សុខទុក្ខកើតមកអំពីចិត្តជាអ្នកកំណត់

ថ្ងៃទី ០១ ខែ មិថុនា ឆ្នាំ ២០២០

ម៉ោង ០៩:១៤

នៅក្នុងគម្ពីរអភិធម្មបានបរិយាយអំពីចិត្តជាអនេកដូចត្រង់ថា ចិត្តរបស់យើងកាលណាមិនបានអប់រំល្អហើយ ចិត្តនេះនឹងលោតកញ្ជ្រោលទៅតាមចំណង់ដែលលោភលន់ចង់បានគ្មានទីបំផុត ចំណុចនេះហើយដែលចេះតែធ្វើឱ្យចិត្តរងនូវសេចក្តីទុក្ខក្តៅក្រហាយមិនលស់ថ្ងៃ ។

តាមពិតទៅដំណោះស្រាយចំពោះការមិនសប្បាយចិត្តក្នុងរឿងផ្សេងៗមិនមែននៅត្រង់ការព្យាយាមធ្វើអ្វីៗគ្រប់យ៉ាងឲ្យបានដូចចិត្តនោះទេ គឺត្រូវដោះស្រាយដោយការព្រមទទួលថា ក្នុងលោកនេះមិនមានអ្វីដែលចេះតែបានមកដូចចិត្តយើងចង់គ្រប់យ៉ាងនោះឡើយ ម្យ៉ាងទៀតគប្បីសិក្សាថា ការមិនសប្បាយចិត្តនេះ គ្រាន់តែជានាមធម៌មួយបែបប៉ុណ្ណោះ តែបើយើងអប់រំចិត្តបានល្អហើយ សេចក្តីទុក្ខក៏មិនមាន ឯសេចក្តីសុខក៏កើតឡើងភ្លាមមួយរំពេច ។

ហេតុនេះទើបអ្នកខាងចិត្តសាស្ត្រពោលថា ការអប់រំចិត្តបានល្អហើយជាគន្លងនៃសេចក្តីសុខយូរអង្វែងព្រោះចិត្តជាប្រធាន ចិត្តជាអ្នកកំណត់ ចិត្តជាធំ កិច្ចការអ្វីសម្រេចមកអំពីចិត្ត ។ សាន សារិន