កាមគឺចំណង់, សេចក្តីប្រាថ្នា, តម្រូវការគ្មានទីបំផុត ។ កាមនេះតែងដុតរោលចិត្តសត្វលោកឱ្យអន្ទះអន្ទែងស្ទុះទៅរកកងទុក្ខគ្មានទីបញ្ចប់ឡើយ ។ សមដូចពុទ្ធភាសិតត្រាស់ថា
កាមទាំងឡាយមិនទៀង មានទុក្ខច្រើន មានពិសច្រើន ជាឫសនៃសេចក្តីលំបាក មានទុក្ខជាផល ដូចជាដុំដែកក្តៅ តែវាជាតម្រេករបស់សត្វលោក ។
កាមនេះមានពីរយ៉ាងគឺ កិលេសសកាម១ វត្ថុកាម១ ។ កិលេសកាមបានដល់ គឺសេចក្តីសៅហ្មងចិត្តខាងក្នុងទាំងប៉ុន្មាន ឈ្មោះថាកិលេសកាម ។ ចំណែកវត្ថុកាមបានដល់រូប សំឡេង ក្លិន រស សម្ផស្ស ទាំង៥នេះឈ្មោះថាវត្ថុកាម។ កាមទាំងពីរប្រការនេះ រមែងជារបស់មិនទៀងទាត់ទេ តែងប្រែប្រួលផ្លាស់ប្តូរទៅជាធម្មតា គឺមិននៅនឹងនួនជួនបាន ជួនបង់ចិត្ត ចង់បានមិនចេះចប់ បាននេះហើយចង់បាននោះទៀតពោលគឺបានប៉ុណ្ណេះហើយ ចង់បានប៉ុណ្ណោះទៀតមិនស្កប់ចិត្តឡើយ ។
កាមទាំងពីរនេះឯងជាឫស ជាដើមចមនាំឱ្យកើតទុក្ខ ផលរបស់កាមមានតែទុក្ខច្រើនជាងសុខ កាមនេះឯងជាពិសដែលចាប់ពើតចិត្តសត្វលោកឱ្យក្តៅក្រហាយ អ្នកណាឈ្លក់ជក់ជាប់នឹងកាម អ្នកនោះឯងឈ្មោះថាជាប់ដៃនៅនឹងដុំដែកដ៏ក្តៅពន់ពេក មិនងាយនឹងត្រជាក់បានឡើយ ។ សាន សារិន
ចែករំលែកព័តមាននេះ