របាយការណ៍ក្រុមអ្នកស្រាវជ្រាវបានបង្ហាញថា បុគ្គលដែលកើតមានជំងឺទឹកនោមផ្អែមអាចនឹងជួបហានិភ័យខ្ពស់ពីជំងឺមហារីកមួយចំនួន ។
ការវិភាគលើលទ្ធផលនៃការសិក្សាចំនួន១៦ដែលពាក់ព័ន្ធនឹងមនុស្ស៩០ម៉ឺននាក់នៅទូទាំងពិភពលោកបានរកឃើញថា អ្នកដែលកើតជំងឺទឹកនោមផ្អែម ជាទូទៅប្រឈមនឹងហានិភ័យពីជំងឺមហារីកប្រមាណជា១៥ភាគរយ ។ ចំណែកអ្នកដែលស្ថិតក្នុងដំណាក់កាលឈានទៅកើតជំងឺទឹកនោមផ្អែម (Prediabetes)ក៏ប្រឈមនឹងមហារីកដូចគ្នាផងដែរ ។
ការវិភាគបានបញ្ជាក់ថា បណ្តាជំងឺមហារីកដែលបុគ្គលទាំងនេះប្រឈមមានដូចជា មហារីក ក្រពះ លំពែង ថ្លើម សុដន់ ពោះវៀនត្រង់និងមហារីកស្បូន ។
ចំណែកការជាប់ពាក់ព័ន្ធគ្នារវាងអ្នកកើត Prediabetesនឹងមហារីក សួត ប្រូស្តាត អូវែរ តម្រងនោមក៏ដូចជាប្លោកនោមគឺពុំមានឡើយ ។ នេះបើយោងតាមការសិក្សាដែលបានចេញផ្សាយក្នុងព្រឹត្តិបត្រ Diabetologiaកាលពីពេលថ្មីៗកន្លងទៅនេះ ។ ការសិក្សានោះបានរកឃើញពីការជាប់ពាក់ព័ន្ធគ្នាមួយ តែមិនមែនជាការជាប់ពាក់ព័ន្ធហេតុនិងផលរវាងអ្នកកើត Prediabetesនឹងជំងឺមហារីកមួយចំនួននោះទេ ។
ទោះជាយ៉ាងណា ក្រុមអ្នកស្រាវជ្រាវបាននិយាយថា ការរកឃើញនោះនឹងបង្កើតឱ្យមានបញ្ហាស្មុគស្មាញដោយបានកត់សម្គាល់ថា អត្រានៃអ្នកកើត Prediabetesនិងជំងឺទឹកនោមផ្អែមបានកំពុងកើនឡើងនៅតាមបណ្តាប្រទេសកំពុងអភិវឌ្ឍ និងប្រទេសអភិវឌ្ឍជាច្រើន ។ឧទាហរណ៍ សម្រាប់តែជនជាតិអាមេរិកមួយ អត្រានៃអ្នកកើត Prediabetesក្នុងចំណោមពលរដ្ឋដែលមានអាយុ១៨ឆ្នាំឡើងទៅគឺឡើងពី២៩ភាគរយក្នុងឆ្នាំ១៩៩៩-២០០២ដល់៣៦ភាគរយក្នុងឆ្នាំ២០០៧-២០១០ ។
អ្នកដឹកនាំការស្រាវជ្រាវ សាស្ត្រាចារ្យ Yuli Huang មកពីមន្ទីរពេទ្យប្រជាជនទី១នៃស្រុកShunde ប្រទេសចិនបានថ្លែងថា៖«បើពិចារណាលើអត្រាប្រេវ៉ាឡង់ខ្ពស់នៃអ្នកកើត Prediabetesក៏ដូចជាការជាប់ពាក់ព័ន្ធដ៏សំខាន់រវាងអ្នកកើត Prediabetesនិងជំងឺមហារីកដូចបានបង្ហាញនៅក្នុងការសិក្សារបស់យើងនេះ អន្តរាគមន៏នៃចំនួនប្រជាជនដ៏ច្រើននេះ អាចមានផលប៉ះពាល់សុខភាពសាធារណៈដ៏ធំមួយ» ។
ក្រុមអ្នកស្រាវជ្រាវបាននិយាយថា ថ្នាំព្យាបាលជំងឺទឹកនោមផ្អែមmetforminត្រូវបានគេជឿថាអាចជួយការពារប្រឆាំងនឹងជំងឺមហារីកបាន ។ ពួកគេថា៖«ជាការកត់សម្គាល់ថ្នាំ metformin ជួយកាត់បន្ថយហានិភ័យកើតជំងឺមហារីកក្នុងជីវិតសម្រាប់អ្នកជំងឺទឹកនោមផ្អែម បានប្រមាណជា៣០ភាគរយ» ។
ដោយឡែក សម្រាប់អ្នកកើត Prediabetesវិញ គេមិនទាន់ដឹងច្បាស់នៅឡើយទេ ថាតើថ្នាំ metforminអាចមានប្រសិទ្ធភាពដែរឬយ៉ាងណា ។ ដូចនេះ ការសិក្សាទ្រង់ទ្រាយធំនិងប្រើរយៈពេលវែងចាំបាច់ត្រូវរៀបចំធ្វើដើម្បីកំណត់ឱ្យបានច្បាស់ ៕
ចែករំលែកព័តមាននេះ