រដ្ឋមីនីសូតា,សហរដ្ឋអាមេរិក ៖ មន្ត្រីប៉ូលីស Minneapolis ចំនួន៤នាក់ ត្រូវបានបណ្តេញចេញពីការងារហើយ កាលពីថ្ងៃអង្គារ ទី២៦ ឧសភា (ម៉ោងក្នុងតំបន់) ចំពោះការស្លាប់របស់បុរសស្បែកខ្មៅម្នាក់ ដែលបានឃើញនៅលើវីដេអូរបស់សាក្សីដែលបានឈរថតនៅលើចិញ្ចើមផ្លូវ ដោយជនរងគ្រោះដង្ហក់ខ្យល់និងស្រែកថ្ងូរថា “ខ្ញុំមិនអាចដកដង្ហើមបានទេ” ខណៈដែលមន្ត្រីប៉ូលិសស្បែកសម្នាក់ លុតជង្គង់សង្កត់លើកញ្ចឹងករបស់គាត់ អស់រយៈពេលជាច្រើននាទី រហូតដល់បាត់បង់ស្មារតី ក្រោយមកក៏បានស្លាប់ ។
មរណភាពរបស់លោក George Floyd អាយុជាង៤០ឆ្នាំ បានជំរុញឲ្យផ្ទុះការតវ៉ាទូទាំងប្រទេស ពិសេសនៅកន្លែងដែលបុរសស្បែកខ្មៅត្រូវចាប់ខ្លួន ក្រុមបាតុករប្រមូលផ្តុំគ្នាតវ៉ាប្រឆាំងនឹងភាពឃោរឃៅរបស់ប៉ូលីស ។ ក្រុមបាតុករស្រែក អមដោយពាក្យស្លោករបស់បុរសស្បែកខ្មៅថា “ខ្ញុំមិនអាចដកដង្ហើមបាន” វាបានក្លាយជាសម្រែកយំ សម្រាប់ចលនា Black Lives Matter ដែលអំពាវនាវឲ្យមានការចាប់អារម្មណ៍ចំពោះរលកនៃការរើសអើងជាតិសាសន៍ ជនជាតិអាមេរិក ដើមកំណើតអាហ្វ្រិក និងជនជាតិភាគតិចដទៃទៀត ដែលបានស្លាប់នៅចំពោះមុខប៉ូលីស ដោយប្រើកម្លាំងដ៍សាហាវ ដែលមិនសមហេតុផល ។
ករណីដូចគ្នានេះ ត្រូវបានក្រុមអ្នកតវ៉ា រម្លឹកដល់ការសម្លាប់លោក Eric Garner កាលពីឆ្នាំ២០១៤ ជាបុរសស្បែកខ្មៅគ្មានអាវុធ ដែលបានស្លាប់ បន្ទាប់ពីប៉ូលីសនៅទីក្រុងញូវយ៉ក ចាប់ដាក់នៅក្នុងប៉ុស្តិ៍ ហើយបុរសនោះប្រាប់ទៅមន្ត្រី ដូចគ្នាថា “ខ្ញុំមិនអាចដកដង្ហើមបានទេ” ។
មេប៉ូលីសទីក្រុង Minneapolis គឺលោក Medaria Arradondo បានធ្វើសន្និសីទសារព័ត៌មានថា ការិយាល័យស៊ើបអង្កេតរបស់ប៉ូលិសព្រហ្មទណ្ឌកម្រិតស្រាល បានបើកការស៊ើបអង្កេតលើឧប្បត្តិហេតុនេះហើយតាមការស្នើសុំរបស់គាត់ ។
ខ្សែវីដេអូគួរឱ្យតក់ស្លុត ដែលថតដោយអ្នកឈរមើលនៅល្ងាចថ្ងៃចន្ទទី២៥ ឧសភា បានបង្ហាញពីមន្ត្រីប៉ូលីសនៅទីក្រុង Minneapolis ក្នុងរដ្ឋមីនីសូតា ស្បែកស បានចាប់បុរសស្បែកខ្មៅម្នាក់ ដាក់ខ្នោះឲ្យក្រាបលើថ្នល់ ដោយយកជង្គង់សង្កត់កជាប់ រហូតដល់សន្លប់បាត់បង់ស្មារតី ទោះបីខំអង្វរថា “ខ្ញុំមិនអាចដកដង្ហើមបាន” វីដេអូ បង្កការខឹងសម្បារ ដោយសារប៉ូលិសចាប់សង្កត់កជាប់ រហូតដាច់ដង្ហើម ។
មេធាវី Benjamin Crump របស់ក្រុមគ្រួសារលោក Floyd បាននិយាយនៅក្នុងសេចក្តីថ្លែងការណ៍មួយថា “ការប្រើកម្លាំងរំលោភបំពានហួសប្រមាណ និងអមនុស្សធម៌នេះ ធ្វើឱ្យជីវិតបុរសស្បែកខ្មៅម្នាក់ ត្រូវបាត់បង់” ។
តើមានមនុស្សស្លាប់ប៉ុន្មាននាក់ទៀត ខណៈពេលដែលជនជាតិស្បែកខ្មៅ ត្រូវទទួលរងរហូតដល់ការរើសអើងជាតិសាសន៍ និងការវាយតម្លៃទៅលើជីវិតស្បែកខ្មៅ របស់ក្រុមមន្ត្រីប៉ូលីស? ៕
ចែករំលែកព័តមាននេះ