ខេត្តពោធិ៍សាត់ ៖ ផ្សិតប៉ក់ ឫផ្សិតផូងផាំង គឺជាប្រភេទផ្សិតភ្នំម្យ៉ាង ដែលសំបូរនៅស្រុកពីរប៉ុណ្ណោះ គឺស្រុកភ្នំក្រវាញ និងស្រុកវាលវែង ហើយជាប្រភេទផ្សិតដែលលក់បានថ្លៃ និងមានរសជាតិឆ្ងាញ់ ប្លែកខុសពីផ្សិតធម្មតា ។
បើតាមការបញ្ជាក់របស់អាជ្ញាធរមូលដ្ឋាន ផ្សិតប្រភេទនេះ កើតចេញពីផេះផង់ នៃភ្លើងឆេះព្រៃកន្លងមក លុះត្រូវបានការស្រោចស្រព ដោយដំណក់ទឹកភ្លៀង ក៏កើតចេញជាផ្សិតនេះឡើង ហើយផ្សិតប្រភេទនេះ គឺខុសពីផ្សិតធម្មតា ត្រង់វាដុះនៅក្នុងដី ដែលមានរាងមូលដូចពងក្រួច ហើយគេអាចសម្គាល់បាន ដោយឃើញមានដី ពើងប្រះឡើងលើ នៅតំបន់ដែលធ្លាប់មានភ្លើងឆេះព្រៃកន្លងមក ហើយបើយើងមិនត្រូវបានបង្ហាញពីអ្នកធ្លាប់រកផ្សិតនេះទេ នោះយើងមិនអាចរកវាឃើញទេ ។
យោងតាមមន្ទីរព័ត៌មានខេត្តពោធិ៍សាត់ បានឲ្យដឹងថា ប្រជាពលរដ្ឋដែលមករកផ្សិតប៉ក់ ឫផ្សិតផូងផាំងនេះ បានធ្វើដំណើរមកពីទីជិតឆ្ងាយ រួមមានបងប្អូន ក្នុងមូលដ្ឋានផ្ទាល់ មកពីស្រុកភ្នំក្រវាញ និងបងប្អូនប្រជាពលរដ្ឋដែលរស់នៅតាមព្រំប្រទល់ នៃស្រុកវាលវែង ។ ពួកគាត់បានវេចបាយម្ហូប ចេញទៅរកផ្សិតនេះ តាំងពីព្រលឹម រហូតដល់ម៉ោង៣ ទៅម៉ោង៤ រសៀល ទើបពួកគាត់ត្រលប់ទៅផ្ទះវិញ ។
អ្នករកផ្សិតប៉ក់ម្នាក់ បានប្រាប់ថា គាត់អាចរកចំណូលពីផ្សិតប៉ក់នេះ ក្នុងមួយថ្ងៃ ចាប់ពី១៥ ទៅ៣៥ម៉ឺនរៀល ហើយថ្ងៃខ្លះ លើសនេះក៏មាន ចំណែកតម្លៃលក់ឲ្យឈ្មួញកណ្តាល គឺចាប់ពី៣៥,០០០រៀល ឡើងទៅ ក្នុង១គីឡូក្រាម ។ ប៉ុន្តែតម្លៃនេះ ទាបជាងឆ្នាំមុន ដោយឆ្នាំមុនៗ លក់បានរហូតដល់៥ម៉ឺនរៀលឡើង ក្នុង១គីឡូក្រាម ។
ចំណែកក្រុមឈ្មួញកណ្តាល បានអះអាងថា ពួកគាត់ម្នាក់ៗ បានចំណាយលុយទិញផ្សិតប្រភេទនេះ ចាប់ពី២០លានរៀល ទៅ៣០លានរៀល ក្នុងមួយថ្ងៃ អ្នកខ្លះទិញយកទៅលក់បន្ត ឲ្យម៉ូយ មកពីស្រុកភ្នំក្រវាញ អ្នកខ្លះទៀតទិញយកទៅលក់ផ្ទាល់នៅច្រកព្រំប្រទល់ខ្មែរ-ថៃ ក្នុងខេត្តប៉ៃលិន បន្ទាយមានជ័យ ព្រះវិហារជាដើម ។
