រាជធានីភ្នំពេញ ៖ នាយកដ្ឋានប្រយុទ្ធប្រឆាំងនឹងជំងឺឆ្លង លោកវេជ្ជបណ្ឌិត លី សុវណ្ណ បានឲ្យដឹងថារាល់អ្នកមានរោគសញ្ញាផ្តាសាយ ក្តៅខ្លួន ក្អក ឬហៀរសំបោរ…
រាជធានីភ្នំពេញ ៖ នាយកដ្ឋានប្រយុទ្ធប្រឆាំងនឹងជំងឺឆ្លង លោកវេជ្ជបណ្ឌិត លី សុវណ្ណ បានឲ្យដឹងថារាល់អ្នកមានរោគសញ្ញាផ្តាសាយ ក្តៅខ្លួន ក្អក ឬហៀរសំបោរ សូមកុំសង្ស័យថា ពាក់ព័ន្ធនឹងការឆ្លងមេរោគ COVID-19 ព្រោះបើសិនជាពួកគាត់គ្មានប្រវត្តិធ្វើដំណើរទៅក្រៅប្រទេស ឬធ្លាប់ប៉ះពាល់ផ្ទាល់ជាមួយអ្នកឆ្លងមេរោគ COVID-19 ឬធ្លាប់បានប៉ះពាល់ជាមួយសពដែលបានបាត៉បង់ជីវិតដោយសារជំងឺផ្លូវដង្ហើមគ្រប់ប្រភេទ ដែលពុំបានធ្វើរោគវិនិច្ឆ័យនោះ ។
លោកបានអំពាវនាវបន្តថា នៅតាមមណ្ឌលសុខភាពមូលដ្ឋាន បន្តព្យាបាលអ្នកជំងឺផ្តាសាយ ធម្មតា ចៀសវាងគិតតែបញ្ជូនទៅព្យាបាលនៅមន្ទីរពេទ្យបង្អែកខេត្ត ឬមន្ទីរពេទ្យរុស្ស៊ី ដោយគិតតែសង្ស័យ COVID-19 ។
នាយកដ្ឋានប្រយុទ្ធប្រឆាំងនឹងជំងឺឆ្លង បានបញ្ជាក់យ៉ាងដូច្នេះថា ៖ «យើងគ្មានហេតុផលណាថា រាល់អ្នកដែលមានរោគសញ្ញាផ្តាសាយ គាត់ក្តៅខ្លួន ក្អក ហៀរសំបោរ គាត់សង្ស័យ COVID-19 អីទេ សូមបន្តព្យាបាលជំងឺធម្មតា ។ ប៉ុន្តែបើគាត់ចេញរោគសញ្ញានេះ ហើយគាត់ធ្លាប់មានប្រវត្តិទើបតែមកពីស្រុកក្រៅ ក្នុងកំឡុងពេល ១៤ថ្ងៃ យើងអាចចាត់ទុកថា គាត់សង្ស័យមាន COVID-19 ឬគាត់ប៉ះពាល់អ្នកដែលបាត់បង់ជីវិតជំងឺផ្លូវដង្ហើម ដែលមិនបានធ្វើរោគវិនិច្ឆ័យ ទើបយើងចាត់ទុកថាសង្ស័យ» ។
សរុបទាំងអស់គិតត្រឹមព្រឹកថ្ងៃទី២០ ខែមីនានេះ ចំនួនសរុបមានអ្នកឆ្លង ៤៧ករណី, ៤៤ករណីនាំចូលពីប្រទេសក្រៅ ១ករណីប៉ះពាល់ផ្ទាល់ជាមួយអ្នកជំងឺជនជាតិជប៉ុន និង២ករណីជាប្រពន្ធពីរនាក់ប៉ះពាល់ផ្ទាល់ជាមួយប្តីពីរនាក់មកពីបុណ្យសាសនាពីប្រទេសម៉ាឡេស៊ី ដែលរកឃើញមានផ្ទុកវិជ្ជមាន COVID-19 ៕
ចែករំលែកព័តមាននេះ