រាជធានីភ្នំពេញ៖ ទន្ទឹមនឹងជំងឺកូវីដ១៩កំពុងក្លាយជាបញ្ហាចោទសម្រាប់ពិភពលោកក៏ដូចជាកម្ពុជានាពេលបច្ចុប្បន្ននេះ រាជរដ្ឋាភិបាលកម្ពុជាបាននិងកំពុងរៀបចំហើយគ្រោងដាក់ចេញក្នុងពេលឆាប់ៗនូវកម្មវិធីជំនួយសង្គមដើម្បីជួយសម្រាលការលំបាកនិងរក្សាលំនឹងជីវភាពរបស់ប្រជាជន ខណៈនៅពេលកន្លងមករាជរដ្ឋាភិបាលបានដាក់ចេញវិធានការអន្តរាគមន៍៣ជុំរួចទៅហើយដើម្បីជួយស្រោចស្រង់វិស័យឯក។
លោកអគ្គបណ្ឌិតសភាចារ្យ អូន ពន្ធមុន្នីរ័ត ឧបនាយករដ្ឋមន្ត្រីរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុលើកឡើងក្នុងការចុះបញ្ជីជាផ្លូវការរបស់ធនាគារអេស៊ីលីដានៅក្រុមហ៊ុនផ្សារមូលបត្រកម្ពុជាថ្ងៃទី២៥ ឧសភា ថាជំងឺកូវីដ១៩បានបង្កឡើងនូវបញ្ហាប្រឈមមុតស្រួចមិនធា្លប់មានពីមុនមកសម្រាប់សកលលោកទាំងមូលក៏ដូចជាសម្រាប់កម្ពុជាយើង។ក្នុងបរិកានេះ ទន្ទឹមនឹងបង្កើនចំណាយថវិកាលើវិស័យសុខាភិបាលដើម្បីគ្រប់គ្រងនិងទប់ស្កាត់នៃការទប់ស្កាត់ជំងឺកូវីដ១៩រាជរដ្ឋាភិបាលកម្ពុជាបានដាក់ចេញជាបន្តបន្ទាប់នូវកញ្ចប់វិធានការដើម្បីរក្សាលំនឹងសកម្មភាពអាជីវកម្មដែលរងផលប៉ះពាល់ធ្ងន់ធ្ងរ ជួយសម្រាលដល់ជីវកម្មភាពកម្មករ និយោជិត និងប្រជាពលរដ្ឋកម្ពុជាទូទៅ។
លោកបណ្ឌិតបញ្ជាក់ថា «រាជរដ្ឋាភិបាលបាននិងកំពុងរៀបចំហើយគ្រោងដាក់ចេញក្នុងពេលឆាប់ៗនូវកម្មវិធីជំនួយសង្គមដើម្បីជួយសម្រាលការលំបាកនិងរក្សាលំនឹងជីវភាពរបស់ប្រជាជនតាមរយៈការអនុវត្តកម្មវិធីផ្ទេរសាច់ប្រាក់សម្រាប់ក្រុមគ្រួសារប្រជាជនក្រីក្រខ្វះខាត»។
លោកបណ្ឌិតបន្តថា កម្មវិធីសាច់ប្រាក់ពលកម្ម, ការបណ្តុះបណ្តាលជំនាញរយៈពេលខ្លី ដើម្បីបង្កើនលទ្ធភាពអាជីវកម្មផ្ទាល់ខ្លួននឹងឈានទៅចាប់យកការងារក្នុងវិស័យថ្មី សម្រាប់គម្រោងហិរញ្ញវប្បទានសម្រាប់ទុនបង្វិល ដើម្បីបំពេញតម្រូវការរបស់រោងចក្រនិងសហគ្រាសនិងអាជីវកម្មទាំងអស់។ជាងនេះទៀតក្នុងស្មារតីបុរេសកម្ម ដើម្បីស្តារនិងជំរុញកំណើនសេដ្ឋកិច្ចឡើងវិញបន្ទាប់ពីជំងឺកូវីដ១៩ រាជរដ្ឋាភិបាលបាននិងកំពុងត្រៀមវិធានការជាកញ្ចប់គ្រប់ជ្រុងជ្រោយ ដោយផ្តោតជាសំខាន់ទៅលើការពង្រឹងភាពប្រកួតប្រជែងសេដ្ឋកិច្ចនិងបង្កើនល្បឿននៃការធ្វើពិពិធកម្មមូលដ្ឋានសេដ្ឋកិច្ច។