ក្រុមឈ្មួញ ដែលតែងតែនាំចេញទៅលក់នៅប្រទេសថៃ បានលើកឡើងថា ផ្សិតប៉ក់ លក់បានតម្លៃខ្ពស់ មានតែលក់ឲ្យប្រទេសថៃទេ មានប៉ុន្មាន គេទទួលទិញយកទាំងអស់ ប៉ុន្តែពួកគាត់មិនបានដឹងថា គេយកទៅធ្វើជាអ្វីបន្តទៀតទេ ។
ជាធម្មតា បងប្អូនប្រជាពលរដ្ឋខ្មែរ និយមយកផ្សិតប៉ក់ ឫផ្សតិផូងផាំងនេះ មកស្ងោ រឺឆា ក៏បាន ដោយវាមានរសជាតិឆ្ងាញ់ខុសប្លែកពីផ្សិតទូទៅ ។
សូមបញ្ជាក់ថាផ្សិតប៉ក់នេះ នៅពេលដែលមានភ្លៀងធ្លាក់ផ្សិតនេះនឹងដុះ រហូតដល់ពេលដែលភ្លៀងធ្លាក់ជោគជាំ ទើបផ្សិតនេះឈប់ដុះ ហើយកសិករអាចដើរជីកផ្សិតនេះបានយកមកលក់ ចាប់ពីពាក់កណ្តាលខែមេសា រហូតដល់ខែកក្កដា ទើបផ្សិតនេះផុតរដូវកាលសម្រាប់ប្រមូលផល ។
កាលពីថ្ងៃទី១៥ ខែឧសភា ឆ្នាំ២០១៩ អ្នកស្រី ថន ស្រីមុំ បានប្រាប់ថា ក្នុងមួយថ្ងៃៗ អាជីវករ នៅក្នុងផ្សារច្រកទ្វារអានសេះ អាចលក់បានចន្លោះពី២០គីឡូក្រាម ទៅ៥០គីឡូក្រាម ដោយក្នុងមួយគីឡូក្រាម ទទួលបានតម្លៃ ចាប់ពី៤៥០បាត ទៅ៥០០បាត (ប្រមាណជា ៥៧,០០០ ទៅ ៦៣,០០០រៀល) ទៅតាមគុណភាពផ្សិត ហើយអាចឲ្យអាជីវកររកប្រាក់ចំណូលបានក្នុងមួយថ្ងៃ ចន្លោះពី ២,០០០ បាត ទៅ ៥,០០០ ពាន់បាត ដែរ (ប្រមាណពី ២៥ម៉ឺនរៀល ដល់ជាង ៦៣ម៉ឺនរៀល) ។ ក្នុងរដូវកាលនេះ ផ្សិតប៉ក់ ដែលដុះដោយធម្មជាតិនោះ ជាអាហារដ៏ពេញនិយមបំផុតរបស់ជនជាតិថៃ ។
ជាមួយគ្នានេះជនជាតិថៃម្នាក់ដែលបានចូលមកទិញបន្លែ និងទំនិញផ្សេងៗនៅទឹកដីកម្ពុជាក្នុងផ្សារច្រកទ្វាអានសេះនេះ បានលើកឡើងថាមូលហេតុដែលពួកគេបាននាំគ្នាមកទិញផ្សិតប៉ក់ ក៏ដូចជាបន្លែព្រៃផ្សេងៗនេះពីអាជីវករខ្មែរដោយសារតែនៅក្នុងទឹកដីថៃ ពុំសូវមាន បន្លែប្រភេទទាំងអស់នេះទេ ម្យ៉ាងវិញទៀតនៅក្នុងព្រៃទឹកដីរបស់ពួកគេសម្បូរគ្រាប់មីន ដូច្នេះហើយទើបពុំមាននរណាម្នាក់ ចូលទៅរកបន្លែ ទាំងនេះយកមកលក់ ៕
ចែករំលែកព័តមាននេះ