បច្ចុប្បន្ននេះមនុស្សជាច្រើនកំពុងតែជួបប្រទះនឹងបញ្ហាដ៏ធំមួយដែលជាការរាតត្បាតនៃវីរុសកូវីដ ១៩ ហើយក្នុងនោះរួមមានប្រជាជនក្នុងប្រទេសកម្ពុជាផងដែរ ។ ការឆ្លើយតបរបស់យើងទៅនឹងវីរុសនេះនឹងប៉ះពាល់ដល់អនាគតរបស់យើង ដែលជាហេតុនាំឲ្យមនុស្សជាច្រើនជ្រើសរើសកាត់បន្ថយការចេញក្រៅផ្ទះលុះត្រាតែមានការចាំបាច់ ។
ក្រៅពីនេះហើយ ការរក្សាគម្លាតរវាងមនុស្ស និងមនុស្សក៏កំពុងតែផ្លាស់ប្តូរការរស់នៅប្រចាំថ្ងៃរបស់មនុស្សទូទាំងប្រទេសដែរ ។ ប៉ុន្តែការរស់នៅផ្តាច់ខ្លួនពីអ្នកដទៃ និងព្រួយបារម្ភពីអ្វីៗដែលនៅជុំវិញខ្លួនអាចប៉ះពាល់ដល់សុខភាពផ្លូវចិត្តរបស់មនុស្សបាន ។ សម្រាប់អាជីវករដែលមើលឃើញអាជីវកម្មខ្លួនទទួលរងការប៉ះពាល់ អ្នកគួរតែអនុវត្តវិធីខាងក្រោមនេះដើម្បីធ្វើឲ្យអារម្មណ៍ស្ងប់ និងឆ្លងផុតឧបសគ្គនេះ៖
១. ការធ្វើលំហាត់ប្រាណ
ការធ្វើចលនា ឬលំហាត់ប្រាណជាប្រចាំជួយឲ្យអ្នកចូលដំណេកបានស្កប់ និងជួយធ្វើឲ្យអ្នកស្ងប់អារម្មណ៍ផងដែរ ។ ក្នុងកំឡុងពេលដែលអ្នកជ្រើសរើសនៅផ្ទះច្រើននេះ អ្នកគួរតែឆ្លៀតពេលសម្រាប់ធ្វើលំហាត់ប្រាណនៅផ្ទះដោយខ្លួនឯង ។
២. ស្រូបខ្យល់អាកាស
ពេលដែលអ្នកចាប់ផ្តើមធុញថប់នឹងការនៅផ្ទះហើយ អ្នកអាចចេញទៅក្រៅដើម្បីស្រូបយកខ្យល់អាកាសបាន ។ ពេលខ្លះការផ្លាស់ប្តូរទេសភាពក៏អាចជួយដល់អារម្មណ៍របស់អ្នកដែរ ។ លើសពីនេះទៅទៀត ពន្លឺព្រះអាទិត្យអាចផ្តល់នូវវីតាមីន D ដែលជួយដល់ប្រព័ន្ធការពាររាងកាយរបស់អ្នកទៀតផង ។យ៉ាងណាក្តី ពេលដែលអ្នកសម្រេចចិត្តចេញក្រៅផ្ទះ អ្នកត្រូវតែរក្សាគម្លាតពីអ្នកដទៃ និងជចៀសវាងកន្លែងដែលនៅឆ្ងាយពីផ្ទះរបស់អ្នក ។
៣. ចំណាយពេលវេលាជាមួយគ្រួសារ
អ្នកអាចចាត់ទុកថាវាជាឱកាសមួយក្នុងការធ្វើឲ្យមនុស្សក្នុងគ្រួសារកាន់តែជិតស្និទ្ធគ្នា និងជួយឲ្យសមាជិកគ្រួសាររបស់អ្នកមានអារម្មណ៍ល្អជាងមុនដោយលើកទឹកចិត្តគ្នាទៅវិញទៅមក ។ ប្រសិនបើអ្នកនៅតែទៅធ្វើការធម្មតា ឬប្រកបអាជីវកម្មធម្មតា អ្នកគួរតែទុកពេលខ្លះសម្រាប់សម្រាក និងចំណាយពេលជាមួយគ្រួសារដើម្បីធានាថាពួកគេមិនមានបញ្ហាចាំបាច់អ្វីត្រូវដោះស្រាយ ៕
ចែករំលែកព័តមាននេះ