ខេត្តឧត្តរមានជ័យ ៖ បើតាមសេចក្តីរាយការណ៍បឋមបានឱ្យដឹងថា យោងទៅលើពាក្យបណ្តឹងរបស់បុរសជាប្តីដែលមានមុខរបរជាយោធា ហើយបច្ចុប្បន្នឈរជើងការពារទឹកដីនៅព្រំប្រទល់កម្ពុជា-ថៃ ឯខេត្តព្រះវិហារ បានដាក់ពាក្យប្តឹងប្រពន្ធរបស់ខ្លួន រួមទាំងសហាយស្មន់ ដែលនាំគ្នារត់ចេញពីស្រុកកំណើតមកសម្ងំលាក់ខ្លួនឡើងឋានសួគ៌នៅក្នុងស្រុកត្រពាំងប្រាសាទ ខេត្តឧត្តរមានជ័យ ក្រោយពេលបែកធ្លាយរឿងនេះ ហើយក៏ត្រូវបានប៉ូលិសឃាត់ខ្លួនកាលពីព្រឹកថ្ងៃទី២ ខែមេសា ឆ្នាំ២០២០នេះ។
សេចក្តីរាយការណ៍បន្តថា ម្ចាស់ពាក្យបណ្តឹងជាប្តីខាងលើឈ្មោះ ផាន់ រ៉ាឌី ភេទប្រុស អាយុ៥៥ឆ្នាំ មុខរបរជាយោធា រស់នៅឯខេត្តកណ្តាល បច្ចុប្បន្នឈរជើងការពារទឹកដីនៅឯខេត្តព្រះវិហារ នៅព្រំប្រទល់កម្ពុជា-ថៃ ដែលបានដាក់ពាក្យប្តឹងប្រពន្ធរបស់ខ្លួនឈ្មោះ អេង ពៅ អាយុ៤០ឆ្នាំ និងសាហាយស្មន់ម្នាក់ទៀតឈ្មោះ សំ អុល ភេទប្រុស អាយុ៥២ឆ្នាំ ។
បើលោកវរសេនីយ៍ត្រី អ៊ូច ម៉ៅ អធិការស្រុកត្រពាំងប្រាសាទ បានឱ្យដឹងកាលពីរសៀលថ្ងៃទី៣ ខែមេសាថា យោងទៅលើការរៀបរាប់ពីបុរសជាប្តីថា ប្រពន្ធរបស់ខ្លួនបានបង្កើតមុខរបររកស៊ីចងការលុយនៅឯស្រុកកំណើត គឺខេត្តកណ្តាល ស្រាប់តែលួចមានសហាយស្មន់ជាមួយបុរសម្នាក់ដែលមានមុខរបរបើកលេងល្បែងស៊ីសង ក្រោយពេលបែកធ្លាយរឿងនេះ ពួកគេទាំង២នាក់ក៏នាំគ្នារត់គេចខ្លួន។ ហើយបន្ទាប់ពីបានរៀបរាប់រួច បុរសជាប្តីបានដាក់ពាក្យបណ្តឹងមួយច្បាប់នៅនឹងកន្លែងអធិការស្រុកត្រពាំងប្រាសាទ កាលពីថ្ងៃទី២៧ ខែមីនា កន្លងទៅ។
លោកអធិការបានបន្តថា បន្ទាប់ពីទទួលពាក្យបណ្តឹងរួច លោកបានចាត់កម្លាំងធ្វើការស៊ើបអង្កេត ហើយក៏បានជួបប្រទះឃើញបុរស និងស្ត្រីរូបនេះ ដែលបានមកស្នាក់នៅនឹងផ្ទះអ្នកដែលធ្លាប់ស្គាល់គ្នា ដោយជាប់មកជាមួយរថយន្តម៉ាក Lexus RX330 មួយគ្រឿង ពាក់ស្លាកលេខភ្នំពេញ ២BD.២៦.០៣ទៀតផង ។ ក្រោយមកសមត្ថកិច្ចក៏បាននាំខ្លួនទាំងមនុស្ស និងរថយន្ត មកអធិការធ្វើការសាកសួរតែម្តង នៅព្រឹកថ្ងៃទី២ ខែមេសា ។
យោងតាមការសាកសួលើជនសង្ស័យទាំង២នាក់ខាងលើ បានឆ្លើយសារភាពថា បុរសឈ្មោះ ផាន់ រ៉ាឌី ជាប្តី ដែលបានប្តឹងនោះ គឺខ្លួនពិតជាបានប្រព្រឹត្តមែន ។ ដោយយោងទៅតាមចម្លើយសារភាពពីជនសង្ស័យ និងយោងទៅលើពាក្យបណ្តឹងផងនោះ លុះព្រឹកថ្ងៃទី៣ ខែមេសានេះ លោកបានកសាងសំណុំរឿង បញ្ជូនជនសង្ស័យ និងរថយន្តទៅការិយាល័យប្រឆាំងការជួញដូរ និងការពារនិតិជនស្នងការដ្ឋាននគបាលខេត្តឧត្តរមានជ័យ ដើម្បីចាត់ការទៅតាមផ្លូវច្បាប់៕ (កែសម្រួលដោយ ៖ បុប្ផា)
ចែករំលែកព័តមាននេះ