ក្រៅពីមានទ្រព្យសម្បត្តិស្តុកស្តម្ភដូចគ្នា និងការគិតដែលខុសពីមនុស្សទូទៅហើយ មហាសេដ្ឋីជាច្រើនជុំវិញពិភពលោកមានចំណុចចម្លែកៗដែលដូចគ្នាច្រើនផងដែរ ។ ខាងក្រោមគឺជាចំណុចចម្លែកៗមួយចំនួនដែលមហាសេដ្ឋីភាគច្រើនចែករំលែក៖
១-ពួកគេមានដៃគូជីវិតហើយ
៨៧ភាគរយនៃមហាសេដ្ឋីជុំវិញពិភពលោកបានរៀបអាពាហ៍ពិពាហ៍រូចបើយោងទៅតាមការសិក្សារបស់ GoCompare ដែលវិភាគមហាសេដ្ឋីទាំង ១០០ រូបរបស់ទស្សនាវដ្តី Forbes ក្នុងកំឡុងឆ្នាំ ១៩៩៦ ដល់ ២០១៦ ។ ក្នុងនោះរួមមានលោកមហាសេដ្ឋី ប៊ីល ហ្គេតស៍ (Bill Gates) ដែលជាសហស្ថាបនិករបស់ក្រុមហ៊ុន Bill Gates និងលោកមហាសេដ្ឋី វារ៉េន បាហ្វេត (Warren Buffett) ដែលជាវិនិយោគិនដ៏ឆ្នើមជាដើម ។
២-ពួកគេមានគ្រួសារធំ
ការសិក្សាខាងលើបានប្រទះឃើញទៀតថា មហាសេដ្ឋីភាគច្រើនមានកូនៗចាប់ពី ៣នាក់ឡើងទៅ ។ ក្នុងនោះរួមមាន ៥ភាគរយដែលមិនមានកូន ៩% មានកូនម្នាក់ ២៣% មានកូនពីរនាក់ និង ២៥% មានកូនបីនាក់ ខណៈដែល ១៧% មានកូនៗបួននាក់ និង ២១% មានកូនៗចាប់ពី ៥នាក់ឡើងទៅ ។ លោកមហាសេដ្ឋី ជេហ្វ បេសូស (Jeff Bezos) ដែលជានាយកប្រតិបត្តិរបស់ Amazon មានកូនចំនួន ៤នាក់ ខណៈដែលលោកមហាសេដ្ឋី បឺណាដ អាណូល (Barnard Arnault) ដែលជាអគ្គនាយក និងនាយកប្រតិបត្តិរបស់ LVMH មានកូនចំនួន ៥នាក់ ។
៣-ពួកគេមិនពាក់វ៉ែនតាច្រើនទេ
យោងទៅតាមការសិក្សានៅឆ្នាំ ២០១៦ បានឲ្យដឹងថា មានតែ ៤០% នៃមហាសេដ្ឋីទេដែលពាក់វ៉ែនតា ខណៈដែល ៦៥% នៃប្រជាជនអាមេរិកទាំងអស់ពាក់វ៉ែនតាជាប្រចាំ ។ មហាសេដ្ឋីដែលពាក់វ៉ែនតាជាប្រចាំរូមមានលោក ប៊ីល ហ្គេតស៍ និងមិត្តជិតស្និទ្ធិរបស់លោកគឺលោកមហាសេដ្ឋី វ៉ារេន បាហ្វេត (Warren Buffett) ។
៤-ពួកគេបើកបររថយន្តដែលមិនថ្លៃពេក
មិនមែនមហាសេដ្ឋីគ្រប់រូបត្រូវតែបើកបររថយន្តដែលមានតម្លៃស្មើប្រាក់បៀវត្សរបស់មនុស្សម្នាក់ក្នុងមួយជីវិតទេ ។ លោកមហាសេដ្ឋី ជេហ្វ បេសូស បើកបរ Honda Accord ខណៈដែល លោកម៉ាក ហ្សាក់កាបឺក (Mark Zuckerberg) របស់ Facebook ជាម្ចាស់រថយន្ត Honda Fit ។
៥-ពួកគេធ្លាប់មានការងារសាមញ្ញ
ក្នុងចំណោមមហាសេដ្ឋីធំៗទាំងអស់ មានមនុស្សជាច្រើនធ្លាប់រស់នៅក្នុងជីវភាពក្រីក្រនិងខិតខំប្រឹងប្រែងរហូតមានទ្រព្យសម្បត្តិស្តុកស្តម្ភ ។ មហាសេដ្ឋីមួយចំនួនធ្លាប់មានការងារសាមញ្ញទេដូចជាមហាសេដ្ឋីវ៉ារេន បាហ្វេតដែលធ្លាប់ធ្វើជាអ្នកលក់កាសែត និងលោកជេហ្វ បេសូសដែលធ្វើជាអ្នកធ្វើបឺហ្គឺនៅ McDonald’s ជាដើម ៕ (យោងតាមប្រភពពី finance.yahoo.com )
ចែករំលែកព័តមាននេះ