ប្រសិនបើលោកមហាសេដ្ឋី ប៊ីល ហ្គេតស៍ (Bill Gates) ដែលជាសហស្ថាបនិករបស់ក្រុមហ៊ុន Microsoft ក្លាយជាប្រធានាធិបតីរបស់សហរដ្ឋអាមេរិកក្នុងពេលបច្ចុប្បន្ននេះ លោកនឹងជំរុញឲ្យប្រជាជនក្នុងសហរដ្ឋអាមេរិកបន្តរក្សាគម្លាតពីគ្នាដើម្បីកាត់បន្ថយការចម្លងវីរុសកូវីដ-១៩ ។…
ប្រសិនបើលោកមហាសេដ្ឋី ប៊ីល ហ្គេតស៍ (Bill Gates) ដែលជាសហស្ថាបនិករបស់ក្រុមហ៊ុន Microsoft ក្លាយជាប្រធានាធិបតីរបស់សហរដ្ឋអាមេរិកក្នុងពេលបច្ចុប្បន្ននេះ លោកនឹងជំរុញឲ្យប្រជាជនក្នុងសហរដ្ឋអាមេរិកបន្តរក្សាគម្លាតពីគ្នាដើម្បីកាត់បន្ថយការចម្លងវីរុសកូវីដ-១៩ ។ នេះជាប្រសាសន៍របស់លោកក្នុងបទសម្ភាសន៍មួយក្នុងកម្មវិធី TED ។
យោងទៅតាមលោក ហ្គេតស៍ បានឲ្យដឹងថា ប្រសិនបើសហរដ្ឋអាមេរិកជោគជ័យក្នុងការអនុម័តវិធានការរក្សាគម្លាតទូទាំងប្រទេសនោះ ចំនួនករណីថ្មីៗនឹងចាប់ផ្តើមធ្លាក់ចុះក្នុងកំឡុងពេលប្រមាណ ២០ថ្ងៃហើយ ។
លើសពីនេះទៅទៀត លោកបានបន្តថា លោកនឹងផ្តល់សារយ៉ាងច្បាស់លាស់ដល់ប្រជាជនអាមេរិកថាវាមិនមែនជារឿងដែលងាយធ្វើឡើយ ។
គួរបញ្ជាក់ផងដែរថា ក្នុងនាមជាសហស្ថាបនិករបស់មូលនិធិ Bill and Melinda Gates Foundation លោកមហាសេដ្ឋីខាងលើមានបទពិសោធន៍ជាច្រើនក្នុងការទប់ទល់នឹងជម្ងឺឆ្លងដែលរួមមានជម្ងឺគ្រុនចាញ់ និង អេដស៍ជាដើម ។
លោក ហ្គេតស៍ មានប្រសាសន៍ដូចនេះបន្ទាប់ពីលោកប្រធានាធិបតី ដូណាល់ ត្រាំ (Donald Trump) បានប្រកាសថាលោកចង់ឲ្យក្រុមហ៊ុន និងអាជីវកម្មបើកដំណើរការដូចធម្មតាវិញនៅថ្ងៃទី ១២ខែមេសាខាងមុខនេះ ។
ប៉ុន្តែអ្នកជំនាញផ្នែកសុខាភិបាលបាននិយាយថាកំឡុងពេលនេះ គឺលឿនពេកហើយ ។ លើសពីនេះទៅទៀត ការបើកដំណើរការនៃអាជីវកម្ម និងសាលារៀនវិញអាចនឹងបង្កផលប៉ះពាល់កាន់តែធ្ងន់ធ្ងរជាងមុនទៅទៀត ។
ជាមួយគ្នានេះដែរ លោក ហ្គេតស៍ បានបញ្ជាក់ថាវាពិតជាសំខាន់ណាស់ក្នុងការផ្តល់តម្លៃលើសុខភាពមនុស្សមុនលើលុយ ។
លោកបានបកស្រាយថា «វាពិតជាគួរឲ្យសោកស្តាយណាស់ដែលផលប៉ះពាល់ផ្នែកសេដ្ឋកិច្ចនៃរឿងនេះមានភាពធ្ងន់ធ្ងរ ។ មិនដែលមានអ្វីដូចនេះធ្លាប់កើតឡើងក្នុងសេដ្ឋកិច្ចរបស់យើងទេ ។ ប៉ុន្តែលុយ និងការបើកដំណើរការសេដ្ឋកិច្ចវិញ វាងាយធ្វើច្រើនជាងធ្វើឲ្យមនុស្សដែលបាត់បង់ជីវិតរស់រានឡើងវិញ» ៕
(យោងតាមប្រភពពី www.cnbc.com )
ចែករំលែកព័តមាននេះ