ខេត្តប៉ៃលិន ៖ បើតាមសេចក្តីរាយការណ៍បានឱ្យដឹងថា រហូតមកដល់រសៀលថ្ងៃទី០៥ ខែឧសភា ឆ្នាំ២០២០ បុរសម្នាក់ដែលដុតម៉ូតូខ្លួនឯងចោល ព្រោះតែខឹងនឹងសមត្ថកិច្ចកាលពីថ្ងៃដំបូងនៃការបើកឆាកចុះផាកពិន័យជាលក្ខណៈទ្រង់ទ្រាយធំតាមសារាចរណ៍នោះ មិនបានចូលខ្លួនមកសុំទោស និងទទួលយកការណែនាំរបស់អាជ្ញាធរខេត្តនោះឡើយ ដោយបានរត់គេចខ្លួនបាត់ស្រមោលតែម្តង ។
សេចក្តីរាយការណ៍បន្តថា បុរសរូបនេះមានឈ្មោះ ដូង វិឆ័យ ភេទប្រុស អាយុ៣៣ឆ្នាំ មានស្រុកកំណើតរស់នៅស្រុកមោងឬស្សី ខេត្តបាត់ដំបង បច្ចុប្បន្នរស់នៅភូមិទួលខ្ពស់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ដោយដុតម៉ូតូចាស់១គ្រឿង គ្មានកញ្ចក់ គ្មានស្លាកលេខ គ្មានកុងទ័រ និងអត់មួកសុវត្ថិភាព ស្ថិតនៅបណ្តោយផ្លូវជាតិលេខ៥៩ ក្នុងភូមិទួលខ្ពស់ ឃុំស្ទឹងត្រង់ ស្រុកសាលាក្រៅ ។
សេចក្តីរាយការណ៍បន្តទៀតថា ពាក់ព័ន្ធនឹងករណីខាងលើនេះ បើសិនជាបុរសរូបនេះ មិនព្រមចូលខ្លួនសុំទោសក្នុងរយ:ពេល៧ថ្ងៃទេ នគរបាលចរាចរណ៍នៃអធិការដ្ឋាននគរបាលស្រុកសាលាក្រៅ នឹងរៀបចំសំណុំរឿងបញ្ជូនទៅបន្តទៅថ្នាក់លើទៀត ។
សូមបញ្ជាក់ថា កាលពីម៉ោង៦និង៣០នាទីព្រឹក ថ្ងៃទី០១ ខែឧសភាកន្លងទៅ ខណៈពេលនគរបាលចុះដាក់កម្លាំងតាមគោលដៅ ដើម្បីរឹតបន្តឹងច្បាប់ចរាចរណ៍ថ្មី ក៏មានបុរសម្នាក់ជិះម៉ូតូស៊េរីចាស់១គ្រឿង អត់មានមួកសុវត្ថិភាព អត់ស្លាកលេខ អត់កញ្ចក់ ហើយក៏ត្រូវនគរបាលធ្វើការផាកពិន័យអស់ជាង១០ម៉ឺនរៀល ក៏ស្រាប់តែបុរសរូបនេះបានដុតម៉ូតូខ្លួនឯងចោល បង្កឱ្យមានការភ្ញាក់ផ្អើលតែម្តង តែត្រូវប្រជាពលរដ្ឋ និងនគរបាលនាំគ្នាជួយពន្លត់ទាន់ពេលវេលា រួចក៏អូសយកម៉ូតូនោះទៅរក្សាទុកនៅអធិការនគរបាលស្រុកផងដែរ ។
បើតាមប្រភពពីលោក ង៉ែត ទូច ជាមេភូមិទួលខ្ពស់ ក៏ត្រូវជាឪពុកក្មេក បានឱ្យដឹងថា ចាប់តាំងពីថ្ងៃទី០១ ឧសភា កូនប្រសាររបស់គាត់រូបនេះ បានដុតម៉ូតូចាស់១គ្រឿងចោល ។ ហើយនៅម៉ោង៦ព្រឹកថ្ងៃកើតហេតុនោះ គឺកូនប្រសារគាត់ជិះម៉ូតូស៊េរីឆ្នាំ១៩៩៧ចាស់ មានតែដែកសុទ្ធ ដែលទិញក្នុងតម្លៃ១៣ម៉ឺនរៀល ហើយមិនទាន់ឱ្យប្រាក់គេគ្រប់នៅឡើយទេ ។
គាត់បន្តទៀតថា នៅព្រឹកថ្ងៃនោះ រូបគេជិះម៉ូតូតាមបណ្តោយផ្លូវកើតហេតុ ក៏ត្រូវនគរបាលស្ទាក់ចាប់ ហើយពេលនោះ រូបគេឃើញម៉ូតូផ្សេងទៀត អត់មួក អត់កញ្ចក់ដែរ តែត្រូវគេបើកឱ្យធ្វើដំណើរទៅមុខធម្មតា ទើបកូនប្រសារគាត់ខឹងចិត្ត ក៏ដុតម៉ូតូចោលតែម្តង បណ្តាលឱ្យមានការភ្ញាក់ផ្អើលទាំងព្រឹក ។ ប៉ុន្តែរហូតមកដល់ពេលនេះ រូបគេរត់គេចខ្លួនទៅខេត្តផ្សេង ដោយមិនចូលខ្លួនមកសុំទោសនោះឡើយ ហើយខាងលោកក៏ខំប្រឹងពន្យល់ឱ្យកូនប្រសារខ្លួន កុំបន្តលាក់ខ្លួនបែបនេះទៀត ។
សូមបញ្ជាក់ថា កាលពីព្រឹកថ្ងៃទី០១ ខែឧសភា ឆ្នាំ២០២០ បន្ទាប់ពីជនសង្ស័យដុតម៉ូតូចោ លភ្លាមៗ លោកអភិបាលខេត្តបានហៅឪពុកម្តាយមកណែនាំនៅអធិការដ្ឋាននគរបាលស្រុកសាលាក្រៅផងដែរ ដោយសុំឱ្យបុរសរូបនេះចេញមុខមកសុំទោសនគរបាលឱ្យបានមុនរយៈពេល៧ថ្ងៃ បើពុំដូច្នោះទេនឹងឱ្យនគរបាលចាត់ការតាមផ្លូវច្បាប់ ។
ពាក់ព័ន្ធនឹងបញ្ហានេះ លោក រី តារា អធិការនគរបាលស្រុកសាលាក្រៅ បានឱ្យដឹងថា បុរសដែលដុតម៉ូតូផ្គើននឹងច្បាប់ចរាចរណ៍ថ្មីកាលពីប៉ុន្មានថ្ងៃមុន មិនទាន់ចូលមកសុំទោសនគរបាលនៅឡើយទេ ដោយសល់តែពេល២ថ្ងៃទៀតប៉ុណ្ណោះ ។ លោកបន្តទៀតថា បើបុរសខាងលើនេះនៅតែរត់គេចខ្លួនមិនព្រមចូលសារភាព និងសុំទោសពីកំហុសរបស់ខ្លួនទៀត ខាងលោកនឹងរៀបចំសំណុំរឿងបញ្ជូនទៅខាងលើ ដើម្បីឱ្យចាត់ការតាមនីតិវិធី ៕ (កែសម្រួលដោយ ៖ បុប្ផា)
ចែករំលែកព័តមាននេះ