ស្ថិតក្នុងបរិកាប្រទេសកម្ពុជាជួបវិបត្តិនៃជំងឺកូវីដ១៩នេះបើតាមលោកបណ្ឌិតមានប្រសាសន៍ដូច្នេះថា រាជរដ្ឋាភិបាលកម្ពុជាបានដាក់ចេញវិធានការអន្តរាគមន៍ចំនួន៣ជុំរួចមកហើយដើម្បីជួយស្រោចស្រង់វិស័យឯកជន ជាពិសេសៗនៅក្នុងវិស័យសំខាន់ៗដូចជាវិស័យទេសចរណ៍,អាកាសចរណ៍ និងកាត់ដេរវាយនភ័ណ្ឌ ព្រមទាំងរក្សាលំនឹងជីវភាពរបស់កម្មករនិយោជិកដែលបម្រើការនៅក្នុងវិស័យទាំងនេះ ហើយដែលទទួលរងផលប៉ះពាល់ធ្ងន់ធ្ងរ តាមរយៈការលើកទឹកចិត្តនិងការអនុគ្រោះផ្នែកសារពើពន្ធ ការអនុញ្ញាតមិនឱ្យបង់ប្រាក់វិភាគទាន របបហានិភ័យលើការងារនិងថែទាំងសុខភាព,ការលើកលែងការអនុគ្រោះនិងការលើកលែងការបង្កើនសន្ទនីភាពនៅក្នុងទីផ្សារ។
បើតាមលោកបណ្ឌិត ក្រោមការដឹកនាំរបស់សម្តេចតេជោហ៊ុនសែន បានដាក់ចេញនិងអនុវត្តនូវគោលនយោបាយ យុទ្ធសាស្ត្រ និងវិធានការកែទម្រង់មុតស្រួចជាច្រើនសំដៅធានាបាននូវការអភិវឌ្ឍទាំងសេដ្ឋកិច្ចនិងសង្គមប្រកបដោយចីរភាព។ជាក់ស្តែងនៅក្នុងរយៈពេលជាងពីរទសវត្សរ៍ចុងក្រោយនេះជាមួយសុខសន្តិភាព ស្ថិរភាពនយោបាយនិងក្របខណ្ឌនយោបាយ ម៉ាក្រសេដ្ឋកិច្ចអនុគ្រោះ ប្រទេសជាតិសម្រេចបានកំណើនសេដ្ឋកិចិ្ចខ្ពស់ប្រមាណជាង៧%ជាមធ្យមប្រចាំឆ្នាំ ដែលកំណើននេះបានប្រែក្លាយកម្ពុជាពីប្រទេសមានចំណូលកម្រិតទាបទៅជាប្រទេសមានចំណូលមធ្យមកម្រិតទាបកាលពីឆ្នាំ២០១៥ហើយនៅឆ្នាំ២០១៦ កម្ពុជាត្រូវបានប្រសិទ្ធនាមថាជាក្លាសេដ្ឋកិច្ចថ្មីនៅអាស៊ី។
កម្ពុជាមិនត្រឹមសម្រេចបាននូវកំណើនសេដ្ឋកិច្ចខ្ពស់ប៉ុណ្ណោះទេប៉ុន្តែ ថែមទាំងសម្រេចបាននៅការផ្លាស់ប្តូររចនាសម្ព័ន្ធសេដ្ឋកិច្ច ពោលគឺបានផ្លាស់ប្តូរពីប្រទេសមានមូលដ្ឋានសេដ្ឋកិច្ចតូចចង្អៀតនឹងពឹងផ្អែកខ្លាំងទៅលើវិស័យកសិកម្ម ទៅជាប្រទេសមានមូលដ្ឋានសេដ្ឋកិច្ចទូលាយជាងមុន និងពឹងផ្អែកជាសំខាន់លើវិស័យឧស្សាហកម្មនិងសេវាកម្ម៕
ចែករំលែកព័តមាននេះ