រាជធានីភ្នំពេញ ៖ ក្រុមហ៊ុននាំចេញនាំចូលនីកនអភិវឌ្ឍន៍ត្រេឌីង អីុមផត អិុចផត ត្រូវបានគណៈកម្មាធិការបង្ក្រាបបទល្មើសភាពយន្តនិងវីដេអូ សហការជាមួយនគរបាលនាយកដ្ឋានសន្តិសុខផ្ទៃក្នុងក្រសួងមហាផ្ទៃ ចុះឆែកឆេរបង្ក្រាប បន្ទាប់ពីសមត្ថកិច្ចស្រាវជ្រាវដឹងថា ក្រុមហ៊ុននេះបានថតចម្លងវីស៊ីឌី
រាជធានីភ្នំពេញ ៖ ក្រុមហ៊ុននាំចេញនាំចូលនីកនអភិវឌ្ឍន៍ត្រេឌីង អីុមផត អិុចផត ត្រូវបានគណៈកម្មាធិការបង្ក្រាបបទល្មើសភាពយន្តនិងវីដេអូ សហការជាមួយនគរបាលនាយកដ្ឋានសន្តិសុខផ្ទៃក្នុងក្រសួងមហាផ្ទៃ ចុះឆែកឆេរបង្ក្រាប បន្ទាប់ពីសមត្ថកិច្ចស្រាវជ្រាវដឹងថា ក្រុមហ៊ុននេះបានថតចម្លងវីស៊ីឌីរំលោភកម្មសិទ្ធិបញ្ញា ដោយដកហូតបានវីស៊ីឌីចំនួន១០.៤០០បន្ទះ និងម៉ាស៊ីនផលិតចំនួន១២គ្រឿង ហើយនាំខ្លួននាយកក្រុមហ៊ុននិងបុគ្គលិក៣នាក់ទៅសាកសួរផងដែរ ។
ប្រតិបត្តិការនេះ បានធ្វើឡើងកាលពីវេលាម៉ោង៨ព្រឹកថ្ងៃទី២០ វិច្ឆិកា នៅក្រុមហ៊ុនខាងលើដែលមានទីតាំងនៅផ្ទះលេខ៨៩ ផ្លូវលេខ២៣៣ សង្កាត់ផ្សារដេប៉ូទី៣ ខណ្ឌទួលគោក ដឹកនាំដោយលោក គង់ សំសារ៉េត ព្រះរាជអាជ្ញារងអមសាលាដំបូងរាជធានីភ្នំពេញ និងលោកឧត្តមសេនីយ៍ទោ សៅ ប៊ុនធឿន អនុប្រធាននាយកដ្ឋានសន្តិសុខផ្ទៃក្នុងក្រសួងមហាផ្ទៃ ។
តាមព័ត៌មានឱ្យដឹងថា ការឈានទៅឆែកឆេរបង្ក្រាបវីស៊ីឌីថតចម្លងនេះ គឺបន្ទាប់ពីមានការស្រាវពីគណៈកម្មាធិការអន្តរក្រសួងបង្ក្រាបបទល្មើសភាពយន្តនិងវីដេអូ រកឃើញទីតាំងខាងលើនេះ ថតចម្លងនិងចែកចាយស៊ីឌី វីស៊ីឌី និងឌីវីឌីខុសច្បាប់ ដែលផ្ទុយពីអនុក្រឹត្យលេខ៦៣ អនក្រ.បក ស្តីពីគ្រប់គ្រងសិល្បៈភាពយន្តនិងវីដេអូ ចុះថ្ងៃទី៤ កញ្ញា ឆ្នាំ២០០០ របស់រាជរដ្ឋាភិបាល ។
តាមមន្ត្រីនគរបាលឱ្យដឹងទៀតថា ក្រុមហ៊ុននេះ ដែលមានអ្នកស្រី ចាង ពៅ ជាប្រធានបានបើកថតចម្លងវីស៊ីឌីរឿងវីដេអូគ្រប់ប្រភេទ ក្នុងនោះមានតែ២រឿងទេ គឺរឿងថៃ «ចិត្តស្នេហ៍ម៉ឺនឆ្នាំ» និងរឿង«ល្បិចបោកអាប»ដែលមានទិដ្ឋាការ ក្រៅពីនោះជារឿងដែលត្រូវក្រុមហ៊ុនលួចថតចម្លងដោយខុសច្បាប់រំលោភកម្មសិទ្ធិបញ្ញា «ដោយផលិតខុសច្បាប់ជ្រកក្រោមច្បាប់» ។ នៅពេលចុះឆែកឆរ សមត្ថកិច្ចរកឃើញមានវីស៊ីឌីរឿងគ្មានទិដ្ឋាការ ចំនួន
១០.៤០០បន្ទះ ក្នុងនោះក៏មានវីស៊ីឌីចំនួន១.៦៦០បន្ទះ រំលោភលើកម្មសិទ្ធិបញ្ញារបស់សមាគមភាពយន្ត ដែលរឿងខ្លះគេនាំចូលបញ្ចាំងនៅរោងភាពយន្តបានតែ៥ថ្ងៃ ក៏ត្រូវក្រុមហ៊ុនថតចម្លងចុសច្បាប់ចែកចាយពេញទីផ្សារ ។
តាមសមត្ថកិច្ចបានឱ្យដឹងថា នៅពេលឆែកឆេរនោះ ក្រៅពីវីស៊ីឌីថតចម្លងខុសច្បាប់ ចំនួន១០.៤០០បន្ទះ នៅមានទូម៉ាស៊ីនសម្រាប់ផលិតចំនួន១២គ្រឿង ក៏ត្រូវបានដកហូតដែរ និងនាំខ្លួនប្រធានក្រុមហ៊ុននិងបុគ្គលិកចំនួន៣នាក់ទៅសាកសួរ ។
តាមព័ត៌មានពីសមត្ថកិច្ចបានឱ្យដឹងថា ក្រុមហ៊ុននោះ មានច្បាប់អាជីវកម្ម មានទីតាំងនៅផ្ទះលេខ៩១ ភូមិបែកចានថ្មី សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង ហើយបានមកជួលផ្ទះខាងលើ ថតចម្លងវីស៊ីឌីខុសច្បាប់ដោយ មានទិដ្ឋាការតែ២រឿងប៉ុណ្ណោះ ។ ទោះបីជាយ៉ាងណា ម្ចាស់ក្រុមហ៊ុនអ្នកស្រី ចាង ពៅ បានអះអាងថា វីស៊ីឌីថតចម្លងទាំងនោះ មិនមែនផលិតនៅក្រុមហ៊ុនេះទេ គឺគាត់ទិញមកពីផ្សារតែសមត្ថកិច្ចបានឱ្យដឹងថា នេះជាការឆ្លើយដោះសាប៉ុណ្ណោះព្រោះសមត្ថកិច្ចបានរកឃើញទាំងម៉ាស៊ីនផលិត និងវីស៊ីឌីស្រោមជាច្រើនទៀត ដែលមានទាន់ផលិតផងដែរ ៕
ចែករំលែកព័តមាននេះ