រាជធានីភ្នំពេញ៖ ការចេះគ្រប់គ្រងហិរញ្ញវត្ថុគឺជារឿងចាំបាច់ព្រោះមនុស្សត្រូវការលុយគ្រប់ពេលគ្រប់វេលា ។ លោក ង៉ែត ជូ ទីប្រឹក្សាសេដ្ឋកិច្ចដ៏លេចធ្លោមួយរូបនៅកម្ពុជា និងជាអ្នកវិនិយោគលើវិស័យអចលទ្រព្យ បានលើកឡើងថា សម័យមុន…
រាជធានីភ្នំពេញ៖ ការចេះគ្រប់គ្រងហិរញ្ញវត្ថុគឺជារឿងចាំបាច់ព្រោះមនុស្សត្រូវការលុយគ្រប់ពេលគ្រប់វេលា ។
លោក ង៉ែត ជូ ទីប្រឹក្សាសេដ្ឋកិច្ចដ៏លេចធ្លោមួយរូបនៅកម្ពុជា និងជាអ្នកវិនិយោគលើវិស័យអចលទ្រព្យ បានលើកឡើងថា សម័យមុន ចាស់ទុំទូន្មានកូនចៅថា «បើមិនខំរៀនទេ មានតែធ្វើស្រែហើយ» តែសម័យនេះចាស់ទុំមួយចំនួនបានទូន្មានកូនចៅថា «បើមិនខំរៀនទេ មានតែចូលរោងចក្រហើយ» ។
យ៉ាងណាមិញ លោក ង៉ែត ជូ បានអះអាងថាសម្រាប់រួបលោកវិតែងប្រាប់យុវជនថា «បើចេះតែចាយលុយតាមចិត្តចង់ មុខជាត្រូវធ្វើការអោយគេអស់មួយជីវិតហើយ» ។ ត្រង់ន័យនេះអ្នកជំនាញយើងបានលើកឡើងថាបើយើងអាច រឿង ៤ យ៉ាងនេះអ្នកនឹងសល់លុយហើយមិនបាច់ធ្វើការឲ្យគេអស់មួយជីវិត ។
១- កុំសម្ភារៈនិយមតាមគេ៖ លោក ង៉ែត ជូ ទីប្រឹក្សាសេដ្ឋកិច្ចលេចធ្លោមួយរូបនៅកម្ពុជាបានថ្លែងថា «ខ្ញុំគិតថាមនុស្សភាគច្រើនដោយសារតែសម័យឥឡូវ គឺជាសម័យសម្ភារៈនិយម ហើយជាសម័យដែលគេហៅថាបង្ហាញអ្វីដែលមានតាមបណ្តាញសង្គម ដូចជាហ្វេសប៊ុក ជាដើម ។ អញ្ចឹងគឺច្រើនអួតគ្នានូវសម្ភារៈទំនើបៗ ឬដើរលេងបរទេសថតបង្ហោះលើហ្វេសប៊ុសអីអញ្ចឹងទៅ ។ ដល់អញ្ចឹងមានមនុស្សខ្លះ ចេះតែចង់ធ្វើដូចគេ ទិញសម្ភារៈនិងចាយលុយទៅលេងបរទេសដូចគេទៅ ឬក៏ឃើញគេទៅហាងល្អៗទំនើប ហូបឆ្ងាញ់ អញ្ចឹងខ្លះក៏ប្រឹងធ្វើតាមទៅហាងទំនើបដូចគេ ។ អញ្ចឹងវាក៏ក្លាយទៅជាទំលាប់នៃការរស់នៅរបស់មនុស្ស ហើយទម្លាប់នៃការរស់នៅបែបហ្នឹង គឺវាសប្បាយជាមួយនឹងបច្ចុប្បន្ន តែវាឃ្លាតឆ្ងាយពីការគិតគូរទុកវែងឆ្ងាយសម្រាប់អនាគត» ។
២- ការគិតឆ្ងាយសម្រាប់អនាគត ៖ ត្រង់ចំណុចនេះ លោក ង៉ែត ជូ បានបញ្ជាក់ថា «យើងតោងស្វែងយល់ថា បើមនុស្សយើងមានវដ្ដជីវិតពីតូចរហូតធំដឹងក្តី ត្រូវរៀនសូត្រ រៀបការ ចិញ្ចឹមកូនៗនិងចៅៗ ត្រូវការផ្ទះសម្បែង និងត្រូវត្រៀមបំរុងលុយពេលចាស់ទៅឈឺថ្កាត់អី ។ អញ្ចឹងមនុស្សត្រូវការលុយមិនចេះចប់ មិនចេះហើយនោះទេ អញ្ចឹងបើយើងមិនបានមើលវែងឆ្ងាយ គឺយើងមិនអាចរៀបចំខ្លួន ។
៣- សន្សំ និងវិនិយោគ ៖ ចំណុចទី ៣ នេះគឺវាពាក់ព័ន្ធនឹងចំណុចទី ២ ដែលយើងត្រូវគិតថា តើយើងត្រូវរៀបចំខ្លួនយ៉ាងម៉េចសម្រាប់អនាគត ។ ដូចខ្ញុំធ្លាប់បានរៀបរាប់ពីមុនហើយ គឺថារៀងរាល់ខែ ពេលបើកប្រាក់ខែ គឺយើងត្រូវលៃលកសន្សំ ដើម្បីយកប្រាក់ទាំងនោះទៅវិនិយោគ ទៅបង្កើតអាជីវកម្ម ទិញភាគហ៊ុននៅផ្សារហ៊ុនអីជាដើម ដើម្បីបានប្រាក់ចំណេញ ហើយយកប្រាក់ចំណេញដើម្បីពង្រីក ផលចំណេញបន្ថែមទៀត ហើយពេលនោះពេលយើងចង់ចូលនិវត្តន៍ ក៏នៅពេលដែលយើងត្រូវការសម្រាប់ការរស់នៅ ។
៤- កាត់បន្ថយចំណាយ ៖ សម្រាប់ប្រាក់ខែ ឬប្រាក់ចំណូលដែលរកបានគឺត្រូវបែងចែកជាពីរ គឺ១ – គ្រាប់បាយ និងទី ២- គ្រាប់ពូជ ។
លោក ង៉ែត ជូ បានមានប្រសាសន៍ពន្យល់ថា គ្រាប់បាយ គឺសំដៅទៅដល់ការចាយលើរបស់សំខាន់ៗសម្រាប់ការរស់នៅប្រចាំថ្ងៃ ចាយលើ ដូចជាការទិញម្ហូបអាហារ ការចូលរួមពិធីបុណ្យទាន ទំនាក់ទំនងសង្គមដែលចាំបាច់ ។ ចំណុចសំខាន់មួយទៀត គឺអាចកាត់បន្ថយបាននូវការចំណាយមួយចំនួនដែលមិនចាំបាច់ ដូចជាការទៅជប់លៀងពីរ ឬបីតង់ ក្នុងមួយយប់ ព្រោះយើងអាចសន្សំយកទៅបង្កើតមុខរបរ ឬអាជីវកម្មនានា ។
អ្នកជំនាញរូបនេះបានឲ្យដឹងថា វាជាទម្លាប់ល្អ ពេលយើងចេះសន្សំលុយ សន្សំបានទុនយកទៅវិនិយោគលើអ្វីមួយ ឬអាជីវកម្មអ្វីមួយ ឬក៏វិនិយោគលើផ្សារហ៊ុន នាំឲ្យទុនយើងក៏អាចចូលរួមចំណែកអភិវឌ្ឍន៍សេដ្ឋកិច្ចជាតិ បង្កើតជាមុខរបរ បង្កើតជាការងារ នៅក្នុងសង្គម បើយើងចេះតែចាយវាយខ្ជះខ្ជាយ យើងអត់អាចសល់ទ្រព្យយកមកបម្រើជីវិតរបស់យើង នោះយើងនឹងត្រូវធ្វើការរហូត អត់បានចូលរួមចំណែកក្នុងសេដ្ឋកិច្ចជាតិ ៕
ចែករំលែកព័តមាននេះ