ខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា ខុសពីអ្វីដែលគ្រោងទុក ម្យ៉ាងដល់ថ្ងៃកំណត់ទី៥ ខែមេសាហើយ ពុំមានកាផ្តល់ព័ត៌ឲ្យដឹងជាមុនថា បិទ ឬបើកទ្វារព្រំដែននោះទេ លុះនៅព្រឹកថ្ងៃទី៥ ខែមេសា ឆ្នាំ២០២០នេះ ពលរដ្ឋខ្មែរជាច្រើនបានទៅកាន់ច្រកទ្វារព្រំដែនអន្តរជាតិប៉ោយប៉ែត ព្រោងព្រៀត តែភាគីថៃនៅតែបិទច្រកថ្មើរជើងលើស្ពានព្រំដែនដដែល។
សេចក្តីរាយការណ៍បន្តថា ក្រុមប្រជាពលរដ្ឋបានត្អូញត្អែរពីការដាច់បាយ រហូតអ្នកខ្លះទៅរករាវគ្រុំនៅអាងអូរខៃដន ឬតាមអូរព្រំដែន ហើយអ្នកខ្លះទៀតទៅរកបេះបន្លែលក់ ដើម្បីដោះស្រាយជីវភាព។
មិនតែប៉ុណ្ណោះ ពួកគាត់បានត្អូញត្អែរថា មិនមានប្រាក់បង់ថ្លៃផ្ទះជួល ឬបង់ប្រាក់កម្ចីឡើយ។ ហើយដោយសារតែឃើញរថយន្តថៃឆ្លងព្រំដែនទៅមកបាន ធ្វើឱ្យក្រុមពលរដ្ឋហាក់ខឹងសម្បា និងបញ្ចេញកំហឹងថា ចង់នាំគ្នាយករទេះដាក់បិទព្រំដែនទៀតផង។
ទោះជាយ៉ាងណា ភាគីថៃបានជួបជាមួយនគរបាលអន្តោប្រវេសន៍កម្ពុជា លើស្ពានព្រំដែន និងប្រាប់ថា ពុំមានការបើកច្រកថ្មើរជើងនោះទេ ពោលគឺដល់ថ្ងៃទី១ ខែឧសភា ឆ្នាំ២០២០ ទើបគេបើកឱ្យដំណើរការជាធម្មតាវិញ តាមបន្ទាត់ព្រំដែនទាំងអស់ ប្រសិនបើស្ថានការកូវីដ១៩ មានការថមថយចុះ។
ក្រោយពីមានការបកស្រាយពីសមត្ថកិច្ច ក្រុមពលរដ្ឋក៏បានវិលត្រឡប់ទៅលំនៅដ្ឋានវិញជាបណ្តើៗហើយ។
គួរបញ្ជាក់ថា រីឯច្រកទ្វារចូលកាស៊ីណូជាច្រើនកន្លែងនៅច្រកព្រំទ្វារព្រំដែនបិទមិនឱ្យដំណើរនោះទេ ចំណែកក្រុមហ៊ុនកាស៊ីណូនីមួយៗក៏បានធ្វើសេចក្តីប្រកាសជូនដំណឹងនៃការបិទទ្វារបណ្តោះអាសន្នផងដែរ ។
សូមបញ្ជាក់ថា ខណៈពេលនេះ គេឃើញលោកង៉ោ ម៉េងជ្រួន អភិបាលរងខេត្ត ក៏បានជួបជាមួយពលរដ្ឋ ដើម្បីណែនាំឲ្យមានការយោគយល់ពីស្ថានភាពកូវីដ១៩ របស់ប្រទេសគេ ហើយថា បើភាគីថៃបើកច្រកទ្វារព្រំដែនពេលណា អាជ្ញាធរខេត្តនឹងជូនដំណឹងភ្លាមៗ។ ជាមួយគ្នានេះ លោកសុំឲ្យពលរដ្ឋកុំចូលទៅដីថៃដោយខុសច្បាប់ ព្រោះប្រទេសគេកំពុងដាក់ក្នុងគ្រាអាសន្ន។ (កែសម្រួលដោយ ៖ បុប្ផា)
ចែករំលែកព័តមាននេះ