ខេត្តកំពង់ស្ពឺ ៖ តាមប្រភពពីប្រជាពលរដ្ឋបានរាយការណ៍ប្រាប់សមត្ថកិច្ចថា មានក្មេងមួយក្រុមមិនស្គាល់អត្តសញ្ញាណនោះទេ បានប្រមូលផ្តុំពាក់ពពូនគ្នាស្ទាក់អ្នកដំណើរលេងប៉ាតម្សៅ និងជះទឹក កាលពីវេលាម៉ោង៣និង៥០នាទីរសៀលថ្ងៃទី១៥ មេសា ឆ្នាំ២០២០ នៅចំណុចខាងលិចភូមិតាំងស្រឹង តាមផ្លូវជាតិលេខ៤៤ចន្លោះគីឡូម៉ែត្រ៤២-៤៣ ក្នុងភូមិតាំងស្រឹង ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ។
ក្រោយពីទទួលបានព័ត៌មានខាងលើភ្លាម សមត្ថកិច្ចបានចុះទៅបង្ក្រាបក្មេងមួយក្រុមខាងលើដែលពពាក់ពពូនគ្នាស្ទាក់អ្នកដំណើរលេងប៉ាតម្សៅ និងជះទឹក ដែលទង្វើបែបនេះត្រូវបានអាជ្ញាធរហាមឃាត់ លុះពេលសមត្ថកិច្ចចុះទៅដល់ ស្រាប់តែក្រុមក្មេងទាំងនោះនាំគ្នារត់គេចខ្លួនអស់ ដោយបន្សល់ទុកម៉ូតូចំនួន៨គ្រឿងនៅនឹងកន្លែង។
លោកវរសេនីយ៍ឯក ប៊ុត ប៊ុនធឿន អធិការនគរបាលស្រុកឱរ៉ាល់ ដោយបានការឯកភាពបញ្ជាពីលោកឧត្ដមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ បានដឹកនាំកម្លាំងចុះទៅកាន់គោលដៅខាងលេី ដើម្បីឃាត់ និងណែនាំកុំអោយមានការលេងរបៀបនេះទៀត ។ ម្យ៉ាងជាការហាមឃាត់មិនអោយមានការជួបជុំជាក្រុម តែពេលកម្លាំងចុះទៅដល់ជាក់ស្តែង ស្រាប់តែក្រុមក្មេងទាំងនោះបានរត់គេចខ្លួនបាត់អស់ដោយបន្សល់ទុកម៉ូតូ ដបម្សៅ និងធុងទឹកនៅនឹងកន្លែងកើតហេតុ ។
បន្ទាប់ពីក្រុមក្មេងទាំងនោះរត់គេចខ្លួនអស់ សមត្ថកិច្ចបានប្រមូលយកម៉ូតូចំនួន៨គ្រឿងរួមមាន ១-ម៉ូតូម៉ាកហុងដា ធុនC125 ស៊េរីឆ្នាំ២០១៨ ពណ៌ខ្មៅ ពាក់ផ្លាកលេខ កំពង់ស្ពឺ ១L-៤៣៥៩, ២-ម៉ូតូម៉ាកហុងដា ធុន C125 ស៊េរីឆ្នាំ២០១៦ ពណ៌ខ្មៅ ពាក់ផ្លាកលេខ កំពង់ស្ពឺ ១H-៥៣២៣, ៣-ម៉ូតូម៉ាកហុងដា ធុនC125 ស៊េរីឆ្នាំ២០១៦ ពណ៌ខ្មៅ ពាក់ផ្លាកលេខ កំពង់ស្ពឺ ១H-៤៥៤១, ៤-ម៉ូតូម៉ាកហុងដា ធុនC125 ស៊េរីឆ្នាំ២០១៣ ពណ៌ក្រហម (បិតស្កុតពណ៌ខ្មៅ) ពាក់ផ្លាកលេខ កំពង់ស្ពឺ ១H-០៧០៦, ៥-ម៉ូតូម៉ាកហុងដា ធុនC125 ស៊េរីឆ្នាំ២០១៤ ពណ៌ខ្មៅ ពាក់ផ្លាកលេខ ភ្នំពេញ ១CQ-៥៧៦៦, ៦-ម៉ូតូម៉ាកហុងដា ធុនC125 ស៊េរីឆ្នាំ២០១១ ពណ៌ខ្មៅ ពាក់ផ្លាកលេខ ភ្នំពេញ១BS-៣២២១, ៧-ម៉ូតូម៉ាកហុងដា ធុនC125 ស៊េរីឆ្នាំ២០១១ ពណ៌ខ្មៅ ពាក់ផ្លាកលេខ កណ្ដាល១M-៧៨៦២ និង៨-ម៉ូតូម៉ាកហុងដា ធុនC125 ស៊េរីឆ្នាំ២០១៤ ពណ៌ខ្មៅ(បិតស្កុតពណ៍ស) គ្មានផ្លាកលេខ ។
សមត្ថកិច្ចនគរបាលស្រុកឱរ៉ាល់បានដឹកជញ្ជូនម៉ូតូទាំង៨គ្រឿងខាងលើនេះមកកាន់អធិការដ្ឋាននគរបាលស្រុក និងស្នេីសុំយោបល់ពីថ្នាក់លើដើម្បីបន្តតាមនីតិវិធី។
នៅព្រឹកថ្ងៃទី១៦ មេសា ឆ្នាំ២០២០នេះដែរ សមត្ថកិច្ចបានអំពាវនាវដល់ម្ចាស់ម៉ូតូទាំងអស់ខាងលើ សូមចូលខ្លួនមកធ្វើកិច្ចសន្យាទទួលស្គាល់កំហុស ដែលល្មើសនឹងការហាមប្រាមរបស់អាជ្ញាធរនិងសមត្ថកិច្ចក្នុងអំឡុងពេលដែលប្រទេសជាតិកំពុងប្រយុទ្ធប្រឆាំងនឹងមេរោគកូវីដ១៩។
ទាក់ទិននឹងករណីខាងលើនេះដែរ មហាជនបានសំណូមពរដល់អាណាព្យាបាល សុំជួយណែនាំអប់រំដល់កូនចៅ កុំអោយប្រព្រឹត្តទង្វើ ឬធ្វើសកម្មភាពណាមួយដែលបង្កភាពអនាធិបតេយ្យដល់សង្គម៕
ចែករំលែកព័តមាននេះ