រាជធានីភ្នំពេញ ៖ អាណាព្យាបាលសិស្សសាលាអន្តរជាតិវេស្ទើនអន្តរជាតិប្រមាណ៣០នាក់ តំណាងឲ្យរាប់រយនាក់ ក្នុងចំណោមរាប់ពាន់ មកពីសាខា សាលាប្រមាណជាង១០ នៅក្នុងរាជធានីភ្នំពេញ បាននាំគ្នាធ្វើលិខិតស្នើសុំឲ្យអគ្គនាយកបញ្ចុះតម្លៃ ៥០ភាគរយ សម្រាប់ការបង្រៀនតាមអនឡាញ ខណៈពេលស្ថានភាពសេដ្ឋកិច្ចធ្លាក់ចុះ ដោយសាតែកូវីដ-១៩បានវាយលុក។
ការស្នើសុំនេះដោយតំណាងអាណាព្យាបាលសិស្សប្រមាណ៣០នាក់ បានជួបប្រមូលផ្តុំ យកលិខិតស្នើទៅជួបលោកអគ្គនាយកសាសានៅសាខាកណ្តាល ដែលស្ថិតនៅភូមិ ទំនប់ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ កាលពីវេលាម៉ោងប្រមាណ២ និង៣០នាទី រសៀល ថ្ងៃទី០៨ ខែមិថុនា ឆ្នាំ២០២០នេះ។
តាម អាណាព្យាបាលសិស្សម្នាក់ ដែលសុំមិនបញ្ចេញឈ្មោះ បានឲ្យដឹងថា ស្ថិតនៅក្នុងស្ថានភាពដ៏សែនលំបាក ដោយសាតែផលប៉ះពាល់នៃជំងឺកូវីដ-១៩ អាណាព្យាបាលសិស្សទាំងអស់ មានការលំបាកជួបបញ្ហា វិបត្តិសេដ្ឋកិច្ចគ្រួសារ ដោយសារផ្អាកការងារ បណ្តោះអាសន្ន, ចំណាយលើការទិញសម្ភារបន្ថែមដូចជាកុំព្យូរទ័រ ទូរស័ព្ទ ស្មាតហ្វូន ថ្លៃអ៊ីនធើណេតប្រចាំខែ ថ្លៃភ្លើង កើនទ្វេរ សម្រាប់ការសិក្សាតាមប្រពន្ធអនឡាញរបស់កូនៗ និង ចំណាយមនុស្សម្នាក់ ដើម្បីអង្គុយចាំមើលកូនសិក្សាតូចៗ។
តាមអាណាព្យាបាល ក៏បានឲ្យដឹងទៀតថា ដោយសារតែស្ថានភាពលំបាកបែបនេះ ទើបអាណាព្យាបាលសាលាវេស្ទើន អន្តរជាតិ មួយចំនួន ក៏បានមូលមតិគ្នាស្នើសុំបញ្ចុះតម្លៃសិក្សាតែម្តង។ តាមព័ត៌មានឲ្យដឹងថា នៅក្នុងការស្នើសុំ អាណាព្យាបាលសិស្ស ក៏បានធ្វើលិខិតស្នើសុំដូច ខាងក្រោម ៖ ១.កម្រិតN.ថ្នាក់ទី១២ សុំបញ្ចុះ តម្លៃសិស្សា៥០ភាគរយ ចាប់ពីខែមេសា ឆ្នាំ២០២០ រហូតដល់ស្ថានភាពជំងឺកូវីដ-១៩ អាចគ្រប់គ្រងបាន ហើយរដ្ឋាភិបាលប្រកាសឲ្យបើកថ្នាក់សិស្សដូចធម្មតាវិញ។
ដោយហេតុថា ចំនួនម៉ោងរៀន ក៏បានកាត់បន្ថយ(សិស្សនៅកម្រិតមត្តេយ្យរៀនបានត្រឹមកន្លះពេលតែប៉ុណ្ណោះ ចំណែកសិស្សធំៗ ក៏រៀនមិនបានគ្រប់ម៉ោងដូចកាលរៀននៅសាលាដែរ)។ ២.ថ្លៃរដ្ឋបាល សុំផ្អាកបង់សម្រាប់ ឆ្នាំសិក្សាថ្មី២០២០-២០២១ រហូតដល់ស្ថានភាពជំងឺកូវីដ-១៩ អាចគ្រប់គ្រងបានហើយ រដ្ឋាភិបាលប្រកាសឲ្យបើកថ្នាក់សិក្សាដូចធម្មតាវិញ។ និង៣.សម្រាប់តម្លៃសិក្សា២០២០ ២០២១ សុំបញ្ចុះតម្លៃ៥០ភាគរយដោយមិនកំណត់ចំនួនសិស្សរហូតដល់ពាក់កណ្តាលខែសីហា ឆ្នាំ២០២០។
នៅរសៀលថ្ងៃទី០៨ ខែមិថុនា ឆ្នាំ២០២០ អាណាព្យាបាលសិស្ស ក៏បានយកលិខិតស្នើសុំជួបជាមួយ អគ្គនាយកនៃសាលា វេស្ទើនអន្តរជាតិ ហើយលោកអគ្គនាយកក៏បានទទួលយកនូវសំណើខាងលើ ដោយ រង់ចាំជួបថ្នាក់ដឹកនាំសាលាដើម្បីពិភាក្សាដោះស្រាយ។ តាមព័ត៌មានឲ្យដឹងថា ទន្ទឹមការជួបស្នើសុំនោះ ខាងសាលាក៏បានស្នើសុំដល់អាណាព្យាបាលសូមកុំផ្តល់ព័ត៌មានដល់អ្នកកាសែត ផងដែរ។ ទោះបីជាយ៉ាងណាកោះសន្តិភាព ពុំទទួលបានការបំភ្លឺណាមួយពីសាលាវេស្ទើនអន្តរជាតិឡើយ៕ ដោយ ៖ ម៉េង ធា
ចែករំលែកព័តមាននេះ