រាជធានីភ្នំពេញ ៖ រថយន្តដឹកទឹកកកម៉ាកKIAមួយគ្រឿង បានបើកឡើងចំណោតមិនរួច ក៏រអិលថយក្រោយទៅបុកស្លាកយីហោសាលារៀនអន្តរជាតិអាមេរិកាំងប្រ៊ីជ បណ្តាលអោយរលំបាក់រាប់ដល់ដី ចំណែករថយន្តនោះក្រឡាប់ដេកស្តូក។
ហេតុការណ៍គ្រោះថ្នាក់ខាងលើនេះបានកើតឡើងកាលពីវេលាម៉ោង៦និង៣០នាទីព្រឹកថ្ងៃទី៥ ខែមិថុនា ឆ្នាំ២០២០ ស្ថិតនៅចំណុចផ្លូវបេតុងខារ៉ាអូខេបុប្ចារាជធានីភ្នំពេញ កែងផ្លូវលេខ២៧៣ ក្នុងសង្កាត់ទួលសង្កែ១ ខណ្ឌឬស្សីកែវ ។
រថយន្តដឹកទឹកកកមួយគ្រឿងខាងលើ ម៉ាកKIA ពណ៌ខៀវ ពាក់ស្លាកលេខ ភ្នំពេញ ២AF-៤០៧៥ បើកបរ ដោយបុរសម្នាក់មិនប្រាប់អោយស្គាល់អត្តសញ្ញាណឡើយ ។
តាមសាក្សីបានអោយដឹងថា នៅមុនពេលកើតហេតុ គេឃើញរថយន្តKIAដឹកទឹកកកខាងលើ បានបើកបរ ក្នុងទិសដៅពីជើងទៅត្បូងនិងបានឡើង ផ្លូវលេខ២៧៣ ដែលមានស្ថានភាពផ្លូវចោទ។
តាមប្រភពដដែលបានអោយដឹងបន្តថា លុះនៅពេលឡើងចំណោតទំនងជាអកហ្សើឡើងមិនរួចក៏បានរលត់ម៉ាស៊ីនរអិលថយក្រោយជ្រុលបុកស្លាកយីហោសាលារៀនអន្តរជាតិអាមេរិកាំងប្រ៊ីជ បណ្តាលឱ្យរលំបាក់រាបដល់ដី ហើយរថយន្តក្រឡាប់ដេកស្តូកតែម្តង ។ ភ្លាមៗនោះអ្នកបើកបរក៏បានលូនចេញពីក្នុងរថយន្ត ដោយពុំមានរងរបួសឡើយ ។
ក្រោយពេលកើតហេតុ អ្នកបើកបរក៏បានទាក់ទងទៅថៅកែហៅរថយន្តផ្សេងមកស្ទួចលើកឡើងវិញ និងបានចេញថ្លៃជួលជុលស្លាកយីហោអោយសាលាវិញ ៕ (កែសម្រួលដោយ ៖ ធីតា)
ចែករំលែកព័តមាននេះ