ខេត្តប៉ៃលិន ៖ បើតាមសេចក្តីរាយការណ៍បឋមបានឱ្យដឹងថា ក្រៅពីការជឿជាក់លើវិទ្យាសាស្ត្រ គេសង្កេតឃើញអបិយជំនឿ តែងតែមានការដក់ជាប់នៅក្នុងចិត្តរបស់ប្រជាពលរដ្ឋខ្មែរមួយចំនួន តាំងពីដូនតារហូតមកដល់ពេលបច្ចុប្បន្ននេះ ជាពិសេសប្រជាពលរដ្ឋរស់នៅតាមតំបន់ដាច់ស្រយាល ឬក្បែរព្រៃភ្នំជាដើម ។…
ខេត្តប៉ៃលិន ៖ បើតាមសេចក្តីរាយការណ៍បឋមបានឱ្យដឹងថា ក្រៅពីការជឿជាក់លើវិទ្យាសាស្ត្រ គេសង្កេតឃើញអបិយជំនឿ តែងតែមានការដក់ជាប់នៅក្នុងចិត្តរបស់ប្រជាពលរដ្ឋខ្មែរមួយចំនួន តាំងពីដូនតារហូតមកដល់ពេលបច្ចុប្បន្ននេះ ជាពិសេសប្រជាពលរដ្ឋរស់នៅតាមតំបន់ដាច់ស្រយាល ឬក្បែរព្រៃភ្នំជាដើម ។
អ្នកខ្លះ នៅមានជំនឿទៅលើអារក្ស អ្នកតាព្រៃភ្នំ ព្រលឹងខ្មោច ព្រាយបិសាច ជាដើម ។ លុះពេលឃើញមានរឿងរ៉ាវអ្វីកើតឡើងធ្វើឱ្យមនុស្សបាត់បង់ជីវិតផ្ទួនៗ ឬមានជំងឺប្លែកៗ ទើបគេនាំគ្នារកមើលគ្រូទាយ ឬហោទាយពីជតារាសី និងធ្វើទីងមោងពីចំបើងដាក់ឱ្យឈរនៅចាំយាមមុខផ្ទះ ក្នុងគោលបំណង ដើម្បីថែរក្សាផ្ទះគេតែម្តង ។
ជាក់ស្តែងកាលពីរសៀលថ្ងៃទី២៨ ខែមីនា ឆ្នាំ២០២០ មានប្រជាពលរដ្ឋជាច្រើនគ្រួសារ បានដាក់តាំងរូបទីងមោងនៅខាងមុខផ្ទះ ស្ថិតនៅក្នុងភូមិថ្មី និងក្បែរចំណុចផ្សារថ្មី ក្នុងភូមិអូរច្រាត្បូង សង្កាត់ទួលល្វា ក្រុងប៉ៃលិន ខេត្តប៉ៃលិន ដោយមានប្រជាពលរដ្ឋមួយចំនួនបានយកសម្លៀកបំពាក់ចាស់ៗ ច្រកស្មៅ ឬចំបើងធ្វើទីងមោង ដើម្បីការពារឱ្យមានសេចក្តីសុខ និងបណ្តេញវិញ្ញាណឧបទ្រពចង្រៃចេញពីក្នុងភូមិផងដែរ ។
បើតាមប្រភពពីស្ត្រីវ័យចំណាស់ម្នាក់ឈ្មោះ សៀប អាយុ៦៦ឆ្នាំ និងមានប្តីឈ្មោះ ជៀស អាយុ៦៧ឆ្នាំ រស់នៅភូមិថ្មី សង្កាត់ទួលល្វា បានរៀបរាប់ឱ្យដឹងកាលពីម៉ោង៣និង៣០នាទី រសៀល ថ្ងៃទី២៨ ខែមីនា ឆ្នាំ២០២០នេះថា កាលពីប៉ុន្មានខែមុន ដោយសារតែនៅក្នុងភូមិរបស់គាត់មានមនុស្សប្រុសស្រីក្មេងចាស់ មានជំងឺបាត់បង់ជីវិតជាបន្តបន្ទាប់គ្នា ចាប់ពីអាយុ៤០ឆ្នាំឡើងទៅ រហូតដល់ទៅ៧នាក់ ទើបធ្វើឱ្យគាត់ ព្រមទាំងអ្នកភូមិមានការភ័យខ្លាចគ្រប់ៗគ្នា ក៏នាំគ្នាធ្វើជារូបទីងមោងដាក់តាំងនៅខាងមុខផ្ទះ ដោយគាត់ចាប់ផ្តើមធ្វើមុនគេ ។
ស្ត្រីវ័យចំណាស់ខាងលើបន្តទៀតថា ជំនឿអបិយជំនឿនេះ គឺមានតាំងពីដូនតាមកម្ល៉េះ ដោយអ្នកណាមិនជឿក៏អត់ទៅ តែគាត់ជឿជាក់ក្នុងខ្លួនឯង ព្រោះអីបន្ទាប់ពីឃើញមានមនុ ស្សបាត់បង់ជីវិតស្ទើររាល់ថ្ងៃ លុះគាត់ដាក់តាំងរូបទីងមោងនេះឡើង ស្រាប់តែមានសភាពស្ងប់ស្ងាត់ទៅវិញ ។ ហើយការដាក់តាំងរូបបែបនេះ គឺគាត់គិតថា មិនប៉ះពាល់ដល់នរណាម្នាក់នោះទេ ព្រោះវាជាជំនឿរៀងខ្លួន និងប្រជាពលរដ្ឋម្នាក់ៗ ។
ប្រភពដដែលបន្តថា គាត់ជឿថាការដាក់តាំងរូបនេះ គឺដើម្បីឱ្យរូបទីងមោងនេះ ជួយបណ្តេញនូវឧបទ្របចង្រៃ ខ្មោច ព្រាយ អាសុរកាយ ចេញផុតពីផ្ទះ និងពីក្នុងភូមិរបស់គាត់ ។ ក្រោយមកអ្នកភូមិថ្មី ស្ទើរតែទាំងអស់បាននាំគ្នា ធ្វើរូបទីងមោងនេះឡើង ហើយដល់ពេលយប់ពួកគេតែងតែនាំគ្នាដុតភ្លើងគប់ រត់ដេញតៗគ្នា ដើម្បីឧបកិច្ចបណ្តេញនូវវិញ្ញាណព្រាយ បិសាច ដែលមកចង់ឆក់យកជីវិតមនុស្សឱ្យរត់ចេញឆ្ងាយពីភូមិ កុំមកលងបន្លាចបន្តទៀត ។
លោកយាយបញ្ជាក់ទៀតថា គាត់ក៏បានយកកំបោរ.សទៅគូសជាសញ្ញាឈើឆ្កាង ឬសញ្ញាជើងក្អែក នៅតាមជញ្ជាំងមុខផ្ទះ ក្នុងផ្ទះ ដើម្បីធ្វើសីមាហ៊ុមព័ទ្ធកុំឱ្យវិញ្ញាណព្រាយ បិសាច ទាំងនោះចូលទៅក្នុងផ្ទះ លងបន្លាចក្មេងៗ និងដើម្បីការពារឱ្យការរស់នៅទទួលបានសេចក្តីសុខសាន្តផងដែរ ។
លើសពីនេះថ្មីៗ ក្រោយមកទៀត គេឮល្បីរឿងមេរោគកូរ៉ូណា ហៅកូវីដ១៩ ទើបពួកគាត់ ក៏ទុកទីងមោងនៅដដែល ដើម្បីការពារ ដោយមិនរុះរើចេញពីមុខផ្ទះនោះឡើយ ។ ប៉ុន្តែក៏មានការពាក់ម៉ាសការពារមេរោគទាំងនោះផងដែរ តាមការណែនាំរបស់អាជ្ញាធរមូលដ្ឋានផងដែរ ។
ចំណែកអ្នកខ្លះទៀត បានលើកឡើងថា អបិយជំនឿ មិនអាចការពារយើងបានទេ ពេលកូនចៅឈឺ ឬគ្រុនរងា គេត្រូវតែរត់រកគ្រូពេទ្យ ឬលេបថ្នាំ ទើបអាចជាសះស្បើយ បើសិនជាកូនក្តៅខ្លួន នាំគ្នារត់ទៅសែនព្រេន ដោយមិនឱ្យគ្រូពេទ្យពិនិត្យ អាចនឹងមានគ្រោះថ្នាក់ដល់អាយុជីវិតដល់កូនចៅរបស់ខ្លួនជាក់ជាមិនខាន ។ ដូច្នេះបើប្រជាពលរដ្ឋមានជំនឿទៅលើអបិយជំនឿ ក៏ជឿទៅចុះ តែកុំភ្លេចនាំគ្នារត់ទៅរកវិទ្យាស្ត្រ ដូចជាគ្រូពេទ្យ និងលេបថ្នាំព្យាបាលជំំងឺជាដើម ។
អ្នកខ្លះទៀតជឿថា អបិយជំនឿ ក៏អាចមានមែន ហើយផ្នែកវិទ្យាសាស្ត្រក៏កាន់តែពិតប្រាកដ ។ ដូចនេះ បើយើងជឿទៅលើអ្វីមួយ ត្រូវឱ្យសមហេតុផល កុំឱ្យជំនឿជ្រុលនិយម ព្រោះអាចនឹងមានគ្រោះថ្នាក់ដល់ខ្លួនឯង និងអ្នកដទៃ បើសិនជាជំនឿនោះមិនកើតឡើងពិតប្រាកដ អាចនឹងខាតបង់អ្វីៗជាក់ជាមិនខាន ៕ (កែសម្រួលដោយ ៖ បុប្ផា)
ចែករំលែកព័តមាននេះ