ទស្សនៈដំបូងរបស់មនុស្សម្នាក់ទៅលើមនុស្សម្នាក់ទៀតពិតជាមានសារៈសំខាន់ណាស់ជាពិសេសក្នុងពិភពអាជីវកម្ម ។ អ្នកប្រហែលជាមានឱកាសតែមួយទេក្នុងការផ្តល់នូវព័ត៌មានសំខាន់ៗដល់អតិថិជនរបស់អ្នក ហើយវាមិនមែនជាជំនាញដែលងាយនឹងរៀនឡើយ ។ ប៉ុន្តែដើម្បីពង្រីកអាជីវកម្ម និងបង្កើនចំនួនមនុស្សដែលអ្នកអាចពឹងផ្អែកបាន អ្នកចៀសមិនផុតនឹងត្រូវព្យាយាមរៀនវាទេ ។ យុទ្ធសាស្ត្រខាងក្រោមនេះអាចជួយឲ្យអតិថិជនរបស់អ្នកមានទស្សនៈល្អលើអ្នកបាន៖
១. ស្រាវជ្រាវពីភាគីម្ខាងទៀត
យោងទៅតាមលោក ហ្សាក បានឌឺ (Zach Binder) ដែលជាសហស្ថាបនិក និងប្រធានក្រុមហ៊ុន Bell + Ivy បានឲ្យដឹងថា អ្នកមិនគួរជួបអតិថិជនអ្នកដោយមិនធ្វើការស្រាវជ្រាវពីមនុស្សម្នាក់នោះទាំងស្រុងទេ ។ ផ្ទុយមកវិញ អ្នកត្រូវតែយល់ដឹងពីពួកគេ ពីអ្វីដែលពួកគេកំពុងតែធ្វើ ហើយនិងអ្វីដែលពួកគេបានធ្វើពីមុនមក ។ ការធ្វើដូច្នេះធ្វើឲ្យភាគីម្ខាងទៀតមើលឃើញថាអ្នកយល់ដឹងពីពួកគេបានច្បាស់ និងបង្ហាញថាអ្នកខ្វល់ខ្វាយពីកិច្ចប្រជុំនេះផងដែរ ។
២. ត្រៀមខ្លួនឲ្យបានរៀបរយ
គ្រប់អាជីវករគួរតែត្រៀមបទបង្ហាញដែលខ្លីមួយដែលពួកគេអាចលើកឡើងពេលដែលជួបមនុស្សថ្មីនិងបង្កើតទំនាក់ទំនងសំខាន់ៗសម្រាប់អាជីវកម្ម ។ ហើយទោះជាអ្នកបាននិយាយវាជាច្រើនដងម្តងហើយម្តងទៀតពិតមែនក្តី អ្នកគួរតែរំឭកវាម្តង ឬពីរដងមុនពេលជួបអតិថិជនអ្នក ។
៣. បង្ហាញពីលទ្ធផលរបស់អ្នក និងវិធីដែលអ្នកសម្រេចបាន
អតិថិជនចូលចិត្តលទ្ធផលណាស់ ប៉ុន្តែពួកគេក៏ចង់ដឹងថាអ្នកបានធ្វើអ្វីខ្លះដើម្បីសម្រេចបានលទ្ធផលទាំងនោះដែរ ។ អាមីន រ៉ាហាល (Amine Rahal) ដែលជាស្ថាបនិករបស់ក្រុមហ៊ុន Little Dragon Media បាននិយាយថា អ្នកគួរតែប្រាប់ភាគីម្ខាងទៀតពីកត្តាដែលជំរុញឲ្យអាជីវកម្មអ្នកជោគជ័យ បរិស្ថានការងារដែលជួយឲ្យអ្នកសម្រេចបានកិច្ចការទាំងនោះ និងទស្សនៈវិស័យដែលតម្រង់ទិសដៅរបស់អ្នក ។
៤. ស្តាប់ពួកគេដោយយកចិត្តទុកដាក់
ជាទូទៅ មនុស្សចូលចិត្តគិតច្រើនណាស់ពេលដែលជួបមនុស្សម្នាក់ជាលើកដំបូង ដែលធ្វើឲ្យពួកគេមិនអាចយកចិត្តទុកដាក់ទាំងស្រុងទៅលើអ្វីដែលភាគីម្ខាងទៀតបាននិយាយទេ ។ ប៉ុន្តែការស្តាប់អាចអនុញ្ញាតឲ្យអ្នកយល់ដឹងច្រើនពីបុគ្គលម្ខាងទៀតដែលជួយឲ្យអ្នកខិតជិតគោលដៅអ្នកកាន់តែជិត ។ លើសពីនេះទៅទៀត ការធ្វើដូច្នេះក៏ធ្វើឲ្យភាគីម្ខាងទៀតមានអារម្មណ៍ថាអ្នកគោរពគំនិត និងទស្សនៈរបស់ពួកគេផងដែរ ៕
ចែករំលែកព័តមាននេះ