ខេត្តកំពង់ឆ្នាំង ៖ ពស់ថ្លាន់មួយក្បាល បានត្រូវប្រជាពលរដ្ឋប្រទះឃើញកាលពីរសៀលថ្ងៃទី២៣ ខែឧសភា ឆ្នាំ២០២០ នៅក្នុងព្រៃលិចទឹកខាងក្រោយវត្តយុគន្ធរ ស្ថិតក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌…
ខេត្តកំពង់ឆ្នាំង ៖ ពស់ថ្លាន់មួយក្បាល បានត្រូវប្រជាពលរដ្ឋប្រទះឃើញកាលពីរសៀលថ្ងៃទី២៣ ខែឧសភា ឆ្នាំ២០២០ នៅក្នុងព្រៃលិចទឹកខាងក្រោយវត្តយុគន្ធរ ស្ថិតក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ ខណៈដែលពស់ថ្លាន់ដ៏ធំមួយក្បាលនេះ កំពុងសម្ងំក្រាបពងនៅក្រោមដើមឈើរលំ១ដើម ។
នារសៀលថ្ងៃទី២៤ ខែឧសភា លោក សាំង គីមស៊ន មេឃុំឆ្នុកទ្រូ រួមនឹងមន្ត្រីបរិស្ថាន និងអាជ្ញាធរភូមិ ឃុំផង បានទៅពិនិត្យមើល និងចាត់វិធានការ ដោយឱ្យមានអ្នកយាមការពារ ក្រែងមានជនខិលខូចមកលួចចាប់យកទៅ ដើម្បីជាប្រយោជន៍ផ្ទាល់ខ្លួន ។ តាមការបញ្ជាក់របស់លោកមេឃុំ សាំង គឹមស៊ន គឺពស់ថ្លាន់ដែលកំពុងសម្ងំក្រាបពងនៅក្រោមដើមឈើរលំនេះ មានទម្ងន់ជិត១៥គីឡូក្រាម និងមានពងយ៉ាងច្រើនដែលមេពស់ថ្លាន់នេះកំពុងក្រាប ។
ដើម្បីចូលរួមអភិរក្សជាមួយមន្ត្រីបរិស្ថាន លោកបានចំណាយថវិកាផ្ទាល់ខ្លួនចំនួន៥៥ម៉ឺនរៀលទៅឲ្យអ្នកភូមិម្នាក់ឈ្មោះ អូន ដើម្បីឲ្យនៅយាមការពារក្នុងរយៈពេល១ខែ គឺល្មមដែលអាចពងវាញាស់ ហើយមានលទ្ធភាពលូនចេញពីកន្លែងនេះ ។
ដោយឡែក ប្រជាពលរដ្ឋដែលបានទៅប្រទះឃើញ និងថតផ្តិតរូបភាពផ្ទាល់និយាយថា ពស់ថ្លាន់នេះមិនតូចទេ គ្រាន់តែក្បាលវាធំប៉ុនកំភួនជើងមនុស្សទៅហើយ អាចមានទម្ងន់ច្រើនជាង២០គីឡូក្រាមឯណោះ និងមានប្រវែងប្រមាណ៤ទៅ៥ម៉ែត្រ ។ ពួកគាត់ក៏សូមអបអរសាទរនូវចំណាត់ការរបស់លោកមេឃុំ ដែលបានចាត់ឲ្យមានអ្នកយាមប្រចាំការ ទម្រាំតែពងពស់ញាស់កូន និងមានលទ្ធភាពលូនចូលទៅក្នុងព្រៃដោយខ្លួនឯង ៕
ចែករំលែកព័តមាននេះ