លោកមហាសេដ្ឋី ប៊ីល ហ្គេតស៍ (Bill Gates) ស្ថិតក្នុងចំណោមមនុស្សដែលមានទ្រព្យសម្បត្តិស្តុកស្តម្ភជាងគេលើពិភពលោក ហើយខណៈដែលមនុស្សភាគច្រើនគិតថាលោកមានថ្ងៃនេះព្រោះតែទេពកោសល្យក្នុងការបង្កើតនិងគ្រប់គ្រងអាជីវកម្មរបស់លោក លោក ហ្គេតស៍ បែរជាអះអាងថាគឺការអប់រំទេដែលបានធ្វើឲ្យលោកជោគជ័យដូចសព្វថ្ងៃ ។
មនុស្សជាច្រើនប្រហែលជាដឹងហើយថាលោក ប៊ីលហ្គេតស៍ បានសម្រេចចិត្តចាកចេញពីសាកលវិទ្យាល័យមុនពេលលោកបញ្ចប់ការសិក្សានៅសាកលវិទ្យាល័យ Harvard ប៉ុន្តែលោកបានបកស្រាយថា បទពិសោធន៍របស់លោកនៅសាកលវិទ្យាល័យគឺពិតជាសំខាន់ណាស់សម្រាប់អាជីវកម្មរបស់លោក ។
ក្នុងបទសម្ភាសន៍មួយកាលពីឆ្នាំ ២០១៤ លោកបានទទួលសំណួរមួយថា តើអ្នកមានដំបូន្មានហិរញ្ញវត្ថុផ្ទាល់ខ្លួនអ្វីដែលល្អជាងគេសម្រាប់មនុស្សដែលរកប្រាក់ចំណូលបានតិចជាង ១០ម៉ឺនដុល្លារក្នុងមួយឆ្នាំ? លោក ហ្គេតស៍ បានឆ្លើយតបថា «វិនិយោគលើការអប់រំរបស់អ្នក» ។
ទោះជាលោកបានចាកចេញពីសាលារៀនដោយមិនទទួលបានបរិញ្ញាប័ត្រមួយពិតមែនក្តី លោកមានជំនឿចិត្តច្បាស់លាស់ថាបទពិសោធន៍នេះបានផ្លាស់ប្តូរលោកទាំងស្រុង ។ លោកធ្លាប់បានឡើងថ្លែងសន្ទរកថានៅ Havard កាលពីឆ្នាំ ២០០៦ ថា «អ្វីដែលខ្ញុំចងចាំខ្លាំងជាងគេពី Harvard គឺការនៅក្នុងចំណោមមនុស្សដែលពោរពេញទៅដោយកម្លាំង និងចំណេះដឹង» ។
វាមានការលើកទឹកចិត្ត ភ័យខ្លាច ហើយពេលខ្លះបាក់ទឹកចិត្តផងដែរ តែតែងតែពិបាក ។ វាជាឯកសិទ្ធិដ៏អស្ចារ្យមួយ ហើយទោះជាខ្ញុំបានចាកចេញមុនពេលបញ្ចប់ការសិក្សាពិតមែនក្តី ខ្ញុំបានផ្លាស់ប្តូរយ៉ាងខ្លាំងព្រោះតែពេលវេលានៅ Harvard មិត្តដែលខ្ញុំមាន និងគំនិតដែលខ្ញុំបានធ្វើការ ។
ក្រៅពីនេះទៅទៀត លោកបានផ្តល់ដំបូន្មានឲ្យស្តាប់អ្នករិះគន់ ។ លោកធ្លាប់បានបកស្រាយក្នុងសៀវភៅដែលលោកសរសេរនៅឆ្នាំ ១៩៩៩ ក្រោមចំណងជើង Business @ the Speed of Thought ពីសារៈសំខាន់នៃការរិះគន់ថាវាជួយឲ្យមនុស្សរៀនចេះរកដំណោះស្រាយសម្រាប់បញ្ហាថ្មីៗជាដើម ។
លោកបានបន្ថែមទៀតថា អ្នកគួរតែស្តាប់អតិថិជនរសប់អ្នក និងយកព័ត៌មានមិនល្អរបស់ពួកគេមកធ្វើជាឱកាសក្នុងការធ្វើឲ្យការបរាជ័យរបស់អ្នកក្លាយជាភាពល្អប្រសើរដែលពួកគេចង់បាន ។ អ្នកគួរតែពិនិត្យមើលការរិះគន់របស់អតិថិជនច្រើនជាងប្រាក់ចំណូលរបស់ក្រុមហ៊ុន ៕
ចែករំលែកព័តមាននេះ