រាជធានីភ្នំពេញ ៖កាលពីព្រឹកថ្ងៃសុក្រ ទី៥ ខែមិថុនា ឆ្នាំ២០២០ លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្ប:បានដឹកនាំគណ:ប្រតិភូក្រសួងអញ្ជើញចូលរួមការពារសេចក្តីព្រាងច្បាប់ស្តីពីការយល់ព្រមឲ្យព្រះរាជាណាចក្រកម្ពុជា ចូលជាភាគីនៃអនុសញ្ញាទីក្រុងប៊ែន ស្តីពីកិច្ចការពារស្នាដៃអក្សរសាស្ត្រ និងសិល្ប:ឆ្នាំ១៨៨៦ និងវិសោធនកម្មឆ្នាំ១៩៧៩ ។ ការចូលរួមការពារនេះនៅវិមានរដ្ឋសភា ក្នុងសម័យប្រជុំរដ្ឋសភាលើកទី៤ នីតិកាលទី៦ ក្រោមអធិបតីភាពដ៏ខ្ពង់ខ្ពស់របស់សម្តេចមហាពញាចក្រី ហេង សំរិន ប្រធានរដ្ឋសភា ព្រមទាំងឯកឧត្ដម លោកជំទាវ ជាសមាជិកសមាជិការដ្ឋសភា ។
មុនឈានដល់ការអនុម័តលើសេចក្តីព្រាងច្បាប់នេះ បើតាមផេកហ្វេសប៊ុកក្រសួងវប្បធម៌ និងវិចិត្រសិល្បៈផ្សាយថា ឯកឧត្តមហ៊ុន ម៉ានី ប្រធានគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា បានឡើងធ្វើការរាយកាណ៍ ពីលទ្ធផលនៃការពិនិត្យលើសេចក្តីព្រាងច្បាប់ និងការសិក្សារួមអំពីអត្ថប្រយោជន៍ និងកាតព្វកិច្ចនានា ដែលព្រះរាជាណាចក្រកម្ពុជានឹងទទួលបានក្រោយការអនុម័តចូលជាភាគីនៃអនុសញ្ញាទីក្រុងប៊ែន ជូនដល់សម្តេចប្រធានរដ្ឋសភា និងអង្គសភាទាំងមូល ។
ជាមួយគ្នានេះឯកឧត្តម ឈាង វុន ប្រធានគណ:កម្មការទី៥ នៃរដ្ឋសភា និងលោកជំទាវឡោក ខេង ប្រធានគណៈកម្មការទី៨នៃរដ្ឋសភា ក៏បានសម្តែងមតិគាំទ្រចំពោះសេចក្តីព្រាងច្បាប់នេះផងដែរ ។
ប្រភពដដែលផ្សាយថា ការចូលជាភាគីនៃអនុសញ្ញាទីក្រុងប៊ែនស្តីពីកិច្ចការពារស្នាដៃអក្សរសាស្ត្រ និងសិល្ប:ឆ្នាំ១៨៨៦ និងវិសោធនកម្មឆ្នាំ១៩៧៩ នឹងផ្តល់ផលប្រយោជន៍ដល់កម្ពុជាដូចជា៖
១–ទទួលបានកិច្ចការពារស្នាដៃអក្សរសាស្ត្រ សិល្បៈ និងវិទ្យាសាស្ត្រក្នុងក្របខណ្ឌជាតិនិងអន្តជាតិ ។
២-អភិវឌ្ឍធនធានមនុស្សក្នុងវិស័យវប្បធម៌ អក្សរសាស្ត្រ សិល្បៈនិងវិទ្យាសាស្ត្រ ។
៣-ទាក់ទាញការវិនិយោគលើវិស័យឧស្សាហកម្មច្នៃប្រឌិត ។
៤-បង្កើនផលិតផលវប្បធម៌ក្នុងស្រុក ថ្មីៗដើម្បីប្រកួតប្រជែងក្នុងសម័យសាកល-ភាវូបនីយកម្ម ។
៥-បង្កើតការងារក្នុងស្រុក និងបង្កើនចំណូលថវិកាជាតិ ដែលស្របនឹងយុទ្ធសាស្ត្រចតុកោណដំណាក់ទី៤ របស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោនាយករដ្ឋមន្ត្រីនៃព្រះរាជាណាចក្រកម្ពុជា ក្នុងចំណុចទី៥នៃមុំទី២ចតុកោណទី២ ដែលបានដាក់ចេញនូវ «ការជំរុញការអភិវឌ្ឍវិស័យសេវាកម្សាន្ត អក្សរសាស្ត្រ សិល្បៈ គំនូរជីវចល និងភាពយន្ត ដែលជាឧស្សាហកម្មច្នៃប្រឌិតមានសក្តានុពលខ្ពស់ក្នុងការបង្កើតតម្លៃបន្ថែម និងបង្កើតការងារ ព្រមទាំងការលើកកម្ពស់ការផលិត និងការប្រើប្រាស់ផលិតផលក្នុងស្រុកជាពិសេសផលិតផលមានលក្ខណៈ ប្រពៃណីខែ្មរ និងផលិតផលសម្គាល់ភូមសាស្ត្រ»៕ (កែសម្រួលដោយ ៖ បុប្ផា)
ចែករំលែកព័តមាននេះ