហើយៗរូបគេក៏នៅតែមកធ្វើការ កន្លែងរបស់គាត់ដូចសព្វមួយដងដដែល»។
ករណីបុរសជាម្ចាស់ហាងផឹកស៊ីឈ្មោះ «ធារ៉ា» ប្រើអំពើហិង្សាទៅ លើបុគ្គលិករបស់ខ្លួន និងត្រូវបានគេយកមកបង្ហោះ នៅលើបណ្តាញសង្គមហ្វេសប៊ុក ធ្វើឲ្យមានការភ្ញាក់ផ្អើលយ៉ាងខ្លាំងខាងលើនេះដែរ គឺកើតឡើងតាំងពីយប់ថ្ងៃទី០៦ ខែមិថុនា ឆ្នាំ២០២០មកម្លេះ ទើបពេលនេះកម្លាំងរបស់លោកកោះ ហៅមកធ្វើការសាកសួរនៅប៉ុស្តិ៍តែម្តង។
ក្រោយពីកម្លាំងនគរបាលប៉ុស្តិ៍វត្តភ្នំធ្វើការសាកសួរ ទៅលើបុរសជាម្ចាស់ហាង «ធារ៉ា» ម្នាក់ខាងលើអស់រយៈពេលជា ច្រើនម៉ោងរួចហើយក៏អនុញ្ញាត ឲ្យរូបគាត់វិលត្រឡប់ទៅផ្ទះវិញ ចំណែកបុរសជាជនរងគ្រោះជាបុគ្គលិក ដែលត្រូវជា ក្មួយរបស់ស្ត្រីជាប្រពន្ធនោះ ក៏មិនបានមកដាក់ពាក្យបណ្តឹងអ្វីឡើយ។ តែពាក់ព័ន្ធនឹងបញ្ហាអ្វីមួយទៅនឹងផ្លូវច្បាប់នៅថ្ងៃក្រោយនោះកម្លាំងមានសម្ថកិច្ចក៏លោកមិនទាន់បានដឹងដែរ៕ ដោយ ៖ ភី ផល
ចែករំលែកព័តមាននេះ