រាជធានីភ្នំពេញ ៖ កាលពីថ្ងៃទី១៩ តុលា លោក ប៊ុន ណារិទ្ធ អគ្គនាយកអាជ្ញាធរអប្សរា បានចេញសេចក្តីជូនដំណឹងស្តីពីការធ្វើពិធីពុទ្ធាភិសេកព្រះពុទ្ធបដិមាដែលរងការបែកបាក់ និងបានជួសជុលរួចនៅប្រាង្គកណ្តាលប្រាសាទបាយ័ន ដែលត្រូវប្រារព្ធធ្វើនៅថ្ងៃនេះ (២៣ តុលា) ។ លិខិតដដែលបានឱ្យដឹងថា ការបែកបាក់ព្រះពុទ្ធបដិមានេះដោយសារការបំផ្លាញពីសំណាក់ស្ត្រីទេសចរជនជាតិហូឡង់ម្នាក់ កាលពីយប់ថ្ងៃទី៩ ឈានចូលថ្ងៃទី១០ តុលា ។
ទោះបីជាបែបណា ក្រុមអ្នកជំនាញអភិរក្សរបស់អាជ្ញាធរអប្សរាបានជួសជុលផ្គុំឡើងវិញ ដូចដើមរួចរាល់ ។ ពិធីពុទ្ធាភិសេកនេះ ប្រារព្ធធ្វើនៅប្រាសាទបាយ័នតែម្តងវេលាម៉ោង៦និង៤៥នាទីព្រឹក ។ ទាក់ទិននឹងការវាយបំផ្លាញរបស់ស្ត្រីជាអ្នកទេសចរជនជាតិហូឡង់នេះ តាមប្រភពពីសារព័ត៌មានដេលីម៉េលរបស់អង់គ្លេស បានចុះផ្សាយថា ស្ត្រីហូឡង់រូបនោះសារភាពថា ខ្លួនពិតជាបានវាយបំផ្លាញព្រះពុទ្ធបដិមានៅក្នុងប្រាសាទបាយ័នមែន និងអះអាងថា នាងឮសំឡេងប្រាប់ថា ប្រាសាទបាយ័ននេះ មិនមែនជាកម្មសិទ្ធិរបស់ព្រះពុទ្ធទេ បុ៉ន្តែជារបស់ទេពអប្សរឈ្មោះ អុិនអានណា (Inanna) ។
ស្ត្រីរូបនេះឈ្មោះ Willemijn Vermaat អាយុ៤០ឆ្នាំ បានប្រាប់បណ្តាញសារព័ត៌មានក្នុងស្រុករបស់ប្រទេសហូឡង់ថា នាងមិនមានចេតនាវាយបំផ្លាញព្រះពុទ្ធបដិមា នៅក្នុងប្រាសាទបាយ័នទេ បុ៉ន្តែពេលនៅក្នុងប្រាសាទ ស្រាប់តែមានរឿងចម្លែកកើតឡើងចំពោះនាង គឺមានសំឡេងអ្វីម្យ៉ាងកំពុងនិយាយជាមួយនាង ។ នាងបន្តទៀតថា «ខ្ញុំត្រូវបានសំឡេងនោះប្រាប់ថា ខ្ញុំត្រូវតែសម្អាតប្រាសាទបាយ័ននេះ ព្រោះតែវាពោរពេញទៅដោយសំរាមបង្កឡើងដោយព្រះសង្ឃ និងមនុស្សដទៃទៀត ។ មិនតែបុ៉ណ្ណោះ សំឡេងនោះប្រាប់ខ្ញុំទៀតថា ខ្ញុំត្រូវតែយកព្រះពុទ្ធបដិមានោះចេញ បុ៉ន្តែខ្ញុំពិតជាមិនចង់ធ្វើដូច្នេះឡើយ ព្រោះថាវាមិនមែនជារឿងលេងសើចទេ ហើយទាក់ទងនឹងសាសនាថែមទៀតផង» ។
យោងតាមប្រភពពីគេហទំព័រខ្មែរឡូតបានសរសេរដោយដកស្រង់មកផ្សាយបន្តថា នៅមុនពេលកើតហេតុ ស្ត្រីហូឡង់រូបនេះត្រូវបានព្រះសង្ឃ៣អង្គប្រទះឃើញ ខណៈអាជ្ញាធរមានសមត្ថកិច្ចបំពេញការងារនៅទីនោះ ក៏កំពុងដើររកនាងដែរ តែនាងរត់ទៅពួនសម្ងំនៅក្នុងព្រៃ ក្រោយមកនាងបានត្រឡប់មកវិញ ។ នាងបាននិយាយយ៉ាងដូច្នេះថា «ក្រោយមក ខ្ញុំក៏បានត្រឡប់ទៅអង្គុយលើភ្លៅរបស់ព្រះពុទ្ធបដិមាដើម្បីធ្វើសមាធិ បុ៉ន្តែសំឡេងដដែលនៅតែបន្តនិយាយជាមួយខ្ញុំទៀត រួចខ្ញុំក៏ច្រានព្រះពុទ្ធបដិមានោះចេញ គឺនៅពេលនោះហើយដែលខ្ញុំធ្វើឱ្យព្រះពុទ្ធបដិមាបែកតែម្តង បុ៉ន្តែខ្ញុំក៏បានសុំខមាទោសពីព្រះពុទ្ធបដិមារួចហើយដែរ ។ បន្ទាប់មក នៅពេលដែលខ្ញុំឈប់ធ្វើសមាធិ សំឡេងនោះក៏បាត់ភ្លាមតែម្តង» ។
យោងតាមសេចក្តីប្រកាសព័ត៌មានរបស់អាជ្ញាធរអប្សរាឱ្យដឹងថា នៅវេលាម៉ោងប្រហែល៦ព្រឹកថ្ងៃទី១០ តុលា កម្លាំងនគរបាលការពារបេតិកភណ្ឌបានដឹងថា មានការបាក់បែកព្រះពុទ្ធរូបនៅប្រាង្គកណ្ដាលនៃប្រាសាទបាយ័ន ហើយបានទូរស័ព្ទមកប្រាប់ភ្នាក់ងារអាជ្ញាធរអប្សរាឱ្យទៅធ្វើការត្រួតពិនិត្យទីតាំងកើតហេតុជាមួយគ្នា ។ នៅពេលធ្វើកំណត់ហេតុនោះ ភ្នាក់ងារអាជ្ញាធរអប្សរាមិនបានឃើញភ្ញៀវស្រីរូបនោះទេ តែបានទទួលព័ត៌មានពីនគរបាលនៅទីនោះថា ត្រូវបានម្ចាស់ផ្ទះសំណាក់មកទទួលយកត្រឡប់ទៅវិញហើយ ។
សេចក្តីប្រកាសព័ត៌មានបានបន្ត ដោយបញ្ជាក់ថា ជាគោលការណ៍ ការបើកឱ្យភ្ញៀវចូលទស្សនាប្រាសាទក្នុងរមណីយដ្ឋានអង្គរ ត្រូវបានកំណត់ចាប់ពីម៉ោង៥និង៣០នាទីព្រឹករហូតដល់ម៉ោង៥និង៣០នាទីល្ងាច ដោយឡែកនៅប្រាសាទបាយ័ន ការទស្សនារបស់ភ្ញៀវមានចាប់ពីម៉ោង៧ព្រឹក ។ ផុតពីម៉ោងដែលអនុញ្ញាតឱ្យចូលទស្សនានេះ ក្នុងបរិវេណប្រាសាទមានតែកម្លាំងនគរបាលការពារបេតិកភណ្ឌប៉ុណ្ណោះ ដែលមានភារកិច្ចយាមប្រចាំការនៅតាមគោលដៅទាំងនោះ ។ រីឯកម្លាំងរបស់នគរបាលទេសចរណ៍ និងភ្នាក់ងាររបស់អាជ្ញាធរអប្សរា ពុំមានភារកិច្ចនៅប្រចាំការតាមប្រាសាទនៅពេលយប់ទេ លើកលែងតែនៅពេលមានកម្មវិធីសម្តែងសិល្បៈម្តងម្កាល ទើបមានកម្លាំងចម្រុះរវាងអាជ្ញាធរអប្សរា នគរបាលការពារបេតិកភណ្ឌ និងនគរបាលទេសចរណ៍ ចូលរួមប្រចាំការទាំងអស់គ្នា រហូតដល់បញ្ចប់កម្មវិធីវេលាយ៉ាងយូរប្រហែលត្រឹមម៉ោង១១យប់ ។ ដូច្នេះ ហេតុការណ៍កើតឡើងនៅពេលយប់ដូចករណីខាងលើ គឺមានតែវត្តមានកម្លាំងនគរបាលការពារបេតិកភណ្ឌប៉ុណ្ណោះ ៕
ចែករំលែកព័តមាននេះ