សហរដ្ឋអាមេរិក ៖ ប្រឈមមុខនឹងឱសានវាទរបស់ប្រធានាធិបតីអាមេរិកលោកដូណាល់ត្រាំ បណ្ដាប្រទេសជាសមាជិកអង្គការសុខភាពពិភពលោក WHO បានសម្រេចកាលពីថ្ងៃទី១៩
ឧសភា បើកការស៊ើបអង្កេតឯករាជ្យមួយ លើប្រតិកម្មរបស់ខ្លួនចំពោះការឆ្លងរាលដាលនៃវីរុសCOVID-19 ដែលនៅបន្តរាតត្បាតលើពិភពលោកទាំងមូល និងពេលនេះកំពុងតែរាតត្បាតខ្លាំងជាពិសេសនៅតំបន់អាមេរិកឡាទីន ។
ក្នុងសន្និសីទតាមអនឡាញមួយផ្ដោតលើជំងឺនោះ ដែលសម្លាប់មនុស្សជាង៣២០.០០០នាក់ហើយលើពិភពលោក ចាប់តាំងពីវាលេចដំបូងនៅចិនពីខែធ្នូមក ប្រទេស១៩៤ជាមាជិក WHO បានព្រមព្រៀងគ្នា បើកធ្វើក្នុងពេលដ៏ឆាប់ខាងមុខ ដំណើរការវាយតម្លៃមិនលម្អៀង ឯករាជ្យនិងពេញលេញមួយ ។
កិច្ចព្រមព្រៀងនោះជាការឆ្លើយតបមួយចំពោះការចោទប្រកាន់នានារបស់លោកត្រាំដែលយល់ថា WHO គឺជាអាយ៉ងមួយរបស់ចិនហើយបានដាក់ឱសានវាទរយៈពេល១ខែមួយ ធ្វើយ៉ាងណាឲ្យទទួលបានបណ្ដាលទ្ធផលធំដុំនានា បើមិនដូច្នេះទេអាមេរិកនឹងដងខ្លួនចាកចេញពីអង្គការនោះ ខណៈអាមេរិកជាអ្នកផ្ដល់ប្រាក់ច្រើងជាងគេដល់ WHO ។
ចិនបានតបតវិញដោយចោទប្រកាន់លោកត្រាំ ដែលប្រទេសលោកជាមហាអំណាចធំនៃពិភពលោកបែរជា មានអ្នកស្លាប់ច្រើនបំផុតដោយសារវីរុស ដល់ទៅជិត១សែននាក់ថា នោះជាការខិតខំរបស់អាមេរិក ស្វែងរកគេចខ្លួនពីកាត្វកិច្ចរបស់ខ្លួនចំពោះអង្គការនេះហើយបំភ្លៃបណ្ដាការខិតខំប្រឹងប្រែងរបស់ចិនប្រឈមមុខនឹងការឆ្លងវីរុស ។
យោងតាមសេចក្ដីសម្រេចចិត្តមួយដែលអនុម័តកាលពីថ្ងៃទី១៩ឧសភាក្នុងសន្និសីទនោះ ការស៊ើបអង្កេតមួយអាចគ្រោងឲ្យមានបណ្ដាបេសកកម្មវិទ្យាសាស្ត្រនិងកិច្ចសហការនៅលើទីលាន ។ ចិនថ្លែងថាបើកទ្វារសម្រាប់ការសើុបអង្កេតឯករាជ្យមួយ ប៉ុន្តែពុំមែនមុនការបញ្ចប់នៃការឆ្លងឡើយ ។
អគ្គនាយក WHO លោក TEDROS ADHANOM GHEBREYESUS ដែលថ្លែងអំណរគុណចំពោះប្រទេសជាច្រើនជាសមាជិក ដែលសម្ដែងការទ្រទ្រង់របស់ពួកគេនិងសាមគ្គីភាព ក្នុងឱកាសនៃសន្និបាតប្រចាំឆ្នាំនេះរបស់ WHO។ លោកថា WHO នឹងបន្តធ្វើការតស៊ូពិភពលោក ប្រឆាំងការឆ្លងរាលដាលនៃវីរុស ដែលធ្វើឲ្យរង្កើរដល់បណ្ដាគ្រឹះរបស់ពិភពលោកយើង ហើយ
គំរាមហែកក្រណាត់នៃកិច្ចសហប្រតិបត្តិការអន្តរជាតិ ។
លោកបន្តថាលោកមានការចាប់អារម្មណ៍ខ្លាំងចំពោះការសន្យារបស់ប្រទេសជាច្រើនតស៊ូប្រឆាំងវីរុសនិងជួយសង្គ្រោះអាយុជីវិតមនុស្ស ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