ខេត្តបន្ទាយមានជ័យ ៖ ខុសពីអ្វីដែលគ្រោងទុក និងពុំមានការផ្តល់ព័ត៌មានឲ្យដឹងជាមុន ពីការបិទឬបើកទ្វារព្រំដែននោះ នាព្រឹកថ្ងៃទី៥ មេសា មានពលរដ្ឋខ្មែរជាច្រើននាក់បាននាំគ្នាទៅកាន់ច្រកទ្វារព្រំដែនអន្តរជាតិប៉ោយប៉ែត តែភាគីថៃនៅតែបិទច្រកថ្មើរជើងលើស្ពានព្រំដែនដដែល ។
ក្រុមពលរដ្ឋទាំងនេះ បានត្អូញត្អែរពីការដាច់បាយ ប្រសិនបើស្ថានភាពបែបនេះនៅតែបន្ត រហូតអ្នកខ្លះទៅរករាវគ្រំនៅអាងអូរខៃដនឬតាមអូរព្រំដែន ហើយអ្នកខ្លះទៅរកបេះបន្លែលក់ដោះស្រាយជីវភាព ។ មិនតែប៉ុណ្ណោះ ពួកគាត់ ត្អូញត្អែរថា មិនមានប្រាក់បង់ថ្លៃផ្ទះជួល ឬបង់ប្រាក់កម្ចីធនាគារឡើយ ។
ដោយសារឃើញរថយន្តថៃឆ្លងព្រំដែនទៅមកបាន ក្រុមពលរដ្ឋទាំងនេះ ហាក់ខឹងសម្បាហើយនិយាយថា ចង់នាំគ្នាយករទេះដាក់បិទព្រំដែនទៀតផង ។ ទោះជាយ៉ាងណា ភាគីថៃបានជួបជាមួយអាជ្ញាធរនិងសមត្ថវកិច្ចកម្ពុជាលើស្ពានព្រំដែននិងប្រាប់ថា ពុំមានការបើកច្រកថ្មើរជើងទេ ពោលគឺរហូតដល់ថ្ងៃទី១ ខែឧសភា ឆ្នាំ២០២០ ទើបបើកដំណើការជាធម្មតាវិញ តាមខ្សែបន្ទាត់ព្រំដែនទាំងអស់ ប្រសិនបើស្ថានភាព
ជំងឺកូវីដ១៩ មានការថមថយ ។
ក្រុមអាជីវករលក់ដូរនៅផ្សាររុងក្លឿលើកឡើងថា ពួកគាត់នឹងជួបបញ្ហារឿងថ្លៃតូបដែលជួលគេលក់ ។ បើស្ថានការណ៍នៅតែបែបហ្នឹង ហើយមិនបានលក់ដូរ តើបានប្រាក់ពីណាបង់ថ្លៃតូប បើតូបខ្លះក្នុង១ខែជួលតម្លៃជាង១មុឺនបាតឬជិត២ម៉ឺនបាតក៏មានដែរ ។ ពេលលើកឡើងពីបញ្ហានេះ អាជ្ញាធរប្រាប់ថា វាជាច្បាប់ស្រុកគេ ប៉ុន្តែនឹងយកបញ្ហានេះលើកជារបៀបវារៈពេលជួបប្រជុំជាមួយថៃនៅថ្ងៃណាមួួយ ។ ក្រោយពីមានការបកស្រាយពីសមត្ថកិច្ ចក្រុមពលរដ្ឋទាំងនេះ ក៏បានវិលត្រឡប់ទៅលំនៅឋានវិញជាបណ្តើរៗ ។
លោក ង៉ោ ម៉េងជ្រួន អភិបាលរងខេត្ត បានណែនាំដល់ពលរដ្ឋឲ្យមានការយោគយល់ ព្រោះជាច្បាប់ប្រទេសគេ ពោលគឺខាងកម្ពុជាមិនមែនជាអ្នកបិទព្រំដែនទេ ម្យ៉ាងទៀតប្រទេសថៃពេលនេះកំពុងត្រូវបានដាក់ក្នុងគ្រាអាសន្ន ។ ជាមួយគ្នានេះ លោកក៏បានអំពាវនាវដល់ប្រជាពលរដ្ឋបើគ្មានការចាំបាច់ សូមកុំឆ្លងព្រំដែនទៅដីថៃដោយខុសច្បាប់ ក្រែងកើតមានបញ្ហាជាយថាហេតុលើទឹកដីគេ ៕
ចែករំលែកព័តមាននេះ